Galatia 2:19 - Sura Malelaha

¹⁹ Lawi hangko i Aturana Musa, kuisa kamasalangku. Hintoto mpuuna rahuku mate. Bara mpuu ara rarangku mewali manoto i peitana Pue Ala i lalu pampeulaingku Aturana Musa. Ido hai kukabahami pampeulaingku Aturana Musa bona mampeulaina peundeana Pue Ala. I peitana Pue Ala, matemona hihimbela hai Kerisitu, lawi Ia matemi mopahuruna.

Galatia 2:19 교차 참조

Roma 7:4

Nodo wori ikita, halalu: Hangkoia tetaka manike i Aturana Musa. Agaiana ane matemoke hihimbela hai Kerisitu, tebolehimi pohintuwuta hai atura iti. Hai ide-ide, mohintuwumoke hai tohaduana, iami Kerisitu au tuwo hule hangko i kapate. Anti pohintuwuta hai Kerisitu, mobundumoke i Pue Ala.

Roma 6:2

Inee tapehangu nodo halalu! Bara hintoto ane mobabehi liliuke dosa, lawi matemoke hihimbela hai Kerisitu bona dosa barapi makuasa irikita.

1 Tesalonika 5:10

Yesu Kerisitu mate mopahuruke bona ane hawe deade, ina tuwoke hihimbela hai Ia. Kehapiri matemoke ba tuwo manike i tempo iti, batenta ina tuwo hihimbela hai Ia.

2 Korintu 5:15

Lawi tunggaiana Kerisitu mate mohuru dosa ope-ope tauna bona ikita au tuwo manike i dunia ide barapoke moula peundeata haduduanta, agaiana moulamoke peundeana Kerisitu, au matemi mohuru dosanta hai au rapatuwo hulemi.

Roma 6:11

Nodo wori ikita, hangangaa tauli, “Matemona hihimbela hai Kerisitu Yesu; barapona mohintuwu hai dosa. Tuwomona moula peundeana Pue Ala i lalu pohintuwuku hai Kerisitu Yesu.”

Roma 8:2

Lawi anti pohintuwuta hai Kerisitu Yesu, Inao Malelaha moweike katuwo au wou hai mokabahake hangko i kuasa dosa au mopaara kapate.

1 Peturu 2:24

Yesu haduduana mohalea huku dosanta i karapapateNa i kau mombehape bona tekabahake hangko i kuasa dosa hai tuwoke moula peundeana Pue Ala. KapateNa iti moanti katuwo maroa irikita.

Roma 6:14

Ikita, barapoke nakuasai dosa, bara anti pampeulainta Aturana Musa, agaiana anti pampeulainta kabulana laluna Pue Ala.

1 Peturu 4:6

Ido hai Ngkora Marasa rabambaria worihe tauna au mate, bona kehapihe mate nodo ope-ope manusia anti kamadosanda, batenda molambi worihe katuwo maroa moula peundeana Pue Ala.

Ibarani 9:14

pelumbunami wahena Kerisitu! Anti kuasana Inao Malelaha au tuwo hawe i hae-haena, Kerisitu mohuhu wataNa i Pue Ala bona rapapate mewali popenomba au bara ara kamakurana. WaheNa iti mobahoi lalunta hangko i hinangka babehianta au moantike i kapate bona peisake menomba i Pue Ala au tuwo.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Kolose 2:20

Ikita au mepoinalai i Kerisitu himbela pea matemoke hai Kerisitu, lawi anti pohintuwuta hai Ia, tekabahamoke hangko i ada hai atura-atura iti. Barapoke mampeulai ada hai atura iti bona mewalike manoto i peitana Pue Ala. Mewali, ane matemoke hihimbela hai Kerisitu, ineemokau mengkoru i atura au ngkaia pakana iti, nodo tauna au bara mani moisa Kerisitu.

Galatia 3:24

Aturana Musa monini hai mokampaike duuna Kerisitu mai i dunia bona Napatongawa Pue Ala kamanotonta i peitaNa, lawi mepoinalaimoke i Kerisitu.

Galatia 2:20

Hai ide-ide barapona tuwo moula peundeaku haduduangku, agaiana Kerisitumi au tuwo i lalu katuwongku. Mewali, tangangku mani tuwo i dunia ide, batengku mepoinalai i Anana Pue Ala au mampokakaiana hai au mokira wataNa rapapate bona mewalina manoto i peitana Pue Ala.

Kolose 3:3

Lawi ikita matemoke hihimbela hai Ia. Hai mohumbake katuwo au wou hangko i Kerisitu, au maida hihimbela hai Pue Ala i suruga. Kerisitu au moweike katuwo au wou. Ide-ide, bara mani taita, agaiana ane hawe hule deade, Ia ina motudungiake kuasaNa hai peawana tuwoNa. Hai ikita halalu, ina rapomahile worike hihimbela hai Ia.

Galatia 3:10

I lalu Sura Malelaha hangkoia teuki node: “Hema-hema au bara mampeulai hinangka parenta au teuki i lalu Aturana Musa, batenda napaharara Pue Ala.” Mewali, halalu, taisa: ane ara tauna au napeinao mopamanoto watana i peitana Pue Ala anti pampeulaina Aturana Musa, batena ina harara i lindona Pue Ala. Lawi hema pae au peisa mampeulai ope-ope hai au bara ara kamasalana?

1 Korintu 10:31

Agaiana kuuli: ane maandeke ba maenuke, ba apa pea au tababehi, hangangaa tababehi bona Pue Ala rapomahile.

Roma 7:14

Taisa mpuu, halalu, Aturana Pue Ala batena maroa lawi hangko i Inao Malelaha. Agaiana ide iko, tomadosana, lawi napohawina dosa.

Roma 5:20

Tunggaiana Aturana Pue Ala au napahawe Musa, iami bona tongawa mpuu kamasalanda ope-ope tauna, lawi ngkaiami peliunginda i Atura iti. Agaiana nauri rumihi kamahilena dosa manusia, melumbu mani kamahilena kabulana laluna Pue Ala i manusia!

Roma 4:15

Lawi au tahumba hangko i Aturana Musa iami karumpuna pea Pue Ala, lawi moliungike Atura iti. Ane rapana Pue Ala barake mowei aturaNa, kebarake masala moliungi atura iti.

1 Korintu 9:20

Ane mobambarina Ngkora Marasa i to Yahudi, mewalina nodo hadua to Yahudi bona bosa to Yahudi kuanti mepoinalai i Kerisitu. Ane iko hihimbela hai tauna au moula Aturana Musa, moula worina Atura iti. Katouana barana tetaka i Aturana Musa, agaiana kupeulai mpuu bona tauna iti kuanti mepoinalai i Kerisitu.

Galatia 6:14

Agaiana iko, bara kuunde rapomahile i raoa hangko i kapatena Pue Yesu Kerisitu i kau mombehape. Lawi ope-ope au peisa raita i dunia ide hai au raimba mahile holona barapi ara bunduna iriko. Hai tauna i dunia ide, bara ara au tedii lalunda i apa au kupomahile.