Matiu 20:28 - Sura Malelaha

²⁸ Hangangaa nipeulai poantiKu, Iko Ana Manusia. Lawi tunggaiaKu mai i dunia ide, baraNa mai mewali topohawa. Agaiana kamaiNgku i dunia ide bona mewaliNa hawi, hai bona mohuhuna wataNgku rapapate mohuru salanda tauna bosa.”

Matiu 20:28 교차 참조

Ibarani 9:28

Nodo wori, Kerisitu hambela pea mohuhu wataNa i Pue Ala mohalea dosa tauna bosa. Hai hambela tempo, Ia ina mai i karombelana i dunia ide. Kamaina iti, barapi mai mohalea dosanta. Agaiana mairi moanti katehorema i tauna au mampepegia kahaweNa.

Lukasi 22:27

Mewali, hemami au tepamahilea tuwona: tauna au mohuda maande, ba tauna au merora? Taisami: i dunia ide, au mahile tuwona iami au mohuda maande iti. Agaiana irikita bara nodo, lawi Iko au mororakau nodo hadua hawi.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

1 Peturu 3:18

Lawi ara wori hadua au molambi kapari, iami Kerisitu. Ia hambela pea mokira wataNa rapapate bona mohalea dosa manusia. Ia au bara ara salaNa mopahuruke au masala bona moantike i Pue Ala. Ia rapapate, agaiana rapatuwo hule anti kuasana Inao Malelaha.

1 Timotiu 2:6

Ia mohuhu wataNa rapapate mohuru dosa ope-ope tauna. Iti Nababehi i tempo au napakanoto Pue Ala bona tongawa irikita peundeaNa mohorema ope-ope tauna hangko i huku dosa.

Pampetudungia 1:5

hai hangko i Yesu Kerisitu, Sabi au manoto. Iami au nguru-nguruna tuwo hule hangko i kapate hai au makuasa moparenta ope-ope datu i dunia. Yesu mampokakaiake, hai Ia mokira wataNa rapapate bona tekabahake hangko i huku dosanta,

2 Korintu 8:9

Barakau kuparentai halalu, lawi niisa mpuu kamahilena ahina Amputa Yesu Kerisitu irikita. Ia pebuku, agaiana anti kamahilena ahiNa irikita, Ia mewali nodo hadua tauna au meahi-ahi tuwona bona anti katuwoNa au meahi-ahi, ikita peisa mewali pebuku. Ia mopaiwoi tuwoNa mewali manusia bona ikita peisa molambi katuwo maroa.

Ibarani 5:8

Nauri Ia Anana Pue Ala, Ia molambi wori kapari, hai i lalu kapari iti, Ia mampegurui noumba rara mengkoru i Pue Ala.

1 Peturu 2:24

Yesu haduduana mohalea huku dosanta i karapapateNa i kau mombehape bona tekabahake hangko i kuasa dosa hai tuwoke moula peundeana Pue Ala. KapateNa iti moanti katuwo maroa irikita.

Epesu 1:7

Hai wahena Pue Yesu au mabubu i kapateNa, tehompokimoke hangko i huku dosanta, lempona naampungimi Pue Ala hinangka dosanta, hangko i kabulana laluNa au mahile.

Markus 14:24

hai Nauliangaahe, “Anggoro ide kamba waheNgku au mabubu i kapateNgku mohuru salanda tauna bosa. WaheNgku iti morohongi dandina Pue Ala au mopahintuwu Pue Ala hai manusia.

Matiu 26:28

Lawi idemi waheNgku au tebumbuha i kapateNgku. WaheNgku ide mopakaroho dandina Pue Ala au mopahintuwu Pue Ala hai manusia bona teampungi dosanda.

Epesu 5:2

I babehianta alo-alona, hangangaa maahike i ranganta, nodo Kerisitu maahimi Irikita. Anti kamaahiNa irikita, Ia mokira wataNa rapapate mopahuruke. Babehia iti mopakatana laluna Pue Ala, nodo popenomba mawongi au rahuhu Iria.

Galatia 3:13

Ikita ope-ope hintoto napaharara Pue Ala, lawi moliungike Aturana Musa. Agaiana nauri nodo, Nakabahamoke Kerisitu hangko i pepaharara iti. Teuki i lalu Sura Malelaha hangkoia node: “Ane ara tauna au rapapate i kau mombehape, manoto tauna iti harara i Pue Ala.” Mewali, kapatena Kerisitu i kau mombehape, mopahuruke molambi pepaharara hangko i Pue Ala au katouana hangangaa morumpake.

Roma 4:25

Yesu itimi au mokira wataNa rapapate mohuru salanta. Hai roo indo, Pue Ala mopatuwo hule Yesu bona mewalike manoto i peitaNa.

1 Yohane 2:2

Hai Iami au mate mewali pahuruna watanta bona Pue Ala moampungi dosanta. Hai bara pea dosanta au Nahuru, agaiana dosanda wori tauna i humalele dunia.

Ibarani 2:10

Pue Ala mampopewali hinangkana moula pobotusiNa. TunggaiaNa bona bosa tauna Napopewali anaNa hai Napopeawahe. Ido hai Pue Ala mopakanoto bona Yesu molambi kapari duuna mate. Pobotusina Pue Ala iti hintoto, lawi hangko i kapari au nahumba Yesu, Yesu mewali Topehompo au bara ara kamakuraNa. Ia au mobungkahi rara bona peisake tehorema.

Matiu 8:20

Nahanai Yesu, Nauli, “Serigala ara kalolunda, hai tadasi ara haranda, agaiana Iko, Ana Manusia, bara ara sou au Kupaturui.”

Matiu 20:27

Hai hema au mampeinao mahile hangana hangangaa mewali hampai nodo hadua hawi.

Markus 10:45

Mogalori Iko Ana Manusia, tunggaiaKu mai i dunia, baraNa mai bona mewali topohawa. KamaiNgku ide bona mewaliNa hawi, hai mokiraNa wataNgku rapapate mohuru salanda bosa tauna.”