Roma 8:28 - Sura Malelaha

²⁸ Taisami ide-ide Pue Ala mobago wori i paka-pakana bona mopaara roa ngkatuwo i ope-ope tauna au mampokaahi Pue Ala, iami i tauna au Nakakio hintoto hai tunggaiaNa.

Roma 8:28 교차 참조

1 Peturu 5:10

Hai ane liumi kapari au hampalai iti, Pue Ala ina mopahandai apa au makura irikamu. Lempona, Ia ina mopakaroho pepoinalaimi, mopamanoto tuwomi hai mopatetida lalumi. Lawi Pue Ala iami pongkana ope-ope ahi. Ia mokakiokau mewali anaNa bona anti pohintuwumi hai Kerisitu, ina molambikau kirami i lalu kamahilena tuwoNa au bara mokahopoa.

Yakobu 1:12

Morasihe tauna au mantaha i lalu kapari hai pampetandaka. Lawi ane pepoinalainda mantaha i pampetandaka iti, ina molambihe katuwo au bara mokahopoa au nadandimi Pue Ala i tauna au maahi Iria.

1 Korintu 2:9

Agaiana ara teuki i lalu Sura Malelaha node: “I tauna au mampokaahi Pue Ala, Napasilolongaamohe au maroa mpuu, au bara mani raita ba rahadi tauna, hai au bara mani hambela mesupa i pekiri manusia.”

Roma 8:30

Mewali ikita au Napileimoke Pue Ala hangko i nguru-nguruna, Nakakioke bona mewalike anaNa. Hai ikita au Nakakioke mewali anaNa, Napakanotomoke i peitaNa. Hai au Napakanotomoke i peitaNa, Naweike katuwo mahile i alo au ina mai.

2 Timotiu 1:9

Nahoremamoke Pue Ala hangko i dosanta hai Nakakiomoke mewali taunaNa au malelaha. Barake Nahorema hai Nakakio anti kamaroana babehianta. Agaiana iti Nababehi anti kabulana laluNa moula tunggaiaNa. Lawi hangko damani dunia ide rapopewali, arami tunggaiana Pue Ala mopahintuwuke hai Kerisitu Yesu anti kabulana laluNa.

1 Korintu 1:9

Pue Ala mokakiokau bona mohintuwukau hai AnaNa, Yesu Kerisitu Amputa, hai Ia mopabukei liliu dandiNa irikita.

Pampetudungia 3:19

Ope-ope tauna au Kupokaahi, Kupaturo hai Kukambaroa bona moulahe paturoNgku. Ido hai Kuuli, nibaliki lalumi, hai menosokau!

Galatia 1:15

Agaiana anti kabulana laluNa Pue Ala, hangko damanina rapoanaka, Napileimona bona mewalina SuroNa.

1 Tesalonika 5:9

Napileike Pue Ala bona barake rahuku, agaiana Napileike bona molambike katuwo maroa i lalu kaNahoremanta Amputa Yesu Kerisitu.

Markus 12:30

Nipokaahi Pue Ala, Ampumi, i sukana kabulana lalumi, i sukana pekirimi, i sukana kapandemi, hai i sukana rohomi.’ Itimi parenta au kaisa.

Epesu 3:11

Pue Ala mobabehi ope-ope iti moula tunggaiaNa au Napakanotomi hangko damani dunia rapopewali, hai tunggaiaNa iti Napopewali i lalu watana Kerisitu Yesu Amputa.

Yakobu 2:5

Halalungku au kupokaahi! Nipehadingi maroa: tauna au meahi-ahi tuwonda i dunia ide napileihe Pue Ala bona mewalihe pebuku i pepoinalainda. Ina molambi sosoranda i lalu poparentaNa moula dandina Pue Ala i tauna au maahi Iria.

1 Yohane 4:19

Mampokaahike Pue Ala hai halalunta, lawi Pue Ala iorumi mampokaahike.

2 Timotiu 2:19

Nauri nodo, Ngkorana Pue Ala batena maroho peangkana. Ngkorana Pue Ala rapandiri nodo haogu watu au bara ina tedua. I lalu Ngkorana Pue Ala teuki node, “Pue moisa hema au Napilei mewali anaNa,” hai, “Hema-hema au mopangaku kaYesuna Ampunda, hangangaa mokabahahe babehianda au kadake.”

