Yeshaya 51:11 - Mukanda wa Nzambi Dihungila Dikulukulu ne Dihungila Dihia-dihia 2003

¹¹ Ka bantu bakuhikudibue kudi Yehowa nebalukilemu, nebalue ku Siona bimba misambu, disanka dia tshiendelele nedikale ha mitu yabo; nebikale ne disankidila ne disanka; kanyinganyinga ne kuhumuna nebinyeme kule.

MUKANDA WA MYIDI MUKULU

¹¹ Maweja-Nangila neapikule bantu bende. Bantu abu nebapingane mu Yerushalayime. Nebabuelemu, benda bela bibingu bia disanka. Disanka didi kadiyi dijika nedikenkeshe mpala yabu. Musangelu ne diakalenga ne biuwule mu muoyi wabu tente. Ntatu ne makenga nebijike.

Yeshaya 51:11 교차 참조

Misambu 126:2

Mu diba adi mukana muetu muakadi mûle tente ne tuseku ludimi luetu luakûla tente ne mbila ya disanka. Mu diba adi bakambila ngana munkatshi mua bisamba bia bantu ne Yehowa wakabenzela malu manene.

Misambu 126:5

Badi bamiamina maminu ne binsonshi ku mesu nebahuole bia kudia ne mbila ya disanka.

Yeshaya 11:15

Yehowa neakamishe diboko dia mai manene a mu Ejipitu tshishiki; neakuhe tshianza tshiandi ha mutu ha Musulu wa Pelata, ne luhehele luandi ludi lûmisha, nenutahulule mu tusulu muanda mutekete, neasabulehu bantu ne bisabata biabo kabiyi bibola.

Yeshaya 25:8

Yeye wakumina lufu tshiendelele; ne Mukelenge Yehowa neakuhule binsonshi ku mesu kua bantu bonso; neumushe tshihendu tshidibo bahenda nʼatshi bantu bandi, utshiumusha ha buloba buonso; bualu bua Yehowa wakuamba dî edi.

Yeshaya 35:10

Bantu badi Yehowa muhikule nebahingane, nebalue ku Siona bimba misambu; disanka dia tshiendelele nedikale ha mitu habo; nebahete disanka ne diakalengele; kanyinganyinga ne kuhumuna nebinyeme kule.

Yeshaya 44:23

Bia mu diulu, imbai bualu bua Yehowa wakuenza nunku; bidi mu ndondo wa buloba, elai mbila! Bandishai mei enu mu kuimba kua misambu, nuenu, mikuna, ditu, ne mitshi yonso idimu! Bualu bua Yehowa wakuhikula Yakoba, neaditumbishishe mu Isalele.

Yeshaya 48:20

Hatukai mu Babulona, nunyeme Bena Kasada! Nuambe bualu ebu ne dî dia kuimba musambu, nuambe bualu ebu, nutume dî edi tô ne kunfudilu kua buloba! Nuambe bienu ne, Yehowa wakuhikula muntu wandi Yakoba.

Yeshaya 49:13

Diulu, imbaku biebe; buloba, sankaku biebe; nuenu mikuna, bandishai mei enu mu kuimba kua misambu! Bualu bua Yehowa wakusamba bantu bandi, ne neafuile bantu bandi badi bakenga luse.

Yeshaya 55:12

Bualu bua nenduhuke ne disanka, nebanulombole ne ditalala; mikuna minene ne mikuna mikese neyibishe mei ai mu kuimba kua misambu ku mpala kuenu; mitshi yonso ya mu mpata neyitutakashe bianza.

Yeshaya 61:7

Mu muaba wa bundu buenu nenuikale ne nseke ibidi ya buhianyi, mu muaba wa dikeheshibua nebikale ne disanka mu buhianyi buabo; nunku nebikale ne bituha bibidi bia buhianyi mu buloba buabo; disanka diabo nedikale disanka dia tshiendelele.

Yeshaya 65:14

tangilai, bantu banyi nebimbe misambu bua disanka dia mu mitshima yabo, kadi nuenu nenudie bua kanyinganyinga ka mu mitshima yenu, nenuase muadi bua mitshima yenu yakuhandika.

Yeshaya 65:19

Nensanke bua Yelushalema, nensanke bua bantu banyi; kabena bunvua dî dia madilu anyi dia muadi wa dikenga munkatshi muandi kabidi.

Yirmeya 31:13

Hashishe mishikankunde itshidi kamama neyisanke mu kuja kua maja, ne bansongalume ne bakulumpe nebasanke diatshimue; bualu bua nengandamune madilu abo alue disanka, nembasambe, nembahingashile disanka bua kanyinganyinga kakadibo nʼaku.

Yirmeya 33:11

nebunvue kabidi dî dia kunaya ne dia disanka, dî dia mubaki wa mukashi ne dia mukashi mubaka, dî dia bantu badi bamba mei abo, haluabo ne milambu ya kusakidila nʼai Yehowa mu nsubu muandi ne, Sakidilai Yehowa wa misumba, bualu bua Yehowa udi muimpe, bua luse luandi ludi lujalame tshiendelele. Yehowa udi wamba ne, Bualu bua nenkudimune buhika bua mu buloba ebu bua kuhingasha diakalengele diakadibu nʼadi diambedi.

2 Tesalonike 2:16

Mukelenge wetu Yesu Kilisto muine ne Nzambi Tatu wetu, wakatunanga ne wakatuha busambi bua tshiendelele ne ditekemena dimpe bua ngasa,

Yuda 1:24

Katataka kudi yeye udi mumanye mua kunulama bua nuenu kanulenduki, ne udi mua kunuteka ku mpala kua butumbi buandi ne disanka ditamba bunene, kanui ne tshilema;

Didimanyisha 21:1

Nakatangila diulu dihia-dihia ne buloba buhia-buhia; bualu bua diulu dia kumudilu ne buloba bua kumudilu biakumuka; ne mai manene kenaku kabidi.

Didimanyisha 21:4

Yeye neakuhule tshinsonshi tshionso ku mesu kuabo; ne lufu kaluena luikalaku kabidi; madilu kêna ikalaku kabidi, nasha muadi, nasha kanyinganyinga kabidi; malu a kumudilu akumuka.

Didimanyisha 22:3

Mulau kawena wikalaku kabidi; nkuasa wa butumbi wa Nzambi ne wa Muana wa Mukoko neikalemu; ne bahika bandi nebamukuatshile mudimu;

Didimanyisha 7:17

bualu bua Muana wa Mukoko udi munkatshi mua nkuasa wa butumbi neikale mulami wabo, ne neabalombole ku mishimi ya mai a muoyo; ne Nzambi neakuhule tshinsonshi tshionso ku mesu kuabo.