Roma 2:1 - Sura Malelaha

¹ Ido hai halalu, hema-hema pea bara ara rarana mosalai rangana. Hema au mosalai rangana himbela pea mosalai watana haduduana, lawi apa au nasalaiaa rangana nababehito wori.

Roma 2:1 교차 참조

Lukasi 6:37

“Ineekau mosalai hangka rangami dati worikau nasalai Pue Ala. Inee niuli tauna ntanina au masala hangangaa rahuku, hai ikamu bara worikau ina nahuku Pue Ala. Niampungi kamasalana rangami, bona naampungi worikau Pue Ala.

Roma 2:3

Hai ane mobabehito worikau babehia au nisalaiahe rangami, inee nipehangu barakau nahuku Pue Ala.

Roma 9:20

Inee tauli nodo, halalu! Hemake pae manusia hai pebaike mosalai Pue Ala? Hintoto pae ane haogu kori mouliangaa topobabehi, “Moapari hai nubabehina node?”

Yakobu 4:11

Halalu, ineekau mombepakadake. Ane ara hadua tauna au mopakadake rangana ba mopakisala halaluna, lempona mopakadake hai mopakisala wori Aturana Pue Ala. Tauna au mopakadake halaluna, bara moula Aturana Pue. Anti babehiana au sala iti, ia peisa rapandiri nodo hadua topobotusi au mosalai Aturana Pue Ala.

Yakobu 2:20

Ntuli mpuukau? Ba niuli handami pepoinalaimi i Pue Ala nauri bara ara babehiami au maroa? Ane nodo pepoinalaimi, bara ara pobunduana!

Lukasi 19:22

Nauli datu iria, ‘Oio hawi au kadake! Ina kuhukuko hintoto hai lolitamu haduduamu. Nuisato iko tauna maseke au mampopobago mantimi hawingku, kutuduhe mehua hai mantuda bona iriko haha wuana.

1 Korintu 7:16

Lawi ane barakau mepogaaki, ikamu towawine, ara mani katepakami moanti tobalilomi mepoinalai i Pue. Hai nodo wori ikamu tobalilo, ara mani katepakami moanti towawinemi mepoinalai i Pue.

Lukasi 12:14

Nahanai Yesu, “Halalu, hema au moangkaNa mewali topetanga-tangaimi au mampokiraakau sosoranda tosaemi?”

Roma 2:2

Taisa ane Pue Ala mohuku tauna au mobabehi dake, pebotusina batena manoto.

Roma 3:9

Mewali, node: ikita to Yahudi, bara meliu kamaroanta hangko i tauna ntanina. Lawi nodo au kuuli inona, ope-ope tauna batena masala, lawi ikita ope-ope madosamoke, maroa to Yahudi maroa tauna ntanina.

Roma 14:22

Ane nupoinalai kadamu masala mobabehi babehia iti, pelambiamu iti hangangaa nukingki pea i lalumu haduduamu i lindona Pue Ala. Morasimi tauna au mobabehi apa au maroa moula pelambiana, hai barahe mosalai watana.

1 Korintu 4:5

Ido hai kuuli, ineekau mosalai pobagonda hangka rangami. Nipegiami kahawena hule Pue. Iami au ina mobungkahi ope-ope au tewuniangi mani i lalu kamakaindi. Ia au ina mopatongawa ope-ope tunggaianda tauna au tewuniangi mani. I tempo itimi, hadua-hadua tauna ina molambi petoia hangko i Pue Ala moula kahintotoana.