Kolose 3:5 - Sura Malelaha

⁵ Mewali, anti kamatenta hihimbela hai Kerisitu, hangangaa takabaha babehianta hai katuwonta au hangkoia. Ineekau motambi-tambi dele, ineekau mobabehi babehia au merikai. Ineekau mohaoki au kadake, ineekau mampokaelu anu-anuna rangami. Lawi hema au mobabehi iti, himbela hai tauna au menomba i anitu.

Kolose 3:5 교차 참조

Roma 8:13

Ane mampeulai peake peundeana lalunta au kadake, ina mateke. Agaiana ane takabahami babehianta au kadake anti kuasana Inao Malelaha, ina molambike katuwo au bara mokahopoa.

Galatia 5:24

Ane mewalimoke taunana Kerisitu Yesu, barapoke nakuasai peundeana lalunta au kadake lawi peundeana lalunta au kadake iti rapakumi i kau mombehape hihimbela hai Kerisitu.

Roma 6:13

Ineemi tahuhu watanta nakuasai dosa, au moantike mobabehi babehia au kadake. Agina tahuhu katuwonta i Pue Ala, lawi tekabahamoke hangko i katuwonta au hangkoia hai molambimoke katuwo au wou. Hangangaa tahuhu watanta i Pue Ala bona watanta ide tapake mobabehi babehia au manoto.

1 Peturu 2:11

Halalu au kupokaahi! Ikita i lalu dunia ide, nodoke torare ba topolilo, lawi maidake i olonda tauna au barahe mepoinalai i Pue Ala. Ido hai kuweikau lolita: ineekau moula peundeana lalumi au kadake, lawi iti moewa tunggaiami mengkoru i Pue Ala.

1 Korintu 6:18

Nipakarao watami hangko i babehia au sala iti. Lawi ope-ope dosa au rababehi mewali i raoa hangko i watanta. Agaiana ane ara au mobabehi sala i babehia tobalilo hai towawine, madosami i watana haduduana.

Epesu 4:19

Barapi raisa maea, ido hai moula pearaihe peundeana lalunda au merikai, hai raunde peami mobabehi hinangkana babehia au bara hintoto.

2 Korintu 12:21

Au kupokalanga: i kahawengku irikamu, Pue Ala Ampuku ina mopakaeana i lindomi, hai ina moteriana lawi bosa tauna i olomi bara manihe menoso hangko i babehianda au kedai, hangko i pebualosinda hai i potambi-tambi dele hai babehianda au merikai hai au bara hintoto rababehi.

Pampetudungia 21:8

Agaiana tauna au langahe i hangka ranganda pane barahe meula Iriko, tauna au barahe mepoinalai Iriko, tauna au kadake babehianda, topepapate, topobabehi au merikai, topedoti, topenomba i anitu, hai topodongko, batenda rahuku i lalu tahi api au lolaa hai mawaa. Itimi au rahanga kapate karombelana.”

Roma 7:23

Agaiana atura iti barari kupeulai, lawi ara kuasa ntanina i lalu katuwongku au monangina. I lalungku, kuunde mpuu moula Aturana Pue Ala, agaiana kuasa dosa au i lalu katuwongku moewa peundeaku iti, alana nanangina dosa hai kupeulai pearai peundeana lalungku au kadake.

Matiu 15:19

Lawi hangko i lalunta mesupa hinangkana pekiri au kadake, alana ara au mepapate, mebualosi, metie, manangka, mosabi dongko hai mengkora-ngkora.

Pampetudungia 22:15

Agaiana tauna au kadake, topedoti, topobabehi au merikai, topepapate, topenomba i anitu, topodongko, hai tauna au mampokatana podongkonda, barahe rapaliu mesua i lalu wanua iti.

Yakobu 4:1

Halalu, moapari pane ara pobungka-bungka hai pombehahanai i olomi? Bara pae hangko i peundeami haduduami au mombeala liliu i lalumi?

