Yeshaya 14:1 - Mukanda wa Nzambi Dihungila Dikulukulu ne Dihungila Dihia-dihia 2003

¹ Bualu bua Yehowa neafuile Yakoba luse, neasungule ba mu Bena Isalele bu bantu bandi kabidi, ne neabashikike mu buloba buabo bua diambedi. Bantu ba bende nebadisangishe nʼabo, nebadilamike kudi ba mu bana ba Yakoba.

MUKANDA WA MYIDI MUKULU

¹ Bushuwa, Maweja-Nangila nealeje tshiakabidi mudiye munange ndelanganyi ya Yakobe, mudiye musungule bena Izrayele. Neapingaje bantu bende mu matunga abu. Bantu benyi nebadisange kudibu, nebapetangane ne bena tshisamba tshia Yakobe.

Yeshaya 14:1 교차 참조

Estere 8:17

Mu nseke yonso ne mu misoko yonso yakafika mikanda ya mukenji, Bena Yuda bakadi ne musangelu ne disanka, bakalongolola bia kudia bia disanka, bakadi ne dituku dimpe. Bantu bakuabo ba bungi ba mu buloba bakandamuka bu Bena Yuda; bualu bua ditshina dia Bena Yuda diakabakuata.

Misambu 102:13

Wewe neujuke, nenfuile musoko wa Siona luse; bua tshikondo tshiakufika tshia kuwanyisha; e, tshikondo tshiwakuamba tshiakufika.

Misambu 102:14

Bualu bua bantu bebe badi ne mabue au dinanga, badi bafuila luhuishi luau luse.

Misambu 143:12

Mu luse luebe lujalame ujimishe badi nʼanyi lukuna, ubutule bonso badi batatshisha muoyo wanji; bualu bua ndi muena mudimu webe.

Misambu 98:3

Wakuyuluka luse luandi lujalame ne lulamatu luandi lua bushuwa kudi ba mu tshisamba tshia Bena Isalele. Badi kunfudilu kua buloba bakumona luhandu lua Nzambi wetu.

Yeshaya 19:18

Mu dituku adi nemuikale misoko itanu mu buloba bua Ejipitu idi ne bantu bakula muaku wa Bena Kanâna, ne badi baditshiha kudi Yehowa wa misumba. Nebabikile umue wa munkatshi mua misoko yaya ne, Musoko wa Dibutuka.

Yeshaya 21:1

Dî dia tshijila bualu bua tshihela tshia ku luseke lua mai manene. Bu mudi nvunde ya mu Sude ihitshilamu bikole, lumu ludi lufuma ku tshihela, ku buloba budi bukuatshisha bantu buowa.

Yeshaya 27:6

Mu matuku adi kâyi manji kulua Yakoba nêle miji; Isalele neabaluluke, neasampile ntonga; nebûshe buloba buonso ne tumuma tua nvinyo.

Yeshaya 41:8

Kadi wewe, Isalele muntu wanyi. Yakoba unakusungula, kankanunuina ka Abalahama mulunda wanyi,

Yeshaya 41:9

Wewe unakukuata bua kulua nʼebe kunfudilu kua buloba, unakubikila ku matengu abu, unakuambila ne, Wewe udi mukuatshishi wanyi wa mudimu, nakukusungula ne tshiena mukuhidie.

Yeshaya 44:1

Kadi unvua biebe mpindiu, Yakoba, mutu wanyi, wewe Isalele unakusungula.

Yeshaya 45:14

Yehowa udi wamba ne, Luhetu lua ku Ejipitu ne biuma bia buendaluki bua mushinga mu Atiopa, ne Bena Seba bine, bantu bale, nebibuele ku luseke luebe, nebikale bintu biebe. Nebakulonde, nebalue ku luseke luebe ne nkanu mibasuike. Nebahone hanshi ku mpala kuebe bua kukukuila; nebakutendekene ne, Munkatshi muenu mudi Nzambi bulelela; kakuena mukuabo, kakuena Nzambi mukuabo muomumue nʼandi.

Yeshaya 47:1

Hueka biebe, ushikame mu dinfuenkenya, wewe, Babulona, muana mukashi utshidi kamama; shikama hanshi ha buloba kuyi ne nkuasa wa bukelenge, wewe muana mukashi wa Bena Kasada! Bua kabena bakubikila kabidi nej Mutekete ne mulengele.

Yeshaya 49:10

Nzala ne nyota kayena ibasuma; luhehele ludi luvuisha luya lukole ne munya kabiena bibosha, bua yeye utu wa bafuila luse neaye ku mpala kuabo, neabalombole ha buihi ne mishimi ya mai.

Yeshaya 49:13

Diulu, imbaku biebe; buloba, sankaku biebe; nuenu mikuna, bandishai mei enu mu kuimba kua misambu! Bualu bua Yehowa wakusamba bantu bandi, ne neafuile bantu bandi badi bakenga luse.

Yeshaya 49:15

Mukashi udi mua kuhua muanʼandi utshidi wamua mabele muoyo, bua yeye kafuidi muana wa balume wakuleleye luse, anyi? Bulelela, bantu aba mene badi mua kuhua muoyo, kadi meme tshiena nkuhua wewe muoyo.

Yeshaya 49:25

Kadi Yehowa udi wamba ne, E, nebanyenge muena bukitu bantu badiye ukuata mu nvita, nebahandishe badi muena tshinyangu ukuata. Bualu bua nenfuilangane ne muntu udi ufuilangana nʼebe, nensungile bana bebe.

