Yeshaya 8:19 - Mukanda wa Nzambi Dihungila Dikulukulu ne Dihungila Dihia-dihia 2003

¹⁹ Hanuambila bantu ne, Nukebe lungenyi kudi bena lubuku lua muzangu ne kudi bena muhongo badi bakula bu biambi ne badi banungana, bualu kabuena bukuata bantu bua kukeba lungenyi kudi Nzambi wabo, anyi? Bua kukuatshisha badi ne muoyo, budibo nʼabu mbua kuya kudi bafue, anyi?

MUKANDA WA MYIDI MUKULU

¹⁹ Bantu bakuabu badi bamba ne: “Nukonke bakishi malu, bualu badi batumanyisha malu adi kaayi manji kuenzeka. Nukonke bena mbuku, bakuambile malu ku ditshi. Bualu tshisamba tshionsu tshidi tshikonka mvidie yatshi, tshikonka bakishi buakulongolola malu a bantu badi panu.” Padibu bakuambila nanku,

Yeshaya 8:19 교차 참조

Genese 41:24

ne miehu nukese yakadia miehu muanda mutekete miakane, meme nakatshiawila benu majimbu, kadi nansha umue wabo wakamanya mua kutshinjinguluila.

2 Bakalenga 1:3

Kadi muanjelo wa Yehowa wakambila Eliya, Muena Tishebe, ne, Juka, uye kusangila ne ba-messager ba mukelenge wa Samalea, uheheshe ne, Nudi nuyila kuebesha Bâla-zebuba, nzambi wa Ekelona, bualu, bualu bua kakuena Nzambi mu Isalele, anyi?

2 Bakalenga 21:6

Yeye kabidi wakahitshisha muanʼandi wa balume mu kahia, wakatempa mbuku; wakadisunguila bena muhongo ne bena buloshi; wakenza malu mabi a bungi ku mesu kua Yehowa bua kumufuisha nʼau tshiji.

2 Bakalenga 23:24

Yoshiya wakumusha kabidi bena mbuku ne bena muhongo ne mpingu yonso ne malu a bundu onso biakadi mu Yuda ne mu Yelushalema bua yeye ajadike mei onso a mikenji akadi mafunda mu mukanda wakasangana Hilekiya muakuidi mu nsubu wa Yehowa.

1 Kulondolola 10:13

Nunku Shaula wakafua bualu bua bubi buandi buakenzeleye Yehowa ne bua dî dia Yehowa diakahidieye; ne bualu bua yeye wakakeba lungenyi kudi muena buloshi,

2 Kulondolola 33:6

Yeye wakahitshisha bana bandi mu kahia mu tshibanda tshia muana wa Hinoma; wakatempa matempu, wakatendelela bakishi, wakahaka manga, wakasangisha dî ne batempeshanganyi ba mbuku ne bena buloshi; yeye wakenza malu mabi a bungi ku mesu kua Yehowa bua kumufuisha nʼau tshiji.

Misambu 106:28

Bakadilamika kudi Bâla-Peô; bakadia milambu mifila kudi bafue.

Yeshaya 19:3

Nyuma wa ba mu buloba bua Ejipitu neahange munda muabo, ne nentuhakashe meji adibo nʼau; nebaye kudi mpingu bua kudikebela lungenyi, ne kudi batempi ba mbuku, kudi bena mbuku ya mibangu, ne kudi bena muhongo.

Yeshaya 26:14

Bafue kabena hikala ne muoyo kabidi, bakahuola muoyo, kabena babika kabidi. Nunku wewe wakubakengesha ne wakubabutula, wakujimisha tshivulukidi tshiabo tshionso.

Yeshaya 29:4

Nebakutulule hanshi, newambe mei ebe hawikala muinshi mua buloba, muaku webe ndifume munkatshi mua dinfuenkenya. Dî diebe nedikale bu dî dia muakuishi wa biambi dihatuka munda mua buloba, ne mei ebe neikale bu biambi bihatuka mu dinfuenkenya.

Yeshaya 30:2

Badi bahisha luendu bua kuhuekabo mu Ejipitu, ne kabena bakonka lungenyi mukana muanyi. Badi basue kunyemena tshinyemenu kudi Palô, ne kudisokoka muinshi mua mundidimbi wa Ejipitu!

Yeshaya 45:11

Yehowa, Wa Tshijila wa Isalele, ne Mufuki wandi, udi wamba ne, Nenungebeshe bua malu adi kâyi manji kulua, anyi? Nenungelele mukenji bua bana banyi balume, anyi bua mudimu wa bianza bianyi, anyi?