1 Korintu 6:13

Ara wori lolita, “Paande mobundu i tainta, hai tai mobundu rapoihii paande.” Tou lolita iti, agaiana hambela tempo hinangkana iti ina napatuna Pue Ala. Agaiana watanta ide bara napopewali Pue Ala bona mebualosike. Watanta hangangaa tapake mobabehi peundeana Pue. Iami ampuna watanta.

Roma 6:6

Taisa halalu, katuwonta au hangkoia rapapatemi hihimbela hai Kerisitu i kau mombehape bona dosa barapi makuasa i lalu katuwonta hai barapoke napohawi dosa.

Ibarani 13:4

Ope-ope tauna hangangaa mampeulai ada posamboko. Ada iti inee nilingkai. Lawi tauna au mebualosi hai au mobabehi babehia merikai, batenda ina nahuku Pue Ala.

Ibarani 12:16

Nipamaroa-roa babehiami bona datikau ara au mebualosi ba mobabehi babehia au merikai. Ineekau ara au bara meula i peundeana Pue Ala nodo Esau hangkoia, lawi ia bara moholoi pewatina Pue Ala hangko i katowutuna. Kirana au katouana nahumba hangko i umana anti katowutuna, napobaluri i adina, naintolohi pea hai hantabo paande.

1 Tesalonika 4:3

Ide peundeanami Pue Ala bona malelaha katuwonta, hai mokaraohikau babehia au merikai.

1 Korintu 5:1

Ara kuhadi au mololita kana i babehianda tauna i olomi au bara hintoto. Ara hadua rangami au mampotambia towawinena umana. Mogalori i olonda tauna au barahe moisa Pue Ala, barahe ara au mobabehi nodo.

Roma 7:5

Hangkoia, i kadanta mani mepoinalai i Yesu, tapeinao peami mobabehi au kadake. Hai apa au rakontoake i Aturana Musa, itiri au tapeinao tababehi. Lawi i lalu katuwonta hangkoia, watanta tapake mobabehi dosa, alana hintotoke rahuku mate hai ragaakike hangko i Pue Ala.

Roma 1:29

Lalunda buke hai hinangka au kadake hai au bara manoto. Mehiorohe, kadakehe, mahinahe; rapeinao peami mepapate, mobungka-bungkahe, meakalangihe, mombepailaluhe, hai meuli-ulihe,

Roma 1:26

Mewali, anti kadanda mau menomba i Pue Ala, ido hai Napogiangaamohe moula peundeana lalunda au mepakaea iti. Hawe-hawe i towawine, barapi tedii lalunda i tobalilo. Agaiana hadua-hadua towawine mampotambiarihe hangka towawinenda.

1 Tesalonika 4:5

Ineekau naanti peundeana lalumi au kadake, nodo au biasa mewali i tauna au barahe moisa Pue Ala.

1 Korintu 6:11

Halalu, arakau au nodo babehiami hangkoia. Agaiana Napamalelahamokau Pue Ala hai Napopewalimokau taunaNa. Napamanotomokau i peitaNa anti pohintuwumi hai Pue Yesu Kerisitu hai anti kuasana Inaona Pue Ala Amputa.

Kolose 2:11

Anti pohintuwumimi hai Kerisitu, himbela pea ratilemokau. Karatilemi iti, bara petile au napobago manusia, agaiana petile au napobago Kerisitu i lalumi. Lempona, Nakabahamokau hangko i kuasa dosa.

1 Timotiu 6:10

Lawi ane mampokaelu peamoke doi, itimi au mopaara ngkaia pakana babehia kadake. Arahe tauna au nodo, au mohaoki liliu peahe doi, alana mopalehihe pepoinalainda, hai narumpahe mampopengaa kapari.

Ibarani 13:5

Inee worikau mohaoki liliu doi. Nipokatana apa au ara irikamu. Lawi ara lolitana Pue Ala au manguli: “Barako Kupalehi, hai barako Kukabaha.”