1 Yohane 4:10

Idemi au rauli ahi: bara ikita au nguru-nguruna mampokaahi Pue Ala, agaiana Pue Alari au nguru-nguruna mampokaahike, ido hai motudu mai AnaNa mewali pahuruna watanta bona teampungi dosanta.

Roma 9:11

Hangko damanihe rodua anangkoi iti mesupa hai raisa mobabehi apa pea au maroa ba au kadake, Napileimohe Pue Ala dati rauli Napileihe anti babehianda agaiana Napileihe moula peundeaNa haduduaNa.

2 Korintu 5:1

Lawi taisa, ane bambaruta i dunia ide ragero, Pue Ala ina mopasilolonga haogu sou i suruga au tapaidai, hambua paidaa au bara mokahopoa, au bara nababehi tauna.

Galatia 5:8

Manotomi, halalu, paturonda iti bara hangko i Pue Ala au mokakioke mewali taunaNa.

Suro 13:48

Karahadina tauna au barahe to Yahudi lolitana iti, matana mpuumohe hai motoiahe Ngkorana Pue. Hai hema pea au Napileimi Pue Ala molambi katuwo maroa au bara mokahopoa, hai mepoinalaimohe i Pue Yesu.

Roma 11:29

Lawi ane Pue Ala mopilei hai mowati tauna, pewatiNa iti bara ina Nadii hule.

1 Korintu 1:24

Agaiana i tauna au nakakiomohe Pue Ala, maroa to Yahudi ba au bara to Yahudi, bambari iti, naporara Kerisitu mopatongawa kuasaNa hai kapandena Pue Ala.

Galatia 1:6

Kupotingkara mpuu halalu! Bara manikau mahae nakakio Pue Ala anti kabulana laluna Kerisitu bona mampoinalaikau Ngkora Marasa. Agaiana ide-ide barapokau mengkoru i Pue Ala, moularikau paturo au ntanina.

Epesu 4:1

Halalu, nihadimi ope-ope paturongku. Ide iko, au ratarunggu anti pobagongku i Pue Ala, kuperapi mpuu irikamu bona mobabehikau apa au hintoto rababehi anana Pue Ala, lawi Nakakiomokau mewali anaNa.

Pilipi 3:14

Iko nodona hadua tauna au momberiri melangka: barapi kupembalilingi apa au i taleungku, melangka liliuna monontohi au kutunggai. Kupari-pari moula peundeana Pue Ala bona molambina parasee penangi au naweina Pue Ala i suruga, ido hai pane Nakakiona mohintuwu hai Kerisitu Yesu.

Ibarani 9:15

Anti popenombaNa au bara ara kamakuraNa, Kerisitu mewali Nente au mopahawe podandi au wou, au mopahintuwu manusia hai Pue Ala. Iti Nababehi bona ope-ope tauna au nakakio Pue Ala molambi pewati au bara mokahopoa moula apa au nadandiahe Pue Ala i anaNa. Lawi i tempona mani ara podandi au nguru-nguruna au napahawe Musa, manusia moliungi Aturana Pue Ala. Ido hai Kerisitu mate mohompo peliunginda iti.

1 Peturu 2:9

Agaiana ikamu, halalu, napileimokau Pue Ala au mampopewalikau nodo tadulako mpenomba au mampopolumao bago mpenomba i Datunta. Napatanikau mewali kiraNa hai taunaNa au malelaha. Pue Ala mopileikau hai mokakiokau hangko i kamakaindi mesua i lalu kamabaaNa au merae ntepuu bona mopahawekau bagoNa au maroa i ope-ope tauna.

1 Peturu 3:9

Ane ara tauna au mobabehi dake irikamu, inee nihurungi. Ane rakakabosaikau, inee worihe nikakabosai. Agina babehianda au kadake iti nihurungi hai pekakae au mamperapiahe pewati hangko i Pue Ala. Lawi Pue Ala mokakiokau mewali taunaNa bona molambikau pewati hangko Iria.