3 เกม๊าเต้ กว้ะไฆวะ แย้, ลี้ ล พ๊าฆ่าง ดี๊ โพล้งอ้าโพล้งซ๊าง ดี๊ โพล้ง พี่ แม้ ทอ้าทซ๊าง ลแพ นอ ล ฌี้ พี่ อ ไคล้ ดี๊ อ ฌุ้เม้งฌุ้พาง, ด้องซุ้ เก ฌุ้พางเท่งซ้ะ แบเด้าะ ทช๊องมอง, แม้อ้าแม้ซ๊าง เท่อ, โอ ลู่ง อ ซ้ะพ้า
กแช่แยว้ แด เว๊, เอ้อ, กแช่แยว้ แคว่ที๊ง ทน้ะทโน๊ง, ดี๊ ทแบคู่แบโฌ้ เย้า บี่ซุ้ กแช่แยว้ ม แม้ช๊าไท้-อ้ะ โพล้ง พี่ อ ล่างทุ้อซ้ะลโอแบ นอ, อางกีล้าง อ ซ้ะ ดี๊ กแช่แยว้ กแช่แยว้ เก โพล้ง ยู่แคว่แม้ช้า โพล้ง พูฆวี อ แพ่
อ นุ้ นอ, โอฆวี้ทะ ดี๊ ทชูททื๊ง, ทโล๊ไละล้าง, ดี๊ ทคู้ทเคิ่ง ลู่ง อ พลี้ เช๊ละ นอ, โอ ดี๊ ทอ้าทซ๊าง ดี๊ ทอ้า ลู่ง อ น้ะ
อซื๊งเว๊ ไคล้ ทคีงอูงคีงตู๊ง โละอซ้ะ อเว๊ ไคล้มึแน่ ดุ้ เท่อ ดี๊ อ นุ้เฌะ, ดี๊ อ ซ้ะ อางโล๊ไละ เท่อ
เกม๊าเต้ จเซิงจซ้ะ เด้งด้าง ลี้ฌูง เท่อ ออ้าอซ๊าง, น่าง เม้ง ล ฌี้ พี่ ม แม้ซยอง ท ลฌี้ลแอว้ แบ ลเม้ง ดี๊ ลเม้ง ดี๊ โพล้ง พี่ อ แม้ ทอ้าทซ๊าง นอ น่างเม้ง ล ฌี้ ดี๊ เกม๊าเต้ แย้ จ อาง อซื๊งเว๊ อ เท่อ, พี่ ออวีงอช๊า นอ ล ฌี้
เกม๊าเต้ กว้ะไฆวะ แย้, ลี้ ดี๊ โพล้ง ทเด้บ้ะ ล ฌี้ ดี๊ กว้ะไฆวะ จ ทโอม๊า, ลี้ ดี๊ โพล้ง ซู๊โอ้ซ้ะ ทซวีง นอ ล ฌี้
อเว๊ ช๊องมอง เว้ ทแม้ ออ้าอซ๊าง, พี่ อ โอ ลู่ง ล่างมี๊ง คู อเว๊ ลี้ฌ้าล้าง อ ซ้ะ ลู่ง เกล้, พี่ ลฌี้ลแอว้ แบ อเว๊ ล ซม๊า ทอ้าทซ๊าง แบ
แน้, โพล้ง พี่ อดู้งแอยางแอ-เอ้อ, แบทเล้, น อางปฆ้า เท่อ ลู่ง ทอ้าทซ๊าง พ้า? เฆว้งทาง กแช่แยว้ อ ทเอทกวี้ง, พี่ อเฌิ่งอค๊า นอ เซ๊งนี้ง คล้อง ทไค้ะ
อ ทไคล้ นอ, พลี๊ ฌี้เละ ทอซูอไย้ แบเด้าะ ทดึ้ทชาง โอ ลู่ง อ ซ้ะพ้า อ ทลื่งทไคล้ นอ, เพา ฌี้เละ ทซู ได้ะ แบเด้าะ นอ เก น้ะ, พี่ ทึ้ทาง เว้ อ ซ้ะ เย้า
อซื๊งเว๊ ช๊องมอง ที่ ม ชางล้างไฆวะ แน้, ลู่ง ทเม้งดูแซโท๊ อเว๊ แบ อ ซ้ะ ลู่ง ทกไบล้ะกแบล พ้า อเว๊ ชูฌี้ชูแอว้ เท่อ ดี๊ นุ้ แบเด้าะ ชูอ้าชูซ๊าง เท่อ ลู่ง อ ซ้ะ พ้าเซ่-ลา
แคว่เซ้อ, อเว๊ แม้ทาง ทอ้าทซ๊าง เย้า อ ด้าทางนี่ ทอ้าทซ๊าง ดี๊ พ้ะทางนี่ ทคีงอูง
กแช่ยาเว ไคล้ บี่อี้ง, แบฆ้ะ ดี๊ โมไคล้คิ้กแช่แยว้ ลแพ นอ อ ไฌ่ โพล้ง พี่ ลี้ฌ้า กพูกลี้ง เกม๊า เว๊ อ เฌ๊พลุ้ไฆวะ โพล้ง พี่ กุ้ซย้ะ เท่อ ไจ้ะเว๊, “ทฆู๊งทพุ้” ลู่ง อช๊าอโท่ พี่ โอ ดี๊ ทอางทโอ้ อ แค๊ นอ แบเด้าะ โล้ล้าง ทดึ้ทชาง เอะ โพล้ง พี่ ล เนฆ้าง ดึ้อาง เท่อ อ นุ้ พ้า น่างเม้ง แบ
โมเซ โล้ เอะ โพล้ง น๊างมู๊ง นอ ไจ้ะเว๊, “เกม๊า น ซื๊ง ไจไฆวะ เมะ ไย้ ดี๊ โพล้งอ้าโพล้งซ๊าง ลแพ อี้ง อ เด้, พองแบ ต้องแบ อ เท่อ น่างเม้ง ล ฌี้, เมะ ล บี่นอ แบ ไค๊ไก้ะ น ซื๊ง ม แบ ทกว้ะนี่ฆึ ดี๊ อซื๊งเว๊ ลแพ อี้ง อ ทเด้บ้ะ ปะ”
ฌ้อง อ เว๊ ม ไจ้ะ เอะ โพล้ง ลู่ง อ โอ อ จูง จี ล โค๊ นอ ไจ้ะ เว๊, ‘ไจ ทาง ไฆวะ, กแช่ แยว้ ชู อ้า น ซื๊ง เย้า, ลี้ ลู่ง มี อ้า พ้า พี่ อ ล้างไพะ ล ซี แบ, พี่ แด้ เว้ เอะ ม้างโค้ไล่ ดี๊ อ เพล่ อ บาง ซีง อ ล่าง
โพล้ง ล แพ อี้ง นอ, ม ลี้ แบ ลู่ง ท แม้ เตา แม้ แต๊ ล้างชู้ ล้างแกย อ ล่าง, แบ เด้าะ โพล้ง พี่ อ แบ กแช่ แยว้ อ ซ้ะ ล แพ นอ, ม นี่ แบ ท ม๊า ล้างชู้ ล้างแกย นอ ล้อ”
