12 แบเด้าะ โพล้งเล้?, ม แด ล้างไท้ อ กแช่ อ ทไพ้ะทแม ซี เกม๊าเต้ กแช่แยว้ แม้เช๊งแม้เกล้ง แย้, เกม๊า พ้องไฆวะ ดี๊ ทไพ้ะทแม, พี่ โอคุ้ซูง นอ ไช้ะ
“ซอง แย้ เซ้อ, ฌ้อง จ ล เซ๊ ล้าแบ เกม๊า แย้ จ แน ซี ไช้ะ, เมะ จ ไพ้ะ พี่ ล เช้า เล้
พี่ จ ชี๊น้าง ดี๊ เฌ้เทิงทาง นอ, กแช่แยว้ ซีงแฌ๊ เว๊ ล้อ กแช่แยว้ แน จ ท ช๊องมอง ซี ไย้ โยะ
ท ซีงแฌ๊ บี่อี้ง นอ, อล้ะอเล่ พะไฆวะ แย้ อ โท๊ เต้ๆ, ท้อง ลู่ง จ พอง ล ท้อง แบ
เมะเว๊ ทน้ะทโน๊ง ดว้ะ ล น้า แบ นี่ พ้องวะทะ แย้ จ ทอ้าทซ๊าง ล้องช่อง คลึ้นี่ แย้ ท๊อง จ แคว่ เท่อ ล แด น่างเม้ง แบ อ แอเละ คูซู๊ง ลู่ง จ คูล้อง จเซิงจซ้ะ นอ ล้างท่อง ล้อ
เกม๊าเต้ ซฌ้ะไฆวะ แย้, ดี๊ จ ทอ้าทซ๊าง ท่อง อเช๊งอเกล้ง ดี๊ เกม๊า แม้เช๊งแม้เกล้งไฆวะ แย้, ดี๊ จ ทเด้เทาเด้บ้ะ
พี่ ทอ้าทซ๊าง น้า เฆ้อ ซีงลแพ อี้ง นอ กแช่แยว้ ล ทื๊งนี่นะนี่ ทลือค๊างพะ เท่อ แบ
กแช่แยว้ ช๊างล้าง เฆ้อ ซีงลแพ, ก ทอ้าทซ๊าง ลู่ง อ เมะแซ พ้า ช๊างล้าง ก ทเด้บ้ะ คิ้ซูงคิ้บีง, ลู่ง กแช่แยว้ อ เมะแซ พ้า
กแช่ยาเว ไคล้ ดี๊ โมเซ ไจ้ะเว๊, “เฌ๊ทาง ฌูง แย้ ลู่ง ทลู่ง คู อี้ง, ฌ้อง โอคุ้แท๊ พี่ นอ, จ ม เกม๊า โล่ง ปางเป พี่ โอ ดี๊ ทโล้ทละ, ดี๊ ทอางแม้เลา พี่ จ กวิ้ล้างไน-อ้ะ, บี่ซุ้ ซอง เอะ อซื๊งเว๊”
โพล้ง พี่ ดึ้เดว กแช่แยว้ อลู่งอแท๊ นอ, แม้เฌ๊ฌ้อง ไท้ อ กแช่ แบเด้าะ โพล้ง พี่ ทื๊งแบนะแบ ทซองทซ๊าง นอ, ม นี่แบ รางวาง
เฆ้อ กุ้แฌ้ ก เกทางก้ะ บี่ซุ้ดี๊ ท พี่ อ แบอ้า ดี๊ ก ซื๊งเว๊ ก ทแบกแช่แยว้อซ้ะ เลาพะ นอ, เก บี่ซุ้ดี๊ ไช๊ช้าง แบอ้าแบซ๊าง ก ซื๊งเว๊ กุ้แฌ้ ล้างไย้ะ บี่ซุ้ดี๊ เซงแล ดี๊ ก ทไพ้ะทแม อูงพลุ้ไฆวะ เฆ้อ บี่ซุ้ดี๊ ลี้ง
ซ้ะ นอ เก ทอางโล๊ไละ ดูเละ ท กุ้เม้ง เลาพะ อ อ้าทางซ๊างทาง น้ะ มะ ล้อ โพล้งเล้ ม ซีงแฌ๊ ซ้ะ นอ?
แย้ จ ซีงแฌ๊ ล้าง จ ซ้ะ จ ท ไพ้ะ ท แม ล โอ น่าง เม้ง แบ, ล เมะ จ ไจ้ะ ล้าง จ ซ้ะ จ ฌี้ จ แอว้ แบ, กแช่ แยว้ ล แฌ้ ล้อ ต้ะเซ๊ง แย้ ซี
โอ้, แบซ้ะ เกม๊า อ ซื๊งเว๊ อ ซ้ะ โอ บี่อี้ง ครึๆ, เมะเว๊ ซ้ะ พี่ อ ดู้งแบยางแบ เฆ้อ, ดี๊ แฌแซกต้าง ก ทซองทซ๊าง กุ้เม้ง, บี่ซุ้ ม เก ท อ ฌี้ ดี๊ อ ซื๊งเว๊, ท้อง อ พูชู้ลี้งชู้ ล้างชู้ล้างแกย ล้อ
ทบี่นอ, เกม๊า น ซื๊ง ซีง ลแพ, ปโล่ ล้างซ้ะ, พี่ ม แม้โพะ ท อางแบเลา อ ไค๊, พี่ กแช่ยาเว น กแช่แยว้, อางแบเลา เว๊ นอ, แกยไฆวะ น ซ้ะ ลู่ง อ จี ล โค๊, ดี๊ อ ฆุ้ ล โค๊ ล ฌี้ เฆาะ
แบเด้าะ ที่ โพล้ง ลื่ง เท่อ อ คู ดู ทึ ล แฌ้ ล้อ พี่ อ ลี้ นึ ฆ้าง ลู่ง แย๊ โค๊ ล เช้า นอ, ลี้ นึ ฆ้าง เว๊ ล เนง ล พ๊า ล้อ, ลี้ โชะ ดี๊ ท ซวีง พี่ อ เทว๊ เอะ กแช่ แยว้ ลู่ง อ กแช่ อ ท เด้บ้ะ อ ฌ่าง, ดี๊ โพล้ง เฌงพูฆ๊างพู ล ซีงแฌ๊ ล้าง ซ้ะ แม้ ไพ้ะ เท่อ แบ นอ อ ท เด้บ้ะ อ ฌ่าง
แบเด้าะ ก เมะ โพะ เกล้ ลู่ง ท พ้าง, บี่ ซุ้ กแช่ แยว้ โอ ลู่ง ท พ้าง, อ นอ ก โอ ฆู๊ง โอ พุ้ ฆึ โละ ก ซ้ะ, กแช่ แยว้ อ พูแคว๊, เมะ เว๊ กแช่ เยซู นอ อ ซวีง อางซฌ้ะ ไฆวะ เอะ ก ท เด้บ้ะ กุ้ อ เม้ง
