20 ดี๊ อีซายา ดู้ง ทาง ล ปี๊ พี่ อ ไจ้ะ เว๊ กแช่ แยว้ โล้ เว้ เว๊ บี่ อี้ง “โพล้ง พี่ อ ล อางฆื๊ง แย้ แบ แด แย้ จ เนโพล ทาง จ ซ้ะ ดี๊ โพล้ง ลู่ง ล อางจ้ะ แบ แย้ แบ”
โพล้งอ้าโพล้งซ๊าง ไจคุ้ซูง, ทึเมะ โพล้ง ล โอ ล้อง-อ้ะ น่าง แฌ้ แบ แบเด้าะ โพล้งแบกแช่แยว้อซ้ะ, อ ซ้ะ น้า ด้องซุ้ คี๊ยื่ง แพ๊
กแช่แยว้ ไจ้ะเว๊ บี่อี้ง, “พี่ น ม เก จ เพล่ นอ บี่ซุ้ ม โชะทาง ยาคุ้ อ ชื้อ ลแพ นอ ล้อ ดี๊ บี่ซุ้ เกม๊า อีซลาเอง พี่ โอ ล้างลื๊อ ก้ะ ซีง ลแพ, โอฌี้โอแอว้ ไท้ นอ แคว่-อ้ะ ม เก ท ลปี๊ลคี่ น้ะ กชุ้ ก ม เกม๊า น เก ทพ้าง เอะ กเย่ โพล้ง กุ้ชื้อกุ้ชะ บี่ซุ้ ก ทพ้องทพลิ้ ม ลี้ท้อง มุ้คูทึ ฌางคูทึ”
อ เว๊ ม ดึ้ เกม๊า โพล้ง กุ้ชื้อกุ้ชะ แอฌี่งแอฌ้อง, เซิงไพ่ซ้ะว้ะ กเย่ กจุ้แฆว้ ม เพิ่งไบ้ะ ทะ อ นุ้ ลู่ง อ เว๊ อกย้อง อไฌ่บี่อี้ง, อ ซื๊งเว๊ ลแพ นอ, ม แด ท พี่ โพล้ง ล โอ โล้ เอะ อ ซื๊งเว๊ น่างแฌ้ ได้ะ แบ ดี๊ อ ซื๊งเว๊ ม แน ซี, ท พี่ อ ซื๊งเว๊ ล แน่ฌ๊า แบ เว๊ น่างพ๊า ได้ะ แบ
เกม๊า กุ้ซย้ะ ดูๆ, อางกี ทีง-อ้ะ ล ฌี้ เกม๊า แม้ เซ๊ น ลู่ง, บี่ซุ้ดี๊ อูง ทพูแฆ่ อ โน้ง เกม๊า โล้ล้าง เอะ กพูกลี้ง, เกม๊า ซีงแฌ๊ ล้าง อ ซ้ะ, แบฆ้ะ ดี๊ อ ท กไบล้ะกแบล อ ไฌ่ เกม๊า ยาคุ้ อชื้ออชะ, ซีงแฌ๊ ล้าง อ ซ้ะ, แบฆ้ะ ดี๊ อ ท เด้บ้ะ
ฌ้อง กแช่ เยซู โล้ ก้ะ เท่อ ไจ้ะ เว๊ แด, “บี่ ซุ้ ดี๊ นอ, โพล้ง ลู่ง อ ปี๊ ทึ ค๊องเนง อี้ง, ม เก แบ ก้ะ โพล้ง ลู่ง อ ล้างเปิ่ง ดู ทึ, ดี๊ โพล้ง ลู่ง อ ล้างเปิ่ง ดู ทึ ค๊องเนง อี้ง, ม เก แบ ก้ะ โพล้ง ปี๊ ทึ นอ ล้อ”
อ กแช่ โล้ แบ-อ้ะ, ‘ลี้ แคว่ ลู่ง เฌง คู เฌง ฆ้อง เกล้ มื่ง ดู เกล้ มื่ง พู, อวีงซ้ะชู้ เกม๊า โพล้ง เฌ๊ บี่ ซุ้ โพล้ง ม โอ ฆวี้ ทะ เด้า พ้า
กแช่ แยว้ เกม๊า โพล้ง แบ อ ซ้ะ บี่ จะ เล้ นอ, อซื๊งเว๊ แน ล ซี แบ, แบ เด้าะ อซื๊งเว๊ อางกี ล้าง อ ซ้ะ ม แม้ แด เว๊ ล แฌ้ ล้อ, ล ญ่อง ฮะ นี่ กแช่ แยว้ อ ทอางกี ล้าง แบฆ้ะ ดี๊ ท แบ กแช่ แยว้ อ ซ้ะ นอ แบ
เมะ บี่ นอ, ก ม ไจ้ะ บี่ จะ เล้, ม ไจ้ะ เว๊ โพล้ง ล เมะ เก ยู แบ พี่ อ ล เฌา อางฆื๊ง เท่อ ลู่ง แบ กแช่ แยว้ อ ซ้ะ นอ แบ, อซื๊งเว๊ แบ กแช่ แยว้ อ ซ้ะ ลู่ง อ ท ชู่ง ท นะ อ กย้อง
แบเด้าะ โพล้ง อีซลาเอง พี่ อ อางฆื๊ง ทอางแม้เลา, ลู่ง ม เกม๊า อ แบ กแช่ แยว้ อ ซ้ะ นอ, ล นี่ เว๊ แบ
พี่ ก เอ โละ กวี้ง โละ ซ้ะ นอ เมะ ลู่ง กแช่ แยว้ เอ วี่ง เฆ้อ ล้อ
