10 เกม๊า ฮะนี่ จ ทซองทซ๊าง เท่งก้ะ จี้ ดี๊ เกม๊า ฮะนี่ ทซีงแฌ๊แน่ฌ๊า, เท่งก้ะ ท๊องบ้าง อ แย ฌี้
ม แม้นี่ ท๊อง ฆวี้-อ้ะ ล นี่ แบ ดี๊ ม เค๊งทางนี่ จี้ เกม๊า-อ้ะ, ท๊อง เว๊ อลื่งอฆวี้ โอ นอ ลซีแบ
ม ทูที๊ซุ้-อ้ะ ดี๊ ท๊อง ดี๊ โกย ฌี้ นอ ลซีแบ ดี๊ ม อางเล๊-อ้ะ ดี๊ ทฆ้าทโฆ่ ท๊อง, ลู่ง อ ฌี้ทึ ฌี้ นอ ลซีแบ
อกย้อง บี่นอ, แย้ จ เอ กแช่แยว้ อ ทซองทซ๊าง ฌี้เละ ท๊อง, ฌี้เละ ท๊อง ลู่ง อ แย ฌี้ นอ ได้ะ
จ ซ้ะอวีงซ้ะโทะ ลู่ง กแช่แยว้ อ ทไคล้ อกย้อง ด้องซุ้ โพล้ง ลู่ง อ แด แบ เท่อ, พี่ แม้นี่ก้ะ เว๊ แอฌี่งแอฌ้อง นอ ล้อ
ลู่ง จ ฌ่าง พ้า นอ, ท อางแม้เลา เฌ๊นี่ ลู่ง กแช่แยว้ อ นุ้ นอ ฌี้เละ ท๊อง ดี๊ จี้ อ ลอง, ลู่ง อ ม๊า พ้า นอ ได้ะ
โพล้งแบกแช่แยว้อซ้ะ อ พลี้ นอ, เมะเว๊ จี้ อ แย ฌี้ โพล้งอ้าโพล้งซ๊าง อ ท ช๊องมอง นอ, อลื่งอฆวี้ ปี๊
นี่แบ ทโกงซีมองแบ นอ, ฌี้เละ นี่แบ ท๊องบ้าง ชี่แอเล้ ดี๊ นี่แบ ทซีงแฌ๊ กุ้เม้ง นอ, ล้าง แบเซิงแบซ้ะ ฌี้เละ นี่แบ จี้ ได้ะ
โอ ดี๊ ท๊อง ดี๊ โอ ดี๊ ทแมล่ โฌ้ แอฌี่งแอฌ้อง แบเด้าะ นุ้ พี่ โอ ดี๊ ทซีงแฌ๊ นอ, เก เท่อ พี่ อ ลื่งดูฆวี้ดู เต้ๆ
เกม๊า ฆวี้ นี่ ทเมะทโต้ ดี๊ อางแช๊ไฆวะ-อ้ะ ล ฌี้ เกม๊า ฆวี้ นี่ ทโกงซีมองแบ, ทซองทซ๊าง, ดี๊ ทซีงแฌ๊แน่ฌ๊า กุ้เม้ง
จซูงจแซ ฌี้เละ ท๊องบ้าง, ฌี้เละ ท๊อง ลู่ง อเช๊งอเกล้ง ดี๊ จซูงจแซ ฌี้เละ จี้ ลู่ง อ แย ฌี้
ทโกงซีมองแบ นอ, ฌี้เละ คองแซย้ ดี๊ เก ท ล้างเปิ่ง เอะ โพล้ง พี่ นี่ แด แบ มื่ง
แบเด้าะ นอ เปโต โล้ แบ-อ้ะ, “จ จี้ ล โอ น่าง ไซะ น่าง ซยู๊ แบ, พี่ จ ท โอ ล เม้งๆ, นอ, จ ม เกล๊าง แน้ ล้อ, ลู่ง กแช่ เยซู คริ้ โพล้ง นาซาริ้ อ เม้ง นอ จ โล้ แบ แน้, เฌ้เทิง ทาง ไจ ดุ้ แฆว่”
ก ซ้ะ เฌ๊ฌ้อง, แบเด้าะ ก ซ้ะอวีง ซ้ะโทะ เท่อ ครึๆ, ก เก โพล้ง ซยาง โพล้ง ยะ, แบเด้าะ ก เกม๊า โพล้ง แอ ฌ้อง อ ท โอ ทาง ช๊อง ทาง ลู่ง เซิง ลู่ง ซ้ะ ล โค๊, ก เท่อ ล โอ น่าง เม้ง แบ, แบเด้าะ ก เท่อ โอ กุ้ อ เม้ง
