Lukasi 12:1 - Sura Malelaha

¹ Arahe isabuna tauna au moteruhu mampeinaohe moita Yesu, mombeupi-upihe alana mombepangka-pangkamohe. I tempo iti, Yesu mouliangaahe topeguruNa, “Maroa-roakau i raginda toParisi. Ineekau meguru i toParisi, lawi maroa i raoa peahe agaiana kadake lalunda.

Lukasi 12:1 교차 참조

1 Peturu 2:1

Mewali, halalu, anti kamolambimimi katuwo au wou, hangangaa nikabaha hinangkana babehiami au kadake hai ope-ope lolita au mepakanawo. Ineekau mengka-mengka, ineekau mahina, ineekau mepakadake.

Yakobu 3:17

Agaiana tauna au molambihe kanoto lalu hangko i Pue Ala, node babehianda: malelaha lalunda, raunde mohintuwu hai ranganda, maalusu poantinda, matunduhe hai motulungi peamohe tauna. Maroa babehianda, barahe mampopontani tauna hai poantinda moula kabulana lalunda.

Lukasi 12:56

Mengkamapande mpuukau! Niisa mampekatandai tanda i langi hai i dunia, agaiana bara niisa mampekatandai apa au nababehi Pue Ala i tempo ide.”

1 Korintu 15:3

Ngkora Marasa au kupahaweakau halalu, iami au kudoko wori. Au patoana, Kerisitu mate mohuru dosanta nodo au teuki i lalu Sura Malelaha.

Suro 21:20

Karahadina lolitana Paulu, motoiamohe Pue Ala. Hangko inditi, mopahawehe lolita ide i Paulu, rauli, “Halalu bona nuisa, isabunami halalunta to Yahudi au mepoinalai i Yesu. Hai mampeulai mani worihe Aturana Musa hangko i lalunda.

Lukasi 11:44

Hurewumokau, lawi ikamu nodokau talumba au bara mokatandaa. Talumba iti raihe-iheki tauna, agaiana bara raisa kaarana ngkaia pakana au merikai i laluna. Nodo wori ikamu, maroa i raoa peakau, agaiana kadake lalumi.”

Lukasi 6:17

Roo indo, mempanaulumi Yesu hihimbela hai topeguruNa. Mengkaroomohe i lempena, lawi inditi bosahe tauna au meula Iria mepegia. Inditi ara worihe bosa tauna au hangko i humalele tamponda to Yahudi, hangko i wanua Yerusale hai hangko i wanua Tirus hai Sidon au i wiwi ntahi.

Lukasi 5:15

Agaiana nauri nodo lolitana Yesu, bambari iti tehawuka iumba-umba pea, alanda bosa tauna mai i Yesu bona mohadihe lolitaNa hai Napakaohahe hangko i hakinda.

Lukasi 5:1

Hambela tempo, tangana Yesu meangka i wiwi Rano Genesaret, bosahe tauna mombeupi-upi mampeinao mohadi Ngkorana Pue Ala.

Ibarani 12:22

Halalu, barakau mohungkuki bulu au nodo. Agaiana ide-ide molindomokau Bulu Sion hai wanua Yerusale au i suruga, au napaidai Pue Ala au tuwo. Molindokau isabuna malaeka au moguluhe i lalu katana-tana.