2 ท อ คูง, แบ ทอูงไฆวะ-อ้ะ บี่จะเล้ นอ, เกม๊า โฌ๊ไจไฆวะ-อ้ะ บี่นอ ล้อ นี๊ฆุ้ พลี่งไฆวะ ลู่ง มี อ เมะแซ พ้า บี่จะเล้ นอ เกม๊า โพล้งอ้าโพล้งซ๊าง, เซงทื่งเฌ๊ฌ้อง ลู่ง กแช่แยว้ อ เมะแซ พ้า บี่นอ ล้อ
ท่องอช๊าง, โยอะ ดี๊ ซึ้พู พี่ อ โอ ดี๊-อ้ะ นอ, ลี้ฆ้าง เบ้าทาง บี่ซุ้ ม ดึ้ซึ้ โพล้ง ซีเรีย, ฌ้อง อ เท่อ ซยู๊ไฆวะ ลู่ง ซึ้พู ลแพ นอ, อ เมะแซ พ้า เลาพะ
โพล้ง ซีเรีย ซยู๊ไฆวะ ลู่ง โพล้ง อีซลาเอง อ เมะแซ พ้า, ดี๊ ดาเว แม้ซี๊ง โพล้ง ซีเรีย พี่ อ เก ซึ้พู คะ เลาะ ดึ้ซึ้ นอ, เนว๊ แย้ แฌ้, ดี๊ ซึ้พู เทา กซี ลี่ง ไซ แฌ้, ดี๊ แม้ซี๊ง เว๊ อ ซึ้พูมู๊ง อ คู ดู, เมะเว๊ โชบา พี่ นอ เฆาะ
จ แบ ทลู๊งล้างไฆวะ บี่ซุ้ดี๊ ที๊ง จฆีงจเกว้ เลาพะ นอ, ล้างพลืง ล้างเบ้าะแดไฆวะ อ ล่าง จเซิงจซ้ะ นอ, บี่ซุ้ดี๊ นี๊ฆุ้ พลี่งไฆวะ ลู่ง ซ้ะแน๊ ล้อง
แบเด้าะ โพล้งอ้าโพล้งซ๊าง นอ, ม เซงทื่งเฌ๊ฌ้อง กแช่ยาเว อดีงอแด้ นอ, เก บี่ซุ้ดี๊ นางญ้างพ้า อฆี๊งอแล้ อเว๊ ล้างแม่ไฆวะ, ล้างแม่ไฆวะ บี่ซุ้ดี๊ ท อ คูง
แบเด้าะ กแช่แยว้-เอ้อ, น เก ทล้าง ซ้ะเม ท่อง น ซ้ะทาง เย้า นอ โพล้งเล้, ม ชี๊เทิง ลู่ง น เมะแซ พ้า ซี?
อ นอ แบ อซื๊งเว๊ อ ทกล้างไฆวะ, ดี๊ เช้าไฆวะ ดี๊ มี เกม๊าเต้ แคว่-อ้ะ, ดี๊ ต้ะเซ๊ง อซื๊งเว๊,
ทลู่ง พลี่งไฆวะ ด้องซุ้ นี๊ฆุ้, ลู่ง กแช่ยาเว อ เมะแซ พ้า ลู่ง ทอดูทึโท๊ทึ กแช่แยว้, เมะเว๊ ฌางคูโคล๊งคู เลาพะ อ กแช่ นอ, อ เมะแซ พ้า
ท่อง แน่ฌ๊า ทเติ้งทางเติ้งล้าง อ ลู่ง เซ๊ นอ, โพล้ง กุ้ชื้อกุ้ชะ ลแพ นอ, ซยู๊ คุ้ซูงไฆวะ ล้อ ท่อง กแช่แยว้ เฌ้เทิงทาง นอ, โพล้ง กุ้ชื้อกุ้ชะ นอ ที่มื่งที่พ้ะไฆวะ ล้อ
บี่ซุ้ดี๊ มี อาง เซง น๊างโป้ง ดี๊ พี่ มี ดึ้ เกม๊า ที๊ง ละเพา บี่ซุ้ เกม๊า กแช่แยว้ อดีงอแด้, ซีงแฌ๊ กแช่แยว้ อ เม้ง บี่ซุ้ กเย่ โพล้ง กุ้ชื้อกุ้ชะ นอ, ม ว้ะโทะ ลู่ง กแช่แยว้ อ เมะแซ พ้า
เมะเว๊ ทอ้าทซ๊าง นอ อาง เท่อ บี่ซุ้ดี๊ มีอาง เท่อ อ อาง เท่อ เลา ดี๊ ทชูง พูปรี้ง ดี๊ ทชูง พ้ะดู อ เช้าฆ้าง มี ลู่ง ทเค ไบ้ะไทะ อ เซง มู่โท้ง แกล้ ฌ้อง เซง นอ ล้างแม่ไฆวะ เก ท อ คูง ดี้ง ทาง
แม้ทเล้ ท กโช้งกแช่ อะบี ไจคุ้ซูงไฆวะ เด้าะ? แม้ทเล้ น งู้ แพ๊ อ ฌ้าง ล ชี๊เทิง โอ เฌิ่งเพิ่ง แบ? เมะเว๊ กแช่ยาเว ชาง ล้างเทะเค้า-อ้ะ ล้อ
อกย้องบี่นอ, อ เว๊ ม เก บี่ซุ้ดี๊ ทไค้ะซวี๊ง ลู่ง โฌ้โค๊-อ้า บี่ซุ้ดี๊ ปช้างที๊ง พี่ ล้างแม่ไฆวะ โค๊ ลู่ง ทพ้างทาง โฌ้โค๊-อ้า นอ บี่ซุ้ดี๊ พี๊ซวิ้ พี่ ลี้งอูงไฆวะ เว๊ ลู่ง ทล่าง เพา ล้าง บืง-อ้า บี่ซุ้ดี๊ ท อ คูง พี่ ไจทาง นี่ ลู่ง ป้อง อ เช้า พ้า-อ้า นอ ล้อ
ทลู่ง ลแพ นอ, ม พลี่งไฆวะ ลู่ง กแช่แยว้ อ เช๊ละ ดี๊ กเย่ ทลู่ง คางไท้ะ ซีง ลแพ, ม แบ ท อางน้าง พ้ะ บี่ซุ้ดี๊ นี๊ฆุ้ ลู่ง มีไท้ะ บี่ซุ้ดี๊ ที๊ง พี่ ลู๊งล้าง ลู่ง ทไบล้ล้อง
พี่ โพล้ง ยุ้ทาง ไฮะ ลี้ พ๊า ฌี้ๆ, นอ โมเซ ไจ้ะเว๊ “จ กแช่ยาเว-เอ้อ, เฌ้เทิงทาง แดเทา, เกม๊า น ดีง น แด้ ที่พ้ะที่ล้าง ไฆวะ ดี๊ เกม๊า โพล้ง พี่ อ แช๊เมะ ไฌ๊ซ้ะ ดี๊ แน้ นอ ไจคุ้ซูง แดไฆวะ แน้”
