4 โพล้งอ้าโพล้งซ๊าง นอ, ล เก บี่นอ แบ แบเด้าะ เก บี่ซุ้ดี๊ พี๊ซวิ้, พี่ ลี้งอูง ลีงแล่ไฆวะ เว๊
อ เว๊ เก บี่ซุ้ดี๊ โล่ พี่ ลี้ง อูงพลุ้ เว๊ ดี๊ เก บี่ซุ้ดี๊ พี๊ซวิ้ พี่ ลี้ง อูงพลุ้ เว๊ ดึ้ๆ, ฆวี่พ๊าเล้?
โพล้ง กุ้ แฌ้ พี่ ซ้ะนาง กแช่แยว้ นอ, อ เกล้ แม้ อ ซ้ะ บี่นอ ล้อ โพล้ง พี่ ลทื๊งลนะ กแช่แยว้ แบ นอ, อ ทมื้งแล่ ม เซงทื่งเฌ๊ฌ้องไฆวะ
เกม๊า อซื๊งเว๊ ซีงลแพ, เก บี่ซุ้ดี๊ พี๊ซวิ้ ลู่ง ลี้งเฌ๊ อ เมะแซ พ้า โอ ดี๊ กแช่แยว้ อ มุ้คูพู โฌ๊ไจไฆวะ-อ้ะ
แย้ จ ลี้ แพ๊ฆ้าง, ดี๊ แคว่เซ้อ, อเว๊ ล โอ ล้าแบ ทึเมะ จ ม ไจ อางฆื๊งแคว่-อ้ะ ฌี้ นอ, ล แด-อ้ะ แบ
กเย่ โพล้ง กุ้ชื้อกุ้ชะ, แม้ เซ๊ อ ลู่ง ล้างว้างล้างซวาง, บี่ซุ้ดี๊ ที๊ง แอฌี่งแอฌ้อง อ ลู่ง แบเด้าะ กแช่แยว้ ม แม้น้าแม้ฆ่าง -อ้ะ, ดี๊ อ เว๊ ม ไจคุ้ซูงไฆวะ ไย้โยะ แบ ท โฌ๊ไจไฆวะ บี่ซุ้ดี๊ พี๊ซวิ้, พี่ แบ ลี้งอูง-อ้ะ ลู่ง ทลู่ง คู บี่ซุ้ดี๊ ทมูงทมวี๊ง พี่ อ ดี้งไฆวะ ลู่ง ลี้ง อ เมะแซ พ้า
แบเด้าะ กเย่ นดีงนแด้ ลแพ นอ, ม บี่ซุ้ดี๊ ฌางคูมูง บลิ้ กมูงคลูง ดี๊ กเย่ โพล้ง พี่ อ ล้าง ซ้ะเม นอ, ม บี่ซุ้ดี๊ พี๊ซวิ้ เชงทางเชงล้าง ลชู่ลล่าง เฆาะ ดี๊ ล ทีงฆ่าง ล้อ
ก ม ลีงแล่ไฆวะ อ ซื๊งเว๊, บี่ซุ้ดี๊ พี๊ซวิ้ พี่ อ แบ ลี้ง, เฌ๊นี่ ลู่ง แพะคูทเคแกล้, อูงพลุ้ไฆวะ เว๊ นอ ล้อ
อกย้องบี่นอ, อ เว๊ ม เก บี่ซุ้ดี๊ ทไค้ะซวี๊ง ลู่ง โฌ้โค๊-อ้า บี่ซุ้ดี๊ ปช้างที๊ง พี่ ล้างแม่ไฆวะ โค๊ ลู่ง ทพ้างทาง โฌ้โค๊-อ้า นอ บี่ซุ้ดี๊ พี๊ซวิ้ พี่ ลี้งอูงไฆวะ เว๊ ลู่ง ทล่าง เพา ล้าง บืง-อ้า บี่ซุ้ดี๊ ท อ คูง พี่ ไจทาง นี่ ลู่ง ป้อง อ เช้า พ้า-อ้า นอ ล้อ
อ เว๊ โชะ ดี๊ เคล้, พี่ ม ฆะ ไฆวะ บืง, ฌ้อง บืง ลู่ง อ ช้ะ นอ, ม อางกี ซยอง เว๊ ลู่ง พ๊าง พ้า, แบ เด้าะ เมะ บืง ซู นอ, ม เช้า ไฆวะ เว๊ ดี๊ มี, พี่ อ ล ล้างไพะ น่าง พ๊า แบ ล้อ”
