Ibarani 9:26 - Sura Malelaha

²⁶ Lawi ane rapana nodo, kebosa belana Ia hangangaa mantodiha kapari duuna mate mepongka hangko i pewalina dunia hangkoia. Mewali, ide-ide hawe i kahopoa dunia au tepakanotomi, Ia mai i dunia moumpahi dosa manusia hambela pea, i pohuhuNa wataNa rapapate.

Ibarani 9:26 교차 참조

1 Peturu 1:20

Hangko damani dunia rapopewali, Yesumi au napakanoto Pue Ala mewali Topehompo. Ide-ide, i tempona hungkumi kahopoa dunia, Ia hawemi bona mohuru dosami.

Ibarani 9:12

I tempoNa mesua i lalu Bambaru Malelaha, Ia liliu lao i lalu Hologa Malelaha Ntepuu molindo Pue Ala. Hai wahe au Naanti mesua, bara wahe towau laki ba wahe ana japi laki, agaiana waheNa haduduaNa. PesuaNa iti, hambela pea i hae-haena, lawi hai waheNa iti, Ia mohompomi dosanta hawe i hae-haena.

Matiu 25:34

Hai Iko Datu, Kuuliangaahe au ntanda i koanaNgku, ‘Maimokau au nawati UmaNgku! Mesuamokau i lalu poparentaKu. Paidaami Kupasilolonga amiamokau hungka i pewalina dunia hangkoia.

1 Peturu 3:18

Lawi ara wori hadua au molambi kapari, iami Kerisitu. Ia hambela pea mokira wataNa rapapate bona mohalea dosa manusia. Ia au bara ara salaNa mopahuruke au masala bona moantike i Pue Ala. Ia rapapate, agaiana rapatuwo hule anti kuasana Inao Malelaha.

Ibarani 1:2

Agaiana i alo-alo au ina hawe hangko damani alo pebotusi i kahopoa dunia, lolitana Pue Ala napahaweake AnaNa. Hai AnaNa itimi au Napopatoa mampopewali dunia hai hinangka ihina. Iami au Napakanoto Pue Ala mampoampu hinangkana au ara.

Ibarani 10:4

Lawi wahe japi laki hai towau laki bara peisa moumpahi dosa.

Ibarani 7:27

Yesu bara nodo Tadulako Mpenomba Mahile ntanina au hangangaa mohuhuhe popenombanda alo-alona: nguru-nguruna popenomba au mohuru dosanda haduduanda, hai roo indo popenomba au mohuru dosanda tauna bosa. Agaiana Yesu hambela pea mohuhu popenomba i Pue Ala. Iti Nababehi i tempoNa mohuhu wataNa rapapate. PopenombaNa iti Nahuhu hambela pea; barapi ina rahuleki hawe i hae-haena.

1 Yohane 3:5

Hai niisa mpuu halalu, tunggaiana Yesu mai i dunia ide bona mogewo dosa manusia, nauri Ia haduduaNa, bara ara dosaNa.

Ibarani 10:12

Agaiana Kerisitu, hambela pea mokira wataNa rapapate mohuru dosa manusia, hai popenombaNa iti barapi paraluu rahuleki hawe i hae-haena. Karoona mohuhu popenombaNa, mengkaoremi lao i suruga hai mohuda ntanda i koanana Pue Ala.

Ibarani 10:10

Yesu Kerisitu mobabehi mpuumi peundeana Pue Ala: wataNa hambela pea Napopenomba i Pue Ala. Hai hangko i popenombaNa iti, Napamalelahamoke hawe i hae-haena.

Ibarani 9:14

pelumbunami wahena Kerisitu! Anti kuasana Inao Malelaha au tuwo hawe i hae-haena, Kerisitu mohuhu wataNa i Pue Ala bona rapapate mewali popenomba au bara ara kamakurana. WaheNa iti mobahoi lalunta hangko i hinangka babehianta au moantike i kapate bona peisake menomba i Pue Ala au tuwo.

