Suro 20:28 - Sura Malelaha

²⁸ Maroa-roakau datikau madosa, hai nikadipura maroa ope-ope jumaa au napoinalaiakau Inao Malelaha. Hangangaa nikadipurahe, nodo hadua toporewu mamporewu dimbana, lawi Anana Pue Ala mate mobaiari huku dosanda bona mewalihe taunana Pue Ala.

Suro 20:28 교차 참조

1 Timotiu 4:16

Poantimu hangangaa nukampai, hai paturomu hangangaa manoto. Nupobago liliu ope-ope iti bona molambiko katehorema, hihimbela hai tauna au mampehadingi paturomu.

1 Timotiu 3:2

Ido hai hadua penatua hangangaa au bara ara kamasalana. Hangangaa hadua pea towawinena, hai hangangaa nabuku morempeki peundeana laluna au kadake. Hangangaa manoto laluna hai maroa adana. Hangangaa matana modoko torarena. Hangangaa naisa mepaturo.

Suro 13:2

Hambela tempo, tanganda menomba i Pue hai mopuasa, Inao Malelaha mouliangaahe, “Kupileihe Baranaba hai Saulu mewali topobagoNgku. Nipopeangka maroahe bona laohe mampopolumao bago au Kupahaleangiahe.”

Ibarani 13:17

Nipeulaimi hawanda tadulakomi hai mengkorukau irihira. Lawi ihira au mokadipura katuwomi, hai au hangangaa mohanaihe Pue Ala kana i pobagonda. Nipeulai hawanda bona matanahe mobago. Ane bara nipeulai hawanda, ina masusa lalunda, hai ane nodo barapi ina ara pobunduana irikamu.

1 Timotiu 5:17

Penatua au maroa pobagonda, hintoto mpuuhe rawei peadai au rombela hangko i tauna ntanina, pelumbunami penatua au mepaturo hai au mopahawe Ngkorana Pue.

1 Korintu 10:32

Ineeke mobabehi apa pea au mopakanawo ranganta, maroa to Yahudi ba tauna au barahe to Yahudi ba halalunta hampepepoinalai au mengkoru i Pue Ala.

Pilipi 1:1

Sura ide hangko irikami Paulu hai Timotiu, hawina Kerisitu Yesu, kipakatuakau halalungki hampepepoinalai i lalu Kerisitu Yesu i wanua Pilipi, hai tauna au mampopolumao bagona Pue i olomi, maroa penatua, maroa diaken.

Epesu 1:7

Hai wahena Pue Yesu au mabubu i kapateNa, tehompokimoke hangko i huku dosanta, lempona naampungimi Pue Ala hinangka dosanta, hangko i kabulana laluNa au mahile.

Lukasi 12:32

“Ikamu au meula Iriko, ineekau langa, nauri barakau bosa. Lawi hangko i kabulana laluna Pue Ala Umami, mopileikau molambi katuwo maroa i lalu poparentaNa.

1 Timotiu 3:5

Lawi ane ara hadua tauna au bara naisa mokadipura tauna i lalu souna, noumbami kanabukuna mokadipura halaluna hampepepoinalai.

Pampetudungia 5:9

Monani-nanimohe hambua nani au wou, rauli: “Oiomi au hintoto modoko sura iti hai mobungkahi penena lawi rapapatemoKo; Hai waheMu au mabubu i kapateMu, Nupopoholomohe tauna i humalele dunia, i ope-ope kadatua, i ope-ope pemulea hai i hinangka basa. Hai Nuhuhuhe i Pue Ala.

1 Timotiu 4:14

Ineeko mokabaha bagomu au hangangaa nupopolumao moula kapande au naweiko Inao Malelaha. Kapande iti raweiko i temponda penatua moona taienda hangkoia i tanoanamu mopahawe lolita hangko i Pue Ala kana irio.

Epesu 1:14

Inao Malelaha itimi au mopakaroho dandiNa irikita bona manoto kaina Naweinta ope-ope sosora au Nadandiake, iami Nakabahake hangko i huku dosanta hai Napopewalike taunaNa. Ido hai hintoto mpuuke motoia hai mampomahile Pue Ala.

Galatia 1:13

Niisa, halalu, lolitakana katuwongku hangkoia i poulangku agama Yahudi. Bosa mpuuhe rangangku au moula agama Yahudi, agaiana ikomi au melumbu peulangku i ope-ope atura agama, lawi hangko i lalungku mpuu moulana adanda toiorungki. Hai i tempo iti, kupari-pari mampopeahi-ahihe ope-ope to Sarani, lawi kupeinaohe kupatuna.

Suro 20:29

Kuisa mpuu halalu, ane paduna hangko inde, batena ina hawehe tauna au kadake au mampopeahi-ahi tauna au niporewu iti, nodohe serigala mampopeahi-ahi dimba.

Suro 20:17

Hangko i Miletus, Paulu mopakatu bambari lao i Epesu bona penatua au ara inditi maihe mampohidupaa.