Yeshaya 49:7

Yehowa, Muhikudi wa Isalele ne Wa Tshijila wandi, udi wambila muntu udibo bahetula kudi bantu, udibo bakenuka kudi bantu, udi muhika wa bakokeshi babi, ne, Bakelenge nebamone butumbi buebe, nebajuke; bana ba bakelenge nebajuke kabidi, nebakukukuile hanshi; bualu bua Yehowa utudi mua kueyemena, Wa Tshijila wa Isalele, wakukusungula.

Yeshaya 54:3

Bualu bua wewe neubaluluke ku tshianza tshia balume ne ku tshianza tshia bakashi; tunkanunuma tuebe netuhiane buhianyi bua bisamba bia bantu, nebashikame mu misoko yakadi bikulu.

Yeshaya 55:7

Muntu mubi alekele kuenda mu nshila wandi mubi, udi kayi muakane alekele meji andi mabi; ahingane biandi kudi Yehowa, yeye neamufuile luse; ne kudi Nzambi wetu, bualu bua yeye neatambe kumubuikidila mibi yandi.

Yeshaya 56:3

Muena tshisamba tshia bende wakalamata kudi Yehowa kambi biandi ne, Yehowa neantahulule kudi bantu bandi bulelela; ne muntu mutungula kambi biandi ne, Mona, ndi mutshi mûme.

Yeshaya 60:10

Bantu ba mu bisamba bia bende nebibake ngumbu yebe kabidi, bakelenge babo nebakukuatshile mudimu; bualu bua nakakukuma mu tshiji tshianyi, kadi mu dinanga dianyi dinakukulesha nakukufuila luse.

Yeshaya 60:14

Bana ba balume ba bantu aba bakakukengesha nebalue badinamina hanshi kûdi; bantu aba bonso bakakuhetula nebatue mpala yabo hanshi tô ne ku makasa ebe mene; nebakubikile ne, Musoko wa Yehowa, Siona wa Wa Tshijila wa Isalele.

Yeshaya 66:20

Nebalue ne bana benu bakuhatulabo mu bisamba bionso bia bantu bua kubafila bu mulambu kudi Yehowa, babendesha ha nyima ha tubalu, mu makalu, mu bihoyi, ha nyima ha nyama ya mpunda, ne ha nyima ha tumelo. Yehowa udi wamba ne, Nebalue nʼabo ku mukuna wanyi wa tshijila, Yelushalema mene, bu mudi Bena Isalele balua ne mulambu wabo wa bia kudia mu dilonga ditoke ku nsubu wa Yehowa.

Yirmeya 16:15

kadi nebambe ne, Bu mudi Yehowa ne muoyo wakaluhula Bena Isalele mu buloba bua ku node ne ku maloba onso kuakabihateye. Nendue nʼabo kabidi mu buloba bunakaha bankambua babo.

Yirmeya 29:14

Yehowa udi wamba ne, Nengitabushe bua nuenu nunsangane, nenkudimune buhika buenu, nennusangishe bua kunûmusha mu bisamba bionso ne mu miaba yonso inakunuihata; nendue nʼenu kabidi mu muaba unakanuangata hanakanutuma mu buhika.

Yirmeya 30:8

Yehowa wa misumba udi wamba ne, Mu dituku adi nentshibule mutshi wa tshikokedi bua kûmusha mu nshingu yabo, nentshibule nkanu yabo; bantu ba bende kabena babenzesha mudimu bu bahika babo kabidi,

Yirmeya 31:4

Nenkuase kabidi, ne wewe newashibue, wewe muana mukashi wa Isalele utshidi kamama. Newangate mazele ebe kabidi, neuluhuke nʼau bua kubuela mu maja a badi basanka.

Yirmeya 50:33

Yehowa wa misumba udi wamba ne, Bana ba Isalele ne bana ba Yuda badi bakengeshibua hohamue, bonso bakaya nʼabo mu buhika badi babakuata bikole, badi babenga kubakela.

Yirmeya 51:51

Tuakufuishibua bundu, bualu bua tuakunvua bihendu; bundu buakutukuata ku mesu, bualu bua bantu ba bende bakubuela mu miaba ya tshijila ya nsubu wa Yehowa.

Yezekiyele 16:60

Kadi nenvuluke tshihungidi tshinakahunga nʼebe mu matuku a buana buebe, nenjadike nʼebe tshihungidi tshia tshiendelele.

Yezekiyele 47:22

Nubutahulule ku kuela kua nshobo bua buikale buhianyi buenu, ne bua bantu ba bende badi bashikame munkatshi muenu ne badi balela bana munkatshi muenu. Bobo bikale kunudi bu bana baledibue mu meku a Bena Isalele; bikale ne buhianyi hohamue nʼenu munkatshi mua bisamba bia Bena Isalele.

Zekâya 1:17

Amba kabidi ne, Yehowa wa misumba udi wamba ne, Misoko yanyi neyule tente kabidi ne diakalengele, ne Yehowa neasambe Siona kabidi, neajadike Yelushalema kabidi.

Malaki 1:11

Yehowa wa misumba udi wamba ne, Ku kuhatuka kua diba tô ne ku kubuela kuadi dina dianyi didi dinene munkatshi mua ba mu bisamba bia bantu. Mu muaba wonso badi bangoshila musenga wa manananshi ne badi bafila mulambu, mulambu muakane mene, mu dina dianyi; bualu bua dina dianyi didi dinene munkatshi mua ba mu bisamba bia bantu.

Luke 1:54

Wakukuatshisha muntu wandi Isalele

Luke 2:32

Munya wamueneka kudi bisamba bia bende Ne butumbi bua Isalele, bantu bebe.