Deuteronome 1:8 - Tshwa Bible

⁸ Langutani, nzi mu nyikile tiko; fambani mu ya teka tiko lego Jehova a hlambanyileko ka vararu va nwina, Abrahama, na Isaka, na Jakobe, a ku va nyika gona, ni zizukulwana zabye anzhako ka vona. Gen. 12:7; 15:18

Deuteronome 1:8 교차 참조

Genesisi 12:7

Jehova i lo woneka ka Abrama, aku ngalo; Nzi ta nyika ka pswalo wa wena legi tiko. Zonake i lo aka a alati ga Jehova, loyi a nga woneka ka yena laho. Neh. 9:8; Miti. 7:5; Gal. 3:16

Genesisi 15:16

Hi ka xizukulwana xa wumune va ta wuya kambe lomu: hakuva a kuonha ka maAmori lezi a ku se nga tala.

Genesisi 15:18

Lego siku Jehova i lo maha xivumelwano na Abrama, aku: Nzi nyikile ka pswalo wa wena legi tiko, kusukela congweni wa le Gipite kala gi chikela a congweni wa hombe, wona congo wa Eufrate:

Nehemia 9:15

U va nyika zibaba za le tilweni kasi ku miyeta ndlala yabye, u va humesela mati hi lomu ribyeni kasi ku tima tora gabye, u va lelela lezaku va ya fumela a tiko legi u nga gi tlakusela canja ga wena u hlambanya lezaku u ta va nyika gona. Ekso. 16:4; 17:6

Eksodusi 23:31

Nzi ta panza a mbhingano wa wena kusukela Bimbini go Pswhuka kala bimbini ga maFilistia, ni kusukela xiwuleni kala ku chikela congweni; hakuva nzi ta mu hlulela a vaaki va tiko lego; mu ta va hlongola mahlweni ka nwina. Gen. 15:18; 1 Tih. 4:21

Eksodusi 33:1

Zonake Jehova aku ka Mosi: Suka u famba, wena ni vanhu lava u va humesileko le Gipite, uya ka tiko legi nzi hlambanyileko lezaku nzi ta gi nyika ka Abrahama, na Isaka, na Jakobe, na nzi te ngalo: Nzi ta gi nyika ka pswalo wa wena.

Jeremia 32:22

U va nyikile tiko legi u nga gi hlambanya ka vararu vabye lezaku u ta va nyika gona, a tiko gi khulungako a masi ni wulombe;

Ezekieli 47:14

A ziavelo za munwe ni munwani zi ta ringana, hakuva nzi hlambanyile hi ku tlakusa canja ga mina, lezaku nzi ta gi nyika ka vakoko va nwina; makunu gona tiko gi ta maha tshomba ya nwina. Gen. 12:7; 17:8; 26:3; 28:13

Mitsengo 14:23

Hikwalaho lava vanhu cima va nga ta wona a tiko legi nzi hlambanyileko ka vararu vabye lezaku nzi ta va nyika gona. Cima a nga kona ni munwe wa lava va nzi kanyisileko, a ta nga wona tiko lego.

Mitsengo 32:11

Vontlhe a vanhu lava va humileko le Gipite, kusukela ka lava va nga ni 20 wa malembe ni ku hunza, cima va nga ta wona a tiko legi nzi hlambanyileko ka Abrahama, ni ka Isaka, ni ka Jakobe, hakuva a va nzi lanzelangi hi zinene;

Deuteronome 1:11

Jehova Nungungulu wa nwina a mu enzelekise kambe hi ka khume ga mazana, a mu katekisa kota lezi a mu tsumbisileko!

Deuteronome 1:35

Cima ku nga tava kona munhu wa lixaka leli li bihileko, a ta nga wona tiko lego go saseka, legi nzi hlambanyileko ku nyika vararu vabye, sine Kalebi nʼwana Jefuna! Mitse. 14:21; Tis. 95:11

Deuteronome 10:11

Na Jehova i te ngalo ka mina: Suka u famba, u ya rangela a vanhu, va ya enghena va teka a tiko legi nzi nga hlambanya ka vararu vabye ku va nyika.

Deuteronome 11:24

A wutshamu gontlhe legi a mikonzo ya nwina yi ta nga kanzihela, gi tava ga nwina; a mbhingano wa nwina wu ta sukela le xiwuleni kala le Lebanoni, ni ku sukela Congweni, wona congo wa Eufrate, kala le Bimbini ga Mupela-gambo. Ekso. 23:31; Mitse. 34:2; Jox. 1:3

Deuteronome 11:9

kasi ma fela ku anziselwa masiku ya nwina lomu ka misava leyi Jehova a hlambanyileko ka vararu va nwina a ku va nyika vona ni vazukulu vabye, a misava leyi yi khulungako a masi ni wulombe.

Deuteronome 2:29

kota a vanana va ka Esau lava va akileko le Seire, ni va ka Moabi lava va akileko le Ara, va nzi vumeleko kala nzi tlhatuka Jordani nzi enghena ka tiko legi Jehova Nungungulu wa hina a hi nyikileko gona.

Deuteronome 26:15

Cuwuka na u hi kwaleyo tilweni wutshanwini ga wena ga kubasa, u katekisa vanhu va wena va Israeli, ni misava leyi u hi nyikileko yona, yi maha tiko legi gi khulungako masi ni wulombe, khwatsi hi lezi u hlambanyileko ka vararu va hina.

