Pilipi 2:8 - Sura Malelaha

⁸ I tempona tuwo mewali manusia i wongko dunia ide, ia mengkaiwoi hai moula hawana Pue Ala, duuna mate rapaku i kau mombehape hihimbela hai tauna au kadake.

Pilipi 2:8 교차 참조

Yohane 10:18

Bara ara hadua au mopapateNa ane bara peundeaKu. MokiraNa wataNgku moula peundeaKu haduduaNgku. MakuasaNa mokira wataNgku bona rapapate, hai makuasa woriNa tuwo hule. Itimi hawana UmaNgku au Kutarima hangko Iria.”

Ibarani 12:2

Hangangaa mokamatake Yesu au mobungkahimi rara pepoinalainta hai au mopahandai pepoinalainta. Lawi Ia mantaha liliu i lalu kapari duuna mate i kau mombehape. KapateNa iti mepakaea ntepuu. Agaiana nauri nodo, bara Napailalu, Nahuhu pea wataNa rapaku i kau mombehape, lawi Napeinao molambi katana i bokona. Ide-ide mohudami ntanda i koanana kadera kadatuana Pue Ala i suruga.

Roma 5:19

Anti kadana mengkoru Adama i Pue Ala, alana ope-ope tauna madosa hahami. Nodo wori, anti pengkoruna Yesu i Pue Ala duuna mate i kau mombehape, ope-ope tauna peisami mewali manoto i peitana Pue Ala.

1 Peturu 2:24

Yesu haduduana mohalea huku dosanta i karapapateNa i kau mombehape bona tekabahake hangko i kuasa dosa hai tuwoke moula peundeana Pue Ala. KapateNa iti moanti katuwo maroa irikita.

1 Peturu 3:18

Lawi ara wori hadua au molambi kapari, iami Kerisitu. Ia hambela pea mokira wataNa rapapate bona mohalea dosa manusia. Ia au bara ara salaNa mopahuruke au masala bona moantike i Pue Ala. Ia rapapate, agaiana rapatuwo hule anti kuasana Inao Malelaha.

2 Korintu 8:9

Barakau kuparentai halalu, lawi niisa mpuu kamahilena ahina Amputa Yesu Kerisitu irikita. Ia pebuku, agaiana anti kamahilena ahiNa irikita, Ia mewali nodo hadua tauna au meahi-ahi tuwona bona anti katuwoNa au meahi-ahi, ikita peisa mewali pebuku. Ia mopaiwoi tuwoNa mewali manusia bona ikita peisa molambi katuwo maroa.

Matiu 26:39

Roo indo, lao karao haodi, molingkudumi motumpa mekakae, Nauli, “UmaNgku, ane peisa, Nupakaraoa wongkoia kapari au ina morumpaNa ide. Agaiana bara peundeaKu au Kuula; peundeaMuri, Uma.”

Suro 8:33

Ia rakakabosai hai rahuku; bara hintoto karahukuNa. Bara ara hadua tauna au peisa mololita kana i pemuleaNa, lawi Ia rapapate.”

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Galatia 3:13

Ikita ope-ope hintoto napaharara Pue Ala, lawi moliungike Aturana Musa. Agaiana nauri nodo, Nakabahamoke Kerisitu hangko i pepaharara iti. Teuki i lalu Sura Malelaha hangkoia node: “Ane ara tauna au rapapate i kau mombehape, manoto tauna iti harara i Pue Ala.” Mewali, kapatena Kerisitu i kau mombehape, mopahuruke molambi pepaharara hangko i Pue Ala au katouana hangangaa morumpake.

Yohane 14:31

Agaiana hinangkana ide hangangaa mewali bona ope-ope tauna ina moisa kaKupokaahina UmaNgku hai kaKupeulaina liliu ope-ope au NahawaaNa. Maimokau, padumoke hangko inde.”

Yohane 15:10

Iko mampeulaiNa hawana UmaNgku hai tuwo liliuna i lalu ahiNa. Nodo wori, ane nipeulai hawaNgku, ina tuwo liliukau i lalu ahiNgku.

Matiu 26:42

Hangko inditi, lao mbulimi mekakae haduduana, Nauli, “UmaNgku, ane kapari ide bara peisa rapakarao hangko Iriko, batena peundeaMuri au mewali.”

Matiu 17:2

Temponda ara inditi, mobalimi lenggena Yesu. LindoNa mewangka nodo alo, hai hampiNa mengkila-ngkila.

Yohane 4:34

Ido hai nauliangaahe Yesu, “PaandeKu, iami mampeulaiNa peundeana Pue Ala au motuduNa, hai moparooNa bago au NaweiNa.

Lukasi 9:29

Tangana Yesu mekakae, tebalikimi lindoNa, hai hampiNa mengkila-ngkila.

Ibarani 12:4

Lawi ikamu raewa worikau tauna au kadake, agaiana i lalu pombealami moewa dosa, bara manikau rapapate nodo Yesu.