5 เกม๊า กแช่ แยว้ พี่ อ เก ท เอ้า เซิง เอ้า ซ้ะ ดี๊ ท เซิง ชอง ซ้ะ ชอง อ กแช่ ล แฌ้ นอ, แม้ช้า น ซื๊ง โอ ฆู๊ง โอ พุ้ โละ ซ้ะ พี่ น แม้ บี่ ซุ้ กแช่ เยซู คริ้
กแช่แยว้ อ จูง โอ ดี๊ ค่าง ยูดา ปะ, บี่ซุ้ ดึ้ เกม๊า อ ซื๊งเว๊ซีง อ ซ้ะ โอ ล เม้ง ฆ่าง, พี่ ม แม้โพะ เท่อ พี่ กจุ้แฆว้ ดี๊ กดูกแซย่ ซีง นี่ โล้ เว๊, บี่ซุ้ดี๊ กแช่ยาเว อลู่งอแท๊
ทอดูทึโท๊ทึ จ กแช่แยว้-เอ้อ, เมะเว๊ น เก ฌี้ทึแอว้ทึ, ดี๊ ล ทื๊งนี่นะนี่ เท่อ แบ โอล๊าโอฆวี้ ดี๊ ทเอทกวี้ง, ลู่ง อเฌิ่งอค๊า เอะ โพล้ง กุ้แฌ้, พี่ กุ้ทาง เท่อ โล้แบ กแช่แยว้
ฌ้อง กแช่ยาเว ลี้ฆ้าง ลู่ง อ เมะแซ พ้า, ดี๊ ไคล้ทาง ไจ้ะเว๊, “กแช่ยาเว, กแช่ยาเว เก แยว้ พี่ อ โอ ฆวี้ทะ ดี๊ ทย๊างเซิงย๊างซ้ะ, ดี๊ อ โก้ง อโบ้ง, ซ้ะทาง เท่อ โกย้, โอกู้งโอล๊า ดี๊ ทเอ ลู่ง อ เฌิ่ง, ดี๊ ทอที๊งอโต้
ก ม เกม๊า เอะ-อ้ะ ซ้ะ ล โพลง ดี๊ เกล้ ล บ้อง, บี่ซุ้ อ เว๊ ม ดู้งแบยางแบ เฆ้อ โอ ล้างชู้ล้างแกย, บี่ซุ้ เก ท ล้างเปิ่ง เอะ-อ้ะ, ดี๊ อ พู อ ลี้ง พี่ เฌ๊โพะ อ ไค๊
ดี๊ ก ม เกล๊าง เอะ อ ซื๊งเว๊ ซีง ลแพ, อ ซ้ะ ล โพลง ฆ่าง, ดี๊ ก ม ชวี๊งล้าง เอะ อ ซื๊งเว๊ อวีงอแล้ อ ซ๊าง, ก ม เท้าไฆวะ ซ้ะ โล่ง ไจทางไฆวะ ลู่ง อไพ้ะอแย พ้า, ดี๊ เกล๊าง เอะ อ ซื๊งเว๊ อ ซ้ะ แย ล้อ
โพล้ง ทื๊ง กแช่ เยซู ล มู๊ง นอ โอ ฆู๊ง โอ พุ้ แบ โละ แบ ทุ้ ฌี้ มะ, กเย่ อ ท ฆ้า ท โฆ่ ล แพ นอ อ กแช่ ล ทื๊ง เว๊ เก อ เท่อ แบ, เจ่ ซยอง เว๊ กุ้ อ เม้ง ล้อ
เอ โพล้ง กุ้ อ แฌ้ บี่ ซุ้ๆ, ชีอูงพู๊ น ซ้ะ ล ฌี้, แบเด้าะ ชาง ล้าง น ซ้ะ ญ่อง แม้ เท่อ ลู่ง อ พือ, ไจ้ะ ล้าง น ซ้ะ แซย๊ ล ฌี้