Suro 14:23

I polumaonda iti, Paulu hai Baranaba mopilei hai moangkahe penatua i boea-boeana. Mopuasa hai mekakaehe, merapihe bona nakadipurahe Pue lawi Ia pea peharunganda.

1 Peturu 2:25

Hangkoia nodokau dimba au puha. Agaiana ide-ide mesulemokau i hadua Toporewu au mokadipura tuwomi hai pepoinalaimi.

1 Peturu 2:9

Agaiana ikamu, halalu, napileimokau Pue Ala au mampopewalikau nodo tadulako mpenomba au mampopolumao bago mpenomba i Datunta. Napatanikau mewali kiraNa hai taunaNa au malelaha. Pue Ala mopileikau hai mokakiokau hangko i kamakaindi mesua i lalu kamabaaNa au merae ntepuu bona mopahawekau bagoNa au maroa i ope-ope tauna.

Kolose 4:17

Nipahawe i Arkipus bona hangko i laluna mampopolumao bago au nawei Pue!

Epesu 4:11

Iami au mokira-kira pewati i ope-ope tauna au mepoinalai Iria: arahe au Napopewali suroNa, arahe au Napopewali nabi mopahawe lolitaNa, hai ara worihe au Napopewali topobambari Ngkora Marasa, guru jumaa, hai guru agama.

1 Korintu 15:9

Lawi ide iko, suro au tepakoi tuwongku hangko i ope-ope surona Pue Yesu. Katouana, barana hintoto rauli suro, lawi hangkoia mampopeahi-ahina tauna au mepoinalaihe i Pue Yesu.

Lukasi 21:34

“Mainga-ingakau, datikau mosusa-susa hai malangu-langu liliu. Mainga-ingakau datikau mampepekiri liliu katuwomi i dunia ide, alana mampomaleakau. Lawi alo kahaweNgku hule unga pea ina morumpa ope-ope tauna i dunia. KahaweNgku hule iti peisa rapandiri nodo tilobu au mopakanawo tauna au mampomalea.

1 Yohane 1:7

Agaiana ane tuwoke i lalu kamabaa, nodo Pue Ala ara i lalu kamabaa, batenta mohintuwu hadua hai hadua, hai wahena Pue Yesu, Anana Pue Ala, ina mobahoike hangko i dosanta.

Ibarani 12:15

Mainga-ingakau dati ara rangami au mousuli hangko i Pue Ala hai mosapuaka ahiNa. Maroa-roakau datihe ara tauna au hawe mewali rasu i olomi, hai kahopoana mopakarugi pohintuwumi alana bosa tauna teanti i lalu dosa.

Titu 1:7

Tauna au mewali penatua, ihirami au mokadipura bagona Pue Ala. Ido hai hangangaa nuangka tauna au bara ara au peisa rasalaia, au bara mampemahile ba au masodo, au bara malangu-langu ba topombetie ba au mohaoki pea doi.

Kolose 1:14

AnaNa iti au mewali pahuruna watanta bona teampungi dosanta.

1 Korintu 11:22

Barakau pae mosou? Agina maande hai maenu amimokau i soumi moula peundeami. Moapari hai nibabehi nodo i poteruhuami? Niunderi pae mopapakoi hangka rangami au mewali kirana Pue Ala? Nipeinao pae mopakaeahe halalumi au meahi-ahi tuwonda? Apa au hangangaa kuuliangaakau? Ba kutoiakau? Bara! I babehiami iti barakau kutoia.

Markus 13:9

Agaiana ikamu, mainga-ingakau! Lawi ikamu ina rahaka hai raanti lao i topebotusi agama Yahudi. Ina rapopeahi-ahikau i lalu sou penombaa. Anti peulami Iriko, ina rahuhukau i gubernur hai i datu. Indo, ina raweikau tempo mopahawe kana i pepoinalaimi Iriko.

Matiu 16:18

Mewali, ido hai rahangako Peturu, lempona ‘watu’. Hai i wongko watu ide, Kuaro souNgku lempona, Kugulu ope-ope tauna au mampoinalaiNa. Ope-ope kuasa tokadake bara peisa monangihe.

Matiu 2:6

‘Boea Beteleme i tampo Yudea, barako boea au tepakokoi. Ina mahile hangamu hangko i ope-ope boea i tampo Yudea. Lawi hangko irio ina mesupa hadua Tadulako Mahile; batena Ia au motadulakoi taunaNgku to Isaraeli.’ ”

Roma 16:16

Mombetabe-tabekau hangko i lalumi mpuu ane mombelambikau hai hangka to Saranimi. Ope-ope jumaa inde mopakatuhe tabeanda irikamu, halalu.

1 Korintu 6:20

Lawi ikita ide naholomoke Pue Ala hai pirimoke Nabaiari. Ido hai watanta ide hangangaa tapake mobila Pue Ala.

1 Timotiu 3:1

Tou mpuu lolita au manguli node: tauna au mampeinaohe mewali penatua, mohaokihe bago au maroa.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.