Galatia 4:9 - Sura Malelaha

^9-10 Agaiana ide-ide moisamokau Pue Ala. Moleri Pue Alami au ioru moisakau! Mewali, moapari hai moula hulekau ada hai hinangka kuasa dunia ide? Nipeulai ope-ope ada agama to Yahudi, mokadipurakau alo, wula hai pare au rapakanoto i lalu Aturana Musa. Ada hai atura iti bara mopaara pewati, hai barakau ina tekabaha hangko i dosami anti peulami i atura iti. Mewali, moapari hai nipeulai hule ada iti?

Galatia 4:9 교차 참조

1 Korintu 8:3

Agaiana tauna au tou-tou mampokaahi Pue Ala, naisa Pue Ala lalunda.

Galatia 3:3

Mewali, moapari hai ntuli gagakau? Nguru-nguruna i kanipoinalaina Yesu, nilambimi katuwo au wou hangko i kuasana Inao Malelaha. Ba niuliri ide-ide peisakau mewali malelaha anti kamarohomi haduduami? Bara!

Roma 8:3

Barake peisa tekabaha hangko i kuasa dosa lawi bara tabuku moula aturana Musa anti kamaledenta. Agaiana apa au bara peisa tababehi i atura agama anti kamaledenta, Napopewalimi Pue Ala, i potuduNami mai AnaNa i dunia mewali manusia. WataNa AnaNa Napahimbela hai wata manusia au madosa. Hai AnaNa iti mokira wataNa rapapate mohuru dosa manusia. Mewali, hangko i kapateNa, Pue Ala monangi kuasa dosa au ara i manusia.

1 Yohane 5:20

Taisa worimi: Anana Pue Ala hawemi i dunia, hai Ia au moweike kanoto lalu bona moisake Pue Ala au tou. Mohintuwumoke hai Pue Ala au tou anti pohintuwuta hai Yesu Kerisitu AnaNa. Iami Pue Ala au tou. Hangko Iria molambimoke katuwo maroa au bara mokahopoa.

2 Peturu 2:20

Meahi-ahi mpuuhe tauna iti. Nguru-nguruna moisamohe Amputa Yesu Kerisitu, ido hai tekabahahe hangko i babehia au kadake i dunia ide, agaiana roo indo mesule hulehe i babehianda au kadake duuna moulahe babehia iti. Kahopoana rumihi mpuu kamaruginda hangko i nguru-nguruna.

Ibarani 7:18

Atura au nauki Musa, au ngkaia kamakurana hai barapi mobundu, rakabahami.

2 Timotiu 2:19

Nauri nodo, Ngkorana Pue Ala batena maroho peangkana. Ngkorana Pue Ala rapandiri nodo haogu watu au bara ina tedua. I lalu Ngkorana Pue Ala teuki node, “Pue moisa hema au Napilei mewali anaNa,” hai, “Hema-hema au mopangaku kaYesuna Ampunda, hangangaa mokabahahe babehianda au kadake.”

Epesu 1:17

Mekakaena i Pue Ala au meawa, Umana Amputa Yesu Kerisitu. Kuperapi Iria bona Naweikau Inao Malelaha au mopamanoto lalumi, duuna moisa ntepuukau Pue Ala.

2 Korintu 4:6

Lawi Pue Ala au mongkora, Nauli, “Hangko i kamakaindi, mesupami baa!”, Ia worimi au mampopesupa baa i lalunta, bona moisake peawana tuwona Pue Ala au tongawa i tuwona Kerisitu.

1 Korintu 13:12

Lawi ide-ide, nodoke hadua tauna au mampeita hambua lengge i pampewaoa au mogawu-gawu, lawi bara mani taisa hinangkana i katou-touana. I alo au ina mai, hangko taisari hinangkana, lawi ina mampombelindoamoke Pue Ala hai ina taita i katongawaana. Ide-ide, makura mani kamapandeku. Agaiana i alo au ina mai, ina kuisa ntepuu hinangkana, nodo Pue Ala moisana.

Roma 8:29

Lawi tauna au Napileimohe, Napakanoto womohe hangko i nguru-nguruna bona mewalihe himbela hai AnaNa, hai AnaNa iti mewali au towutu i olonda halalu au bosa.

Yohane 17:3

Au Kutunggai hai ‘katuwo maroa au bara mokahopoa’ iami: Moisahe kaOiona Pue Ala au tou, au bara ara karoduaNa, hai moisa worihe Yesu Kerisitu au Nutudu mai i dunia.

Yohane 10:27

Dimbaku mohadi wotungku. Kuisa mpuuhe, hai raulana.

Yohane 10:14

Ikomi toporewu au maroa. Nodo UmaNgku moisaNa hai Iko moisa UmaNgku, nodo wori Iko moisa dimbaKu, hai dimbaKu moisaNa. TuwoNgku Kukira bona dimbaKu tuwohe.

Matiu 11:27

Roo indo, nauli mbuli Yesu, “Hinangkana NaweimoNa UmaNgku. Bara ara hadua au moisaNa, Iko Anana Pue Ala, batena pea UmaNgku au moisaNa. Nodo wori, bara ara au moisa UmaNgku, batena pea Iko AnaNa hai hema pea au Kupopaisaa.

1 Korintu 15:34

Ido hai kuuliangaakau, nipakanoto lalumi moula paturo au tou, hai nikabahami ope-ope dosami. Lawi ara manikau au bara moisa Pue Ala. Iti kupahawe bona maeakau.

2 Korintu 11:20

Ane arahe guru au mampohawikau, nidokohe. Ane arahe au mopakanawokau hai mobagiukau, nidokohe. Ane arahe au mampemahile hai mohapakau, nitodiha pea.

Galatia 4:3

Nodo wori ikita halalu: hangko damanike moisa Pue Ala, nodoke anangkoi iti, lawi mengkoruke i ada hai hinangka kuasa dunia ide.

Lukasi 5:38

Mewali anggoro au wou hangangaa rakando wori i pambolia au wou.