Kolose 2:13 - Sura Malelaha

¹³ Hangkoia hangko damanikau mepoinalai i Kerisitu, nodo manikau tauna au mate, lawi moliungikau hawana Pue Ala, hai barakau ratile. Agaiana nauri hangkoia nodokau tauna au mate, ide-ide anti pohintuwumi hai Kerisitu, Napatuwo hulemokau hihimbela hai Kerisitu, hai Naampungimi ope-ope dosami.

Kolose 2:13 교차 참조

Epesu 2:1

Hangkoia, hangko damanikau mepoinalai i Yesu, nodomokau tauna au mate lawi madosakau hai moliungikau hawana Pue Ala.

Roma 8:11

Pue Ala mopatuwo hule Yesu anti kuasana Inao Malelaha, hai Inao Malelaha iti au maida i lalunta. Mewali, kehapiri watanta mate, batena napatuwo huleke Pue Ala anti kuasana Inao Malelaha au maida i lalunta.

2 Korintu 3:6

Ia moweingkai kapande mewali topobagoNa au mopaguru tauna i dandiNa au wou. Barahe kipaguru bona mampeulaihe atura-atura au teuki bona mewalihe manoto i peitana Pue Ala. Agaiana kipaguruhe bona molambihe katuwo au wou hangko i Inao Malelaha. Lawi ane mampeinaoke mewali manoto i peitana Pue Ala i kamampeulainta atura au teuki, ina molambike kapate, lawi bara buke katapeulaina. Agaiana ane meulake i Pue Ala anti kuasana Inao Malelaha, molambike katuwo maroa au bara mokahopoa.

Ibarani 9:14

pelumbunami wahena Kerisitu! Anti kuasana Inao Malelaha au tuwo hawe i hae-haena, Kerisitu mohuhu wataNa i Pue Ala bona rapapate mewali popenomba au bara ara kamakurana. WaheNa iti mobahoi lalunta hangko i hinangka babehianta au moantike i kapate bona peisake menomba i Pue Ala au tuwo.

2 Korintu 5:19

Idemi bambari au kipahawe: melempo i Kerisitu, Pue Ala mopahintuwu tauna hai wataNa haduduaNa, hai barapi Napailalu salanda. Ikami ide, Naweingkai bago moanti bambari iti i tauna ntanina bona peisa worihe mohintuwu hai Pue Ala.

Epesu 2:11

Mewali, halalu au barakau to Yahudi, nikatuinao noumba katuwomi hangkoia. Ikamu, rauli to Yahudi: “tauna au bara ratile.” Hai to Yahudi iamohe: “tauna au ratile” lawi ratilehe moula ada agamanda, mewali rauli ihira pea taunana Pue Ala. Agaiana ada mpetile iti, iami ada au rababehi pea tauna mewali tanda i watanda.

Lukasi 15:32

Agaiana, hintoto mpuuke mosusa i katana-tana, lawi adimu au mate, tuwo hulemi. Matanta hangkoia, agaiana talambi hulemi.’ ”

Lukasi 15:24

Lawi anangku ide matemi hangkoia, agaiana tuwo hulemi. Matantami hangkoia, agaiana kulambi hulemi.’ Mewali mosusamohe i katana-tana.

Yakobu 2:26

Mewali, ane ara hadua tauna au barapi moinao, lempona matemi. Nodo wori, pepoinalainta i Pue, ane bara tongawa i babehianta, lempona matemi pepoinalainta, barapi ara pobunduana.

Epesu 5:14

Ido hai ara lolita au manguli: “Mearomokau au leta, Mearomokau hangko i kapate, hai Kerisitu ina mowangkahikau.”

1 Korintu 15:45

Ara teuki i lalu Sura Malelaha au manguli, “Tauna au nguru-nguruna napopewali hai napatuwo Pue Ala iami Adama. Agaiana Kerisitu peisa rauli Adama au kahopoana. Iami au moweike katuwo maroa au bara mokahopoa.”

Roma 6:13

Ineemi tahuhu watanta nakuasai dosa, au moantike mobabehi babehia au kadake. Agina tahuhu katuwonta i Pue Ala, lawi tekabahamoke hangko i katuwonta au hangkoia hai molambimoke katuwo au wou. Hangangaa tahuhu watanta i Pue Ala bona watanta ide tapake mobabehi babehia au manoto.

1 Yohane 2:12

Anangku, kuukiakau sura ide, lawi teampungimi dosami i lalu Kerisitu.

1 Korintu 15:36

Ntuli mpuu tauna au mekune nodo! Ane mantudake apa pea, tinuda iti bara ina tuwo ane bara ratawu hampai nodo tomate.

Yohane 5:21

Nodo UmaNgku mampopearo tomate hai moweihe katuwo, Iko wori mowei katuwo i hema pea moula peundeaKu.

Lukasi 9:60

Nauli Yesu, “Pogiangaamide tomate motawu hangka tomatenda. Agaiana oio, laomoko mopahawe bambari kana i poparentana Pue Ala!”

Ibarani 6:1

Mewali, halalu, barapokau kipagurua patoa paturo kana i Kerisitu. Agaiana hangangaa kipahaweamokau paturo kaliliuana bona manoto lalumi hai pekirimi. Ineeke mesule-sule i paturo au nguru-nguruna. Tauna au hangko mewali to Sarani hangangaa rapaturo bona menosohe hangko i babehianda au kadake hai mepoinalaihe i Pue Ala.

1 Timotiu 5:6

Agaiana tobemba au mohaoki peahe katana-tana, nuimbamohe mate nauri tuwo manihe, lempona matehe i lalu pepoinalainda.

Roma 4:17

Ara lolitana Pue Ala i Burahima au teuki node, “Kupopewalimoko umanda bosa tauna i humalele dunia.” I peitana Pue Ala, Burahima mewali umanta ope-ope lawi Ia mepoinalai i Pue Ala. Hai Iami Pue Ala au mopatuwo hule tomate hai mopaara apa au bara mani hambela ara, nauri hai lolitaNa pea.

Yohane 6:63

Inaonami Pue Ala au mowei katuwo. Kamaroho manusia bara mobundu. Lolita au Kupahaweakau mesuwu hangko i Inaona Pue Ala hai katuwo.

Yakobu 2:20

Ntuli mpuukau? Ba niuli handami pepoinalaimi i Pue Ala nauri bara ara babehiami au maroa? Ane nodo pepoinalaimi, bara ara pobunduana!

Yakobu 2:17

Nodo wori hai pepoinalainta. Ane tauli mepoinalaike i Pue, agaiana babehianta bara moula peundeaNa, pepoinalainta iti mate, lempona pepoinalainta mbero-mbero pea.

1 Timotiu 6:13

Mewali Timotiu, i lindona Pue Ala au mopatuwo hinangkana, hai i lindona Kerisitu Yesu au mopahawe notoNa i Pontiu Pilatu kuuliangaako:

Kolose 2:12

I tempomi rariu i lalu hangana Kerisitu, himbela pea matemokau, hai ratawumokau hihimbela hai Kerisitu, lawi nikabahami katuwomi hai babehiami au hangkoia. Hai i lalu karariumi iti, rapatuwo hule worimokau hihimbela hai Ia, lawi molambimokau katuwo au wou anti pepoinalaimi i kuasana Pue Ala au mopatuwo hule Yesu hangko i kapate.