เกม๊า กแช่ แยว้ พี่ อ เก ก ท มื้งแล่ อ กแช่, เกม๊า น ซื๊ง โอ ล๊า โอ ฆวี้ ดี๊ ท เซิง ฆวี๊ง ซ้ะ โย้, ดี๊ ทมึทพ้า พี่ น ซื๊ง ชู่ง นะ-อ้ะ นอ ไช้ะ, บี่ ซุ้ วีง ฌี้ แล้ แอว้ ม เกม๊า น ท มื้งแล่ โอ แอ ทาง แอ ทาง ล้อ
อ ไฌ่ บี่ อี้ง, กแช่ เยซู คริ้ ล แม้ แบ อ กแช่ อ ซ้ะ แบ, บี่ ซุ้ ไละ ฌี้ ไละ แอว้ ไจ้ะ เว๊ “ท ไคล้ พี่ โพล้ง ดึ้เดว แน้ นอ แบ แย้ ล้อ”
ด๊างพื่งวี่ ซีง-เอ้อ, ลู่ง กแช่ เยซู คริ้ อ เม้ง อ แซ นอ, จ อวีงซ้ะชู้ น ซื๊ง เกม๊า ไคล้ เท่อ ล เม้ง ฆ่าง, ช๊องมอง เท่อ ล เม้ง ฆ่าง เลา ปะ, บี่ซุ้ น ซื๊ง ล ล้างมื่ง ล้างพ้ะ โละ ซ้ะ แบ
จ ด๊างพื่งวี่ ซีง-เอ้อ, ลู่ง ไค๊ ทึ อี้ง เกม๊า กแช่ แยว้ โอ ดี๊ น ซื๊ง กุ้ อ แฌ้ ล้อ, เกม๊า น เก โพล้ง ฌี้ โพล้ง แอว้, คุ้ช๊องแน พี่ จ อวีงซ้ะชู้ น ซื๊ง เกม๊า น ซื๊ง โอ ดี๊ ท ช๊องมอง ล เม้ง ฆ่าง, โอ ฆู๊ง โอ พุ้ โละ ซ้ะ, ฌ้อง กแช่ แยว้ พี่ อ โอ ดี๊ ท เอ ท กวี้ง ท มึ ท พ้า ม โอ ดี๊ น ซื๊ง ล้อ
แบเด้าะ โพล้ง พี่ อ ซ้ะ ล้างท่อง นอ, กแช่ แยว้ แม้ ชอง ทาง เอะ-อ้ะ, ดี๊ แม้ ชอง ทาง เอะ ก ซ้ะ ปะ พี่ ทีโต เฌ๊ ฌู เฆ้อ
เกม๊า น ซื๊ง โอ ดี๊ ท เอ ท กวี้ง, บี่ ซุ้ กแช่ เยซู คริ้ เอ เฆ้อ ดี๊ ญ่อง ซี๊ง ล้าง อ ซ้ะ ลู่ง ก ฌ่าง, เก ท โบง ท แบ้ ดี๊ ท ลื่ง ทาง ลู่ง อ น๊าอวีง น๊าม๊า, พี่ กแช่ แยว้ เฆว๊ อ ซ้ะ
เท่อ ลู่ง อ ล้างเปิ่ง นอ น ซื๊ง แบ โอ บี่ ซุ้ ม เกิ้ง ดี๊ ท ฌี้ อ ไฌ่ ดี๊ กแช่ เยซู คริ้, ท บี่ นอ จ เมะ ลี้ โอ น ซื๊ง ฌี้, ล ลี้ แบ ฌี้, จ ม แน่ฌ๊า น ซื๊ง โอ เฌิ่ง โอ ค๊า ดี๊ เซิง ดี๊ ซ้ะ ล เม้ง ฆ่าง, ดี๊ น ซื๊ง ดึ้ เท่อ เลา ไฌ่ เลา แบ้ ลู่ง ท ชู่ง ท นะ อ ฌ่าง, เฌ๊ เว๊ ลู่ง ท ฌี้ อ ไฌ่
