18 โพล้ง พี่ อางกีซูงทะ ท แช๊เมะไฌ๊ซ้ะ นอ, โอ ดี๊ นุ้ คีงอูง เท่อ ดี๊ โพล้ง พี่ อ ไคล้อ้า ซี๊งเค โพล้ง แฌ้แพ นอ, เก โพล้งเซ๊กูเฌ๊ฌ้อง ล้อ
ดี๊ ท่อง อะเนอ เฌ๊ไท้ ไท้ ท้อง เว่ง เฮโบรง พ้า เย้า นอ, โยอะ ลี้ฌ้า-อ้ะ ลู่ง เว่ง อ ป้ะตู๊ง พ้า, บี่ซุ้ ม ไคล้ เว๊ ดี๊-อ้ะ คี๊ง แฌ้ เฆาะ, แบเด้าะ, โยอะ นอ ชิ้ อะเนอ อ ฌู่โพ๊ง, ดี๊ อ เท่อ ซี๊ง เว๊, โยอะ แม้แกไท้ อ พื่ง อาซาเฮง อ ซวีง อ กย้อง นอ ล้อ
โพล้ง พี่ ซี๊งเคพะเพิ่ง กโช้ อ ฌุ้พาง นอ จ ม แม้เฌ๊ฌ้องไฆวะ-อ้ะ โพล้ง พี่ ทื่งดูล้าง อ ซ้ะ, ดี๊ ชีอูงพู๊ อ ซ้ะ นอ จ ล ญ่อง โท่ง แบ ปะ
อซื๊งเว๊ ไคล้ ทคีงอูงคีงตู๊ง โละอซ้ะ อเว๊ ไคล้มึแน่ ดุ้ เท่อ ดี๊ อ นุ้เฌะ, ดี๊ อ ซ้ะ อางโล๊ไละ เท่อ
โพล้ง พี่ ล เจ่ อ พลี้, เซ๊วีงซ๊องแล้ ไคล้อ้าไคล้ซ๊าง เท่อ แบ ล แม้อ้าแม้ซ๊าง อ ฌุ้พาง แบ ดี๊ ล แม้ไฌ๊ซ้ะ อ ฌุ้พาง แบ
เมะเว๊ อ ซื๊งเว๊ ซีงลแพ อ นุ้พ้า นอ, ทเมะทโต้ ลโอแบ อซื๊งเว๊ อเซิงอซ้ะ นอ, เมะเว๊ ทแม้เฌ๊ฌ้อง เท่อ อซื๊งเว๊ อ โคะบ้อง พ้า นอ, เมะเว๊ ทพ้า เคิงล้างบ้า ทจู, พี่ อุ้พ้ะท๊าง อ ซ้ะ คระ อซื๊งเว๊ ไคล้ มึแน่ ดุ้ เท่อ ดี๊ อ พลี้
น ชี๊น้าง ไคล้ ซี๊งเคพะเพิ่ง นพื่งนวี่ น เซ๊วีงซ๊องแล้-อ้ะ
อ ทไคล้ นอ, พลี๊ ฌี้เละ ทอซูอไย้ แบเด้าะ ทดึ้ทชาง โอ ลู่ง อ ซ้ะพ้า อ ทลื่งทไคล้ นอ, เพา ฌี้เละ ทซู ได้ะ แบเด้าะ นอ เก น้ะ, พี่ ทึ้ทาง เว้ อ ซ้ะ เย้า
“ทไฌ่ คีงอูงคีงตู๊ง นอ อางโล๊ไท้ โละซ้ะ ล ฌี้ แม้ฆึ เท่อ ดี๊ โพล้งอ้าโพล้งซ๊าง ลู่ง ท เก พีงญาง ซ้ะ อ้า นอ ล ฌี้
อ ซื๊งเว๊ เฌา กไบล้ะกแบล, ลือ เท่อ กุ้ เม้ง ไจ เซ๊วีงซ๊องแล้ เท่อ อ ซื๊งเว๊ ซีง ลแพ, เก ท่องโฌ้ ดี๊ เก ท้ะ อ เว๊ กุ้แฌ้ แม้อ้าแม้ซ๊าง เท่อ เลาพะ
“อวีงซ้ะชู้ เกม๊า กุ้แฌ้ ปโล่ปด้าง อ ฌุ้พาง ดี๊ อางกีล้าง ซ้ะ ดี๊ น๊างพื่งวี่ น่างแฌ้ ล ฌี้ เฆาะ เป๊งนี่ น๊างพื่งวี่ กุ้แฌ้ นอ, เก โพล้ง แซย๊กไบล้ะ ดี๊ ฌุ้พาง กุ้แฌ้ นอ, ลี้ ไจ ไคล้ ซี๊งเคพะเพิ่ง โพล้ง อ แฌ้แพ
ไจทางไจล้าง ไคล้ แช๊คูดูซ้ะ เท่อ ลู่ง น กแช่ อชื้ออชะ อซุ้อแกล้ ล ฌี้, ดี๊ ซี๊งเคพะเพิ่ง น ฌุ้พาง อ ทโอม๊า ล ฌี้, เฆ้อ เมะเว๊ ยาเว ล้อ
ซาอู ซ้ะเม ดาเว แอทาง, ซาอู เก ดาเว อดีงอแด้ เพล้า อ ชู้ ล้อ
