10 Lewi iti, ampu i kuntuna Burahima. I kamaina Melkisedek mampohidupaa Burahima, Lewi bara mani ara. Mewali, ane Melkisedek modoko hangkira hampulo hangko i Burahima, manoto Melkisedek i wongko tuwona hangko i Lewi hai pemuleanahe.
Moula atura agama Yahudi, ope-ope to Yahudi hangangaa mohuhuhe hangkira hampulo hangko i polambianda i pemuleana Lewi, au mewalihe tadulako mpenomba, nauri mohalalutohe lawi pemuleana hahahe Burahima.
I tempona Burahima mohuhu hangkira hampulo i Melkisedek, himbelami hai pemuleana Lewi au mewalihe tadulako mpenomba au mohuhu hangkira hampulo i Melkisedek, mole ihirari au hintoto modoko hangkira hampulo hangko i hahalalunda.
Pue Ala mopahawe aturaNa i to Yahudi melempo i pemuleana Lewi au Naangkahe mewali tadulako mpenomba, agaiana i kanatadalukoinda Haruni barahe mewali manoto i peitana Pue Ala. Ido hai Pue Ala moangka hadua tadulako mpenomba ntanina, himbela hai Melkisedek, au bara hangko i pemuleana Haruni.