Deuteronome 26:3

U taya ka mupristi loye a ta ngava kona ka lawo masiku, u yaku: Inyamutlha nza ti bika ka Jehova Nungungulu wa wena, lezaku nzi chikele lomu tikweni legi Jehova a hlambanyileko ka vararu va hina ku hi nyika gona.

Deuteronome 28:11

Jehova i ta anzisa nguvu a pswalo wa miri wa wena, ni mihanzu ya zifuyo za wena, ni mihanzu ya masimu ya wena, lomu ka tiko legi Jehova a hlambanyileko ka vararu va wena ku ku nyika gona.

Deuteronome 29:12

Mu yimile laha kasi nwina mu fela ku enghena ka xivumelwano xa Jehova Nungungulu wa nwina, lexi xi tiyiswako hi kuhlambanya, lexi Jehova Nungungulu wa wena a xi mahako zinwe na wena legi siku.

Deuteronome 30:20

u ranza Jehova Nungungulu wa wena, u ingisa a gezu gakwe, u namarela ka yena; hakuva yena mbutomi ga wena ni kuanza ka masiku ya wena, kasi wena wa fela ku tshama ka tiko legi Jehova a hlambanyileko ka vararu va wena, Abrahama, na Isaka, na Jakobe, a ku va nyika gona.

Deuteronome 31:7

Zonake Mosi i lo vitana Joxua mahlweni ka vontlhe va ka Israeli, aku kakwe: Tiya hlana, u nga mbheli ntamu; hakuva hi wena u ta nga enghena ni vanhu lava tikweni legi Jehova a hlambanyileko ka vararu vabye a ku va nyika gona, wena hi wena u ta nga va nyika gona va gi fumela,

Deuteronome 34:4

Jehova i te ngalo kakwe: Legi hi gona tiko nzi gi hlambanyileko ka Abrahama, ni ka Isaka, ni ka Jakobe, nziku: Nzi ta gi nyika ka pswalo wa wena; hikwalaho mina nzi ku kombisile gona kasi u gi wona hi mahlo ya wena, kanilezi u nga ta tlhatukela ka gona. Gen. 12:7

Deuteronome 4:1

Makunu, Israeli, ingisa milayo ni zileletelo lezi nzi mu gonzisako, lezaku mu zi maha, kasi mu fela ku hanya, mu ya enghena mu fumela a tiko legi Jehova Nungungulu wa vararu va nwina a mu nyikako gona.

Deuteronome 6:10

Laha ku ta ngaku Jehova Nungungulu wa wena a ku enghenisile ka tiko legi a hlambanyileko ka vararu va wena, Abrahama, na Isaka, na Jakobe, a ku ku nyika gona (yi nga miti leyi ya hombe, yo saseka, yi nga akwangiko hi wena,

Deuteronome 7:12

Ku taku loku u ingisa zileletelo lezi, ni loku u zi hlayisa ni ku zi maha, Jehova Nungungulu wa wena i ta hlayisa a xivumelwano ni wuxinji, lezi a hlambanyileko ka vararu va wena;

Deuteronome 7:13

na yena i ta ku ranza, a ku katekisa, a ku anzisa; na yena i ta katekisa a pswalo wa rumbu ga wena, ni ku katekisa mihanzu ya masimu ya wena, ni mavele ya wena, ni vinya ga wena, ni mafura ya wena, ni kupswala ka tihomu ta wena ni tiyivu ta wena, ka tiko legi a hlambanyileko ka vararu va wena ku ku nyika gona.

Deuteronome 7:8

kanilezi hi lezi Jehova a mu ranzako, ni lezaku a hlayisa xifungo xakwe lexi a hlambanyileko ka vararu va nwina; hi kota ya lezo Jehova i mu humesile hi canja ga ntamu, ni ku mu tlhatlhisa lomu ndlwini ya wukhumbi, lomu mandleni ya Faro a hosi ya le Gipite.

Deuteronome 8:1

Mu ta hlayisa milayo yontlhe leyi nzi mu leletelako nyamutlha, kasi mu fela ku hanya hi ku anza, mu enghena kuya fumela a tiko legi Jehova a hlambanyileko ka vararu va nwina.

Deuteronome 9:5

A ku engheni ku ti tekela a tiko gabye hi kota ya kululama ka wena ni wunene ga mbilu ya wena, kanilezi Jehova Nungungulu wa nwina i hlongola matiko lawa mahlweni ka wena hi kota ya kubiha ka wona, ni lezaku a fela ku tiyisa a gezu legi Jehova a hlambanyileko ka vararu va wena, Abrahama na Isaka na Jakobe.

Maheberu 6:13

Hakuva laha Nungungulu a nga tsumbisa ka Abrahama, i lo hlambanya hi wutsumbu gakwe, kota lezi ku nga hi hava a wahombe ku hunza yena wa ku hlambanya ha yena.

Maheberu 6:14

I te ngalo: Hakunene nzi ta ku katekisa nguvu, nzi anzisa nguvu a pswalo wa wena. Gen. 22:16; Tis. 105:9

Joxua 1:6

Tiyisa mbilu, uva ni ntamu, hakuva hi wena u ta nga avela lava vanhu a tiko legi nzi hlambanyileko ka vararu vabye a ku va nyika gona.

Valamuli 2:1

A ngelosi ya Jehova yi lo suka hi le Gilgale yi kanziha Bokima, yi ta ku ngalo: Nzi mu humesile le Gipite, nzi mu tisa ka tiko legi nzi hlambanyileko ku gi nyika ka vararu va nwina, nziku: Cima nzi nga ta tshova xivumelwano xa mina na nwina. Gen. 15:18; Deut. 29:14