Markus 12:17 - Sura Malelaha

¹⁷ Nauli Yesu, “Ane nodo, wei Kaisar apa au hintoto rawei Kaisar, hai wei wori Pue Ala apa au hintoto rawei Pue Ala.” Tingkara mpuuhe mohadi pehanaNa.

Markus 12:17 교차 참조

Roma 13:7

Nibaiari ope-ope i tauna apa au hintoto nibaiari. Nibaiari asele ba pobaiari au ntanina i topoparenta. Mengkorukau i tauna au hintoto rapengkorui. Bila tauna au hintoto rabila.

1 Peturu 2:17

Niadaihe ope-ope tauna. Nipokaahi halalumi hampepepoinalai, mengkorukau i Pue Ala, hai nibila datumi.

Roma 6:13

Ineemi tahuhu watanta nakuasai dosa, au moantike mobabehi babehia au kadake. Agina tahuhu katuwonta i Pue Ala, lawi tekabahamoke hangko i katuwonta au hangkoia hai molambimoke katuwo au wou. Hangangaa tahuhu watanta i Pue Ala bona watanta ide tapake mobabehi babehia au manoto.

Roma 12:1

Mewali halalu, anti kamahilena ahina Pue Ala irikita, kuhuweki lalumi bona mohuhukau watami i Pue Ala mewali popenomba au tuwo. Ane nibabehi nodo, lempona malelaha babehiami i lindona Pue Ala, lawi itimi ada mpenomba au mopamatana laluNa.

Matiu 22:46

Bara ara hadua au mohanai. Mepongka i alo iti, barapi ara hadua au bai mekune ba apa-apa i Yesu.

Matiu 22:22

Karahadina pehanaNa, tingkarahe, hai padumohe mopalehi Yesu.

Markus 12:30

Nipokaahi Pue Ala, Ampumi, i sukana kabulana lalumi, i sukana pekirimi, i sukana kapandemi, hai i sukana rohomi.’ Itimi parenta au kaisa.

Matiu 22:33

Karahadina tauna bosa paturona Yesu iti, tingkara mpuuhe.

Matiu 8:10

Tingkarami Yesu mohadi lolitana tadulako surodado iti. Ido hai Napembalilingihe au meula Iria, Nauli, “Mahile mpuu pepoinalaina tauna ide! Kehapiri i to Isaraeli, bara mani ara hadua Kuhumba au mahile pepoinalaina nodo tauna ide au bara to Yahudi.

Matiu 22:21

Rahanai, “Lenggena hai hangana Kaisar.” Nauli Yesu, “Ane nodo, niwei Kaisar apa au hintoto rawei Kaisar, hai niwei Pue Ala apa au hintoto rawei Pue Ala.”

Markus 12:16

Hangko inditi, rahuhua hampeka doi pera. Nadokomi Yesu hai Napekune, “Lenggena hema hai hangana hema au ara i doi ide?” Rahanai, “Lengge hai hangana Kaisar.”

Lukasi 20:25

Nauli Yesu, “Ane nodo, wei Kaisar apa au hintoto rawei Kaisar, hai wei Pue Ala apa au hintoto rawei Pue Ala.”