1 Peturu 2:24

Yesu haduduana mohalea huku dosanta i karapapateNa i kau mombehape bona tekabahake hangko i kuasa dosa hai tuwoke moula peundeana Pue Ala. KapateNa iti moanti katuwo maroa irikita.

Pampetudungia 17:8

Hangkoia tuwo, hai ide-ide barapi ara, agaiana ina mesuwu hule hangko i kabe ngkapate au bara tehoka kakaladuna. Hai roo indo, ina rahuku mate. Tauna au maida i dunia au bara teuki hanganda i lalu Sura Ngkatuwo hangko damani dunia rapopewali, ina tingkarahe moita binata iti. Lawi hangkoia tuwo, ide-ide barapi ara, agaiana hambela tempo ina hawe hule.

Ibarani 4:3

Batena pea ikita au mepoinalai au molambi pengkarooangaa hihimbela hai Pue Ala. Ane tauna au bara mepoinalai, barahe molambi apa au Nadandi. Taisa iti hangko i Ngkorana Pue Ala inona au manguli: “RumpuNa hai mosumpaNa, Kuuli: Barahe ina mesua i pengkarooangaa au Kupasilolongami.” Pue Ala mololita nodo, kehapiri pengkarooangaa iti walimi Nababehi hungka i pewalina dunia ide.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Epesu 5:2

I babehianta alo-alona, hangangaa maahike i ranganta, nodo Kerisitu maahimi Irikita. Anti kamaahiNa irikita, Ia mokira wataNa rapapate mopahuruke. Babehia iti mopakatana laluna Pue Ala, nodo popenomba mawongi au rahuhu Iria.

1 Korintu 10:11

Ope-ope au mewali irihira hangkoia hangangaa tapailalu mewali ngkora pandiri irikita ide-ide. Hai ope-ope au mewali iti, teuki bona datike molambi pehukuna Pue Ala nodo irihira. Lawi ikita ide, tuwoke hungkumi i kahopoa dunia.

Pampetudungia 13:8

Ope-ope tauna au maida i dunia menomba iria. Au bara menomba iria, batena pearaihe tauna au teuki hanganda i lalu Sura Ngkatuwo hangko damani dunia rapopewali. Sura Ngkatuwo iti, iami surana Ana Dimba au rasambale. I lalu sura iti, teuki hanganda tauna au molambi katuwo maroa au bara mokahopoa.

Ibarani 10:26

Lawi ane mohadimoke hai moisamoke Ngkora Marasa au hangko i Pue, hai roo indo taoaka mobabehi liliu dosa, barapi ara popenomba ntanina au peisa mohuru dosanta.

Galatia 4:1

Mewali, halalu: ane pandirina ara hadua anantuana au kokoi mani, ia nodo hadua hawi, nauri ope-ope anu-anuna umana, ia ampuna.

Yohane 17:24

Uma, peundeaKu bona ihira au NuweimoNa ina maida hihimbela hai Iko i paidaaNgku bona moitahe peawaNgku. PeawaNgku iti NuweimoNa, lawi NupokakaiaNa hangko damani dunia ide rapopewali.

Yohane 1:29

Kahalona, Yohane moitami Yesu mai iria. Nauli i tauna bosa, “Nipeita! Oloumi mai Ana Dimba au napasilolonga Pue Ala. Iami au ina mopahuru watanta, mohuru dosanta.

Matiu 13:39

Iwali au mohawu dana, iami Datu Tokadake. Tempo pepare, lempona alo pebotusi i kahopoa dunia. Hai topepare, lempona malaeka.

Matiu 13:40

Nodo dana ragulu hai rahuwe, nodo wori tauna au kadake ina rahuku i alo pebotusi.

1 Peturu 4:7

Halalu, kahopoa dunia ide hungkumi hai ope-ope ihina ina matanta. Ido hai hangangaa mainga-ingakau hai nipamanoto pekirimi bona peisakau mekakae.

1 Yohane 3:8

Tauna au mobabehi liliu dosa, napoanahe Datu Tokadake. Lawi Datu Tokadake madosami hangko i nguru-nguruna. Mewali, tunggaiana Anana Pue Ala mai i dunia bona mogero bagona Datu Tokadake iti.