ท บี่ นอ จ อวีงซ้ะชู้ น ซื๊ง เกม๊า จ ท ซ้ะอวีง ซ้ะโทะ ล๊า ทาง ฆวี้ ทาง บี่ อี้ง เซ้อ, เกม๊า น ช๊องมอง ช๊องม้ะ ท ล เม้ง ฆ่าง, โอ ดี๊ ท เอ ท กวี้ง ล เม้ง ฆ่าง, โอ ดี๊ เซิง ดี๊ ซ้ะ ล เม้ง ฆ่าง
ลู่ง อ ล้างเปิ่ง นอ เกม๊า ก แม้ โพะ ท ไฌะ ท ไฌ่ อ ไค๊, พี่ ก แม้ โพะ-อ้ะ ครึๆ, เย้า นอ
น่าง ยูโอดี ดี๊ น่าง ซีทีเค-เอ้อ, จ อวีงซ้ะชู้ น ซื๊ง เกม๊า แม้ ฆู๊ง แม้ พุ้ โละ ซ้ะ, บี่ ซุ้ ด๊างพื่งวี่ ทื๊ง ซยอง กแช่ เยซู คริ้ เกิ้ง ม แม้ เว๊
อ นอ, เก โพล้ง พี่ อ ล ชู่ง ล นะ กแช่ แยว้ แบ, ลู่ง โนอา อ ชู้ แค๊ เย้า นอ, ล ว๊าง แย๊ พี่ โนอา ไต้ทาง กบ้าง ที๊ง พ้ะดู อู้งนอ, กแช่ แยว้ เอ้า อ ซ้ะ ล แม้ เตา แม้ แต๊ โพล้ง ได้ะ แบ, แบเด้าะ โพล้ง โอ แซย้ โคะ ล้อ, เมะ เว๊ โฆะ แฌ้ พี่ อ ทาง กบ้าง ที๊ง คู ฌ้อง พ้อง ไฆวะ ดี๊ ที๊ง
ลู่ง อ ไค๊ ทึ อี้ง, น ซื๊ง ซีง แบ แม้ ซ้ะ ล โพลง ฆ่าง, เอ โละ กวี้ง โละ ซ้ะ บี่ ซุ้ ด๊างพื่งวี่, ย๊างเซิง ย๊างซ้ะ โละ ซ้ะ, ดี๊ โอ ดี๊ ท ชาง ล้าง เซิง ชาง ล้าง ซ้ะ คี๊ง โค๊ เลา
พี่ กแช่ แยว้ เอ้า อ ซ้ะ ไยะ เย้า นอ, เกม๊า น ซื๊ง แคว่-อ้ะ เก บี่ ซุ้ อ เว๊ อางกี ท อ ช๊า อ โท่, ลู่ง ม แม้ พ้อง พลิ้ น ซื๊ง, บี่ ซุ้ ก ด๊างพื่งวี่ เปาโล พี่ ก เอ-อ้ะ, อ เว๊ กวิ้ เอะ น ซื๊ง ไละ บี่ นอ เย้า ปะ, กวิ้ เว๊ ดี๊ ท โกง ท มอง พี่ กแช่ แยว้ เกล๊าง เอะ-อ้ะ นอ ล้อ
กแช่ แยว้ ล แม้ เท่อ โกย้ๆ, แบฆ้ะ ดี๊ อ ท เอิ้งล้าง บี่ ซุ้ โพล้ง แบ แฌ้ๆ, ช๊องมอง เว๊ นอ แบ, แบเด้าะ อ เว๊ เอ้า อ ซ้ะ ดี๊ น ซื๊ง ไยะ เย้า, เมะ เว๊ ล แบ ซ้ะ เกม๊า โพล้ง เซงทื่งเฌ๊ฌ้อง น่าง แฌ้ แบ, แบเด้าะ แบ ซ้ะ เกม๊า โพล้ง กุ้ อ แฌ้ เปลง ไท้ ซ้ะ อ ซ๊าง
