I tempo iti, matanami Yesu i lalu Inao Malelaha, hai hangko i kamatanana laluNa, Nauli, “O Uma, Ampu langi hai tampo! KutoiaKo, lawi ope-ope au tewuniangi hangkoia Nupopaisaamohe tauna au i woi tuwonda, agaiana Nuwuniangiahe tauna au mapangka posikolanda hai tauna au mapande. Lawi nodomi peundeaMu, Uma.”
Laona i Yerusale lawi Napatongawami Pue Ala iriko hangangaa laona. Kahawengku i Yerusale, kupombelambiamohe penatua hai mogombongkai. Kupahaweamohe kana i pobambaringku Ngkora Marasa i tauna au barahe to Yahudi. Kupahaweahe lawi kupokalanga: paturongku ina rasalai duuna barapi ara bunduna pobagongku mopaturo tauna kana i Ngkora Marasa, maroa au roomi kupobago, maroa au tangana mani kupobago.
Nahoremamoke Pue Ala hangko i huku dosanta moula kabulaNa laluNa, anti pepoinalainta i Yesu Kerisitu. Barake Nahorema anti babehianta au maroa, batena pea anti kabulana laluNa irikita. Ido hai bara ara hadua au peisa manguli: “Anti kamaroana babehiangku, ido hai nahoremana Pue Ala hangko i huku dosangku.”