Galatia 3:2 - Sura Malelaha

² Nikatuinao halalu apa au mewali irikamu hangkoia. Modokokau pae Inao Malelaha anti peulami i Aturana Musa? Bara! Agaiana modokokau Inao Malelaha lawi mohadimokau Ngkora Marasa hai mampoinalaimokau Pue Yesu.

Galatia 3:2 교차 참조

Galatia 3:14

Tunggaiana Yesu mate rapaku i kau bona tauna au barahe to Yahudi peisa worihe molambi pewati au nadandi Pue Ala i Burahima. Pewati iti tahumba anti pohintuwuta hai Yesu Kerisitu. Mewali, ane mepoinalaike i Yesu Kerisitu, molambike Inao Malelaha au nadandimi Pue Ala.

Suro 15:8

Hai Pue Ala, au moisa lalu tauna, modoko tauna au barahe to Yahudi, hai Ia mopakanoto tunggaiaNa iti i kaNaweinda Inao Malelaha nodo au mewali irikita hangkoia.

Galatia 3:5

Naweimokau Pue Ala Inao Malelaha hai mobabehimi tanda kuasa i olomi. Ba Nababehi nodo anti peulami i Aturana Musa? Bara. Nababehi nodo, lawi mohadimokau Ngkora Marasa hai mampoinalaimokau Pue Yesu.

Ibarani 2:4

Hai Pue Ala mopakaroho ntepuu posabinda, lawi Naweihe kuasa mobabehi ngkaia pakana tanda kuasa hai tanda au metingkarai. Hai Nawei worihe kapande au montani-ntani hangko i Inao Malelaha moula peundeaNa.

Suro 8:15

Kahawenda Peturu hai Yohane, mampekakaengaamohe to Samaria au mepoinalaimohe i Pue Yesu bona molambihe Inao Malelaha.

Suro 2:38

Nahanai Peturu, “Hangangaa menosokau hadua-hadua hangko i dosami, hai hangangaa rariukau i lalu hangana Yesu Kerisitu. Ane nodo, Pue Ala ina moampungi dosami, hai Naweikau Inao Malelaha.

Ibarani 6:4

Lawi tauna au raoaka mousuli hangko i pepoinalainda, barapohe peisa ranini hule bona menosohe hangko i dosanda. Lawi hangkoia, maidahe i lalu kamabaa, matana lalunda modoko pewatina Pue Ala, hai lalunda nakuasai Inao Malelaha;

Roma 1:17

Hangko i Ngkora Marasa iti, taisa noumba rarana Pue Ala moimbake manoto i peitaNa, anti pepoinalainta Iria. Bara ara rara ntani, lawi i lalu Sura Malelaha teukimi node, “Tauna au manoto i peitana Pue Ala, ina molambihe katuwo maroa anti pepoinalainda.”

1 Peturu 1:12

Hai Pue Ala mampopaisaahe nabi-nabi hangkoia barahe mopahawe bambari kana i watanda haduduanda. Agaiana ikamuri au ratunggai. Hai ide-ide, apa au rapahawe nabi-nabi hangkoia, rapahawemi i kanoto-notoana irikamu, lawi aramohe tauna au mopahaweakau Ngkora Marasa melempo i kuasana Inao Malelaha au hangko i Pue Ala. Mogalori malaeka, mampeinao worihe moisa kana i katuwo maroa au nihumba iti.

2 Korintu 11:4

Arahe guru agama i olomi au mopaturokau kana i Yesu, agaiana paturonda bara himbela hai apa au kipaturoakau. Ane paturonda bara himbela hai paturongki, moapari hai niunde mampehadingi lolitanda? Niunde pae modoko inao ntanina au mosisala hai Inao Malelaha au nidokomi? Niunde pae modoko bambari au mosisala hai Ngkora Marasa au nipoinalaimi? Halalu, inee nodo.

1 Korintu 9:21

Ane mopahawena Ngkora Marasa i tauna au bara moisa Aturana Musa, mewalina nodo hadua tauna au bara moula Aturana Musa bona kuantihe mepoinalai i Kerisitu. (Agaiana inee rauli: bara kupeulai hawana Pue Ala. Mengkoru liliuna i hawana Kerisitu.)

Galatia 3:3

Mewali, moapari hai ntuli gagakau? Nguru-nguruna i kanipoinalaina Yesu, nilambimi katuwo au wou hangko i kuasana Inao Malelaha. Ba niuliri ide-ide peisakau mewali malelaha anti kamarohomi haduduami? Bara!

Ibarani 4:2

Lawi ikita ide, rapahawea worimoke Ngkora Marasa, nodo to Yahudi hangkoia. Agaiana Ngkora Marasa iti bara moanti pewati irihira, lawi rahadi mbero pea, bara rapoinalai.