Yeshaya 47:12

Shala mueyemene kulowa kuebe, ne bungi bua malu ebe a buloshi, biwakuditondesha nʼabi katshia bakuela; bumue neumanye mua kudikuatshisha, ne bumue neumanye mua kukuatshisha bakuabo buowa.

Yeshaya 47:13

Meji a ba bungi badi basue kukulesha meji akukutonda; badi bafunda bintu bia mu diulu ha mukanda wa carte, badi batangila mitoto, badi bakuambila ku ngondo ku ngondo bualu budi buamba kulua kûdi, bimane kulu, bakusungile ku malu adi alua hamʼbidi hebe.

Yirmeya 10:10

Kadi Yehowa udi Nzambi wa bushuwa; yeye udi Nzambi wa muoyo ne Mukelenge wa tshiendelele. Buloba budi buzakala hikaleye ne tshiji, ne ba mu bisamba bia bantu kabena mua kuimana ku mpala kua tshiji tshiandi.

Yirmeya 27:9

Kadi nuenu, kanunvu mei a baprofete benu, anyi a bena lubuku benu, anyi a badi banuambila bilota biabo, anyi a bena muhongo benu anyi a bena lubuku lua muzangu badi banuambila ne, Kanuena nukuatshila mukelenge wa Babulona mudimu.

Lewitiki 19:31

Kanubuelakanyi ne bena mulongo anyi batempi ba mbuku, kanubakebi, kunudionyi kudibo meme ndi Yehowa, Nzambi wenu.

Lewitiki 20:6

Muntu yonso udi ubuelakana ne bena muhongo ne batempi ba mbuku bua kulonda malu abo a masandi, nengumushe mesu anyi kudi muntu au, nemmumushe munkatshi mua bana babo.

Mika 5:12

Nengumushe bia kutempa nʼabi mbuku mu tshianza tshienu; kanuena nuikala ne batempeshi ba mbuku kabidi.

Bienzedi 16:16

Hatuakadi tuya ku muaba wa kutendelela, nsongakashi muhika wakasangakana nʼetu, wakadi ne nyuma mubi wakadi umubukisha, wakamuenesha banfumuʼandi bintu bia bungi bualu bua lubuku luandi.

Dielulula 18:10

Muntu kikadi munkatshi muenu udi utambisha muanʼandi mulume anyi muanʼandi mukashi mu kahia, nansha mutempi wa mbuku, nansha muena dijimbu nansha muena bilengulengu, nansha muena buloshi,

Dielulula 18:11

nansha musesuishi wa bantu ne miloû yandi, nansha mutendeledi wa bakishi, nansha muena muhongo, nansha muena lubuku lua muzangu.

1 Tesalonike 1:9

Bua bobo nkayabo batu bamba bua bualu buetu, bu muakadi tshibueledi tshietu kunudi, ne bu munuakakudimuka kudi Nzambi hanuakalekela mpingu bua kukuatshila Nzambi wa muoyo ne wa bushua mudimu,

2 Petro 2:1

Kadi baprofete ba mashimi bakabika munkatshi mua bantu kabidi, bu mudi bayishi ba mashimi balua kubika munkatshi muenu, nebalue mu musokoko ne malu manutahulule ku dibutuke, bavila Mukelenge wakabahikula, badivuishila dibutuka dia lukasa.

1 Samuele 28:11

Hashishe mukashi wakamba ne, Udi musue meme nkumueneshile nganyi? Yeye wakamuambila ne, Umueneshile Samuele.

1 Samuele 28:16

Samuele wakamuambila ne, Udi nngebesha meme munyi, bualu bua Yehowa wakalekela, wakalua bu muena lukuna webe?

1 Samuele 28:7

Shaula wakambila bantu bandi ne, Nunkebele mukashi mutempi wa lubuku, bua meme kuya kudiye kunuebesha. Bantu bandi bakamuambila ne, Mona, mukashi mutempi wa lubuku udi mu Ene-dô.

1 Samuele 28:8

Shaula wakadifuanyisha bu munga muntu, wakaluata bilulu bikuabo, wakaya ne bantu bandi babidi bakuabo, bakafika kudi mukashi au butuku. Yeye wakamba ne, Ndi nkusengelela ne, Untempe lubuku lua bakishi, umueneshe ku mesu kuanyi muntu undi nkuambila dina diandi.