2 Peturu 2:4 - Sura Malelaha

⁴ Mogalorihe malaeka au madosa hangkoia, barahe nakabaha Pue Ala hangko i pehuku. Malaeka iti batenda Natende i lalu naraka hai Nataha i lalu kalolu tampo au makaindi duuna hawe alo pebotusi.

2 Peturu 2:4 교차 참조

Yudasi 1:6

Nikatuinao wori malaeka au maida i suruga hangkoia. Hantangahe moliungi tampana kuasanda, hai mopalehihe paidaanda. Malaeka iti nahiluhe Pue Ala hai rante au bara mpuu peisa mabotu, hai Natahahe i lalu paidaa au makaindi, hai ina Nataha liliuhe duuna hawe tempona hinangka kara-karanda Napohuda-hudaa i alo pebotusi au mewulungai.

Matiu 25:41

Roo indo, Kuuliangaahe au ntanda i kabeoNgku, ‘Padumokau hangko inde, ikamu au harara i UmaNgku! Mesuamokau i lalu api au rore liliu, au rapasilolonga mewali pohukuanda Datu Tokadake hai hinangka malaekana.

Roma 8:32

Ia bara mampokabohi AnaNa au haduduaNa, bona mate mopahuruke, noumba kadanta ina Nawei paka-pakana?

Pampetudungia 20:10

Roo nodo, Datu Tokadake iti, au mopakanawo tauna, ratende i lalu tahi api au lolaa hai au mawaa. I tahi api itimi hangkoia ratendehe binata au kadake hai nabi au mepawuli. Inditi, rapopeahi-ahi liliuhe hawe i hae-haena.

Lukasi 10:18

Nauli Yesu, “Kuitami Datu Tokadake manawo hangko i langi nodo kila!

1 Yohane 3:8

Tauna au mobabehi liliu dosa, napoanahe Datu Tokadake. Lawi Datu Tokadake madosami hangko i nguru-nguruna. Mewali, tunggaiana Anana Pue Ala mai i dunia bona mogero bagona Datu Tokadake iti.

2 Peturu 2:11

Mogalorihe malaeka, au melumbu kamakuasanda hangko i guru iti, barahe bai mopapakoi ba mosalai apa au meawa iti i lindona Pue Ala.

2 Peturu 2:5

Nodo wori manusia au kadake hangkoia, barahe nakabaha Pue Ala hangko i karahukunda. Dunia au hangkoia Nagero hai owai, alana matehe ope-ope tauna au mesapuaka. Batena pea nabi Noho hai pitu tinana au Natulungi datihe mate, lawi Noho mopahawe lolitana Pue Ala i ope-ope tauna bona mopakanotoahe rara moula peundeaNa.

Lukasi 8:31

Seta iti merapihe i Yesu bona ineehe Napopeloho lao i karahukuanda seta.

Yohane 8:44

Umami iami Datu Tokadake! Hai nipeinao moula liliu peundeana umami iti. Hangko i nguru-nguruna ia topepapatemi. Paturona bara tou, lawi bara ara au tou iria. Ane modongko, itimi poantina, lawi ia topodongko mpuu, hai ope-ope tauna au modongko moulahe peundeana.

Markus 5:7

Yesu mowura seta au mampesuangi tauna iti, Nauli, “Melohomoko hangko i tauna ide!” Monganga tauna iti, nauli, “Yesu Anana Pue Ala au i suruga! Apari mai Nuala? Kuperapi bona modandiKo i lalu hangana Pue Ala, barana ina Nupopeahi-ahi.”

Matiu 8:29

Monganga-ngangahe seta au mampesuangi tauna iti, rauli, “Anana Pue Ala! Moapari hai maiKo? Ineengkai Nuhuku! Bara mani hawe tempona Nupakaparingkai.”

Yudasi 1:13

Ihira nodohe balumba tahi au melangaki, au moimborakahe eanda haduduanda. Nodohe betue au bara manoto polumaona, au monontohi kamakaindi au tepasilolongami irihira hawe i hae-haena.

2 Peturu 2:9

Mewali, hangko i ope-ope pandiri au kupahawe inona, tongawami kuasana Pue Ala motulungi tauna au menomba Iria datihe napakanawo pekelo. Hai tongawa wori kuasaNa mohuku ope-ope tauna duuna hawe alo pebotusi.

Roma 11:21

Lawi ane Pue Ala motendemohe to Yahudi au nodomohe daangkau au tuwo i watana hangko i nguru-nguruna, apa mani ikamu au hangko rapopentaka topeakau.