Roma 5:15 - Sura Malelaha

¹⁵ Agaiana kabulana laluna Pue Ala irikita melumbu kamahilena hangko peliungina Adama. Anti peliungina Adama, ope-ope tauna batenda mate. Agaiana melumbu mpuu kabulana laluna Pue Ala au Nawei mberoke melempo i hadua tauna, iami Yesu Kerisitu.

Roma 5:15 교차 참조

Roma 6:23

Hema au mobabehi dosa batena molambi hurungina, hai hurungina iti iami kapate au mogaakike hangko i Pue Ala. Agaiana anti kabulana laluna Pue Ala irikita, ido hai Naweike katuwo maroa au bara mokahopoa. Kabulana laluNa iti tahumba anti pohintuwuta hai Kerisitu Yesu, Amputa.

Epesu 2:8

Nahoremamoke Pue Ala hangko i huku dosanta moula kabulaNa laluNa, anti pepoinalainta i Yesu Kerisitu. Barake Nahorema anti babehianta au maroa, batena pea anti kabulana laluNa irikita. Ido hai bara ara hadua au peisa manguli: “Anti kamaroana babehiangku, ido hai nahoremana Pue Ala hangko i huku dosangku.”

Roma 5:12

Dosa mesua i lalu dunia melempo i hadua tauna au moliungi hawana Pue Ala. Dosa iti mopaara kapate i lalu dunia, alana kapate morumpa ope-ope tauna, lawi ope-ope tauna madosami.

1 Yohane 5:11

Idemi posabina Pue Ala: Ia moweimoke katuwo maroa au bara mokahopoa, hai katuwo iti talambi anti pohintuwuta hai AnaNa.

2 Korintu 9:15

Tauli ngkaia kamaroana i Pue Ala, lawi mahile mpuu kabulana laluNa irikita, melumbu hangko i apa au peisa tapololita!

1 Yohane 2:2

Hai Iami au mate mewali pahuruna watanta bona Pue Ala moampungi dosanta. Hai bara pea dosanta au Nahuru, agaiana dosanda wori tauna i humalele dunia.

Ibarani 2:9

Agaiana ide-ide tongawami kamakuasana Yesu. I katuwoNa au hampalai i dunia ide, kamahilena tuwoNa tepaiwoi hangko i malaeka. Lawi anti kabulana laluna Pue Ala irikita, Napakanoto bona Yesu rapapate mopahuru ope-ope tauna. Hai anti pohuhuNa wataNa rapapate, ide-ide Ia rapomahile hai raweimi pohudaa au meawa hai tebila.

Yohane 4:10

Nauli Yesu, “Ane kenuisa kamahilena pewatina Pue Ala hai hemaNa au merapi owai ide, kemerapi woriko owai Iriko, hai Kuweiko owai au mepatuwo.”

Yohane 3:16

Anti kamahilena ahina Pue Ala i ope-ope tauna i dunia, ido hai Nakirami AnaNa au HaduduaNa bona hema pea au mepoinalai Iria, bara rahuku, agaiana molambi katuwo maroa au bara mokahopoa.

Matiu 26:28

Lawi idemi waheNgku au tebumbuha i kapateNgku. WaheNgku ide mopakaroho dandina Pue Ala au mopahintuwu Pue Ala hai manusia bona teampungi dosanda.

Matiu 20:28

Hangangaa nipeulai poantiKu, Iko Ana Manusia. Lawi tunggaiaKu mai i dunia ide, baraNa mai mewali topohawa. Agaiana kamaiNgku i dunia ide bona mewaliNa hawi, hai bona mohuhuna wataNgku rapapate mohuru salanda tauna bosa.”

Suro 15:11

Tapoinalai molambike katuwo maroa bara anti pampeulainta parenta hai palia au nodo, agaiana anti kabulana laluna Pue Yesu. Nodo wori ihira.”

2 Korintu 5:14

Anti kamaahina Kerisitu irikami, ido hai kipari-pari mampopolumao bagongki mopahawe Ngkora Marasa. Lawi kiisa, Kerisitu mate mohuru dosa ope-ope tauna, iti lempona mate hahamoke.