13 ลู่ง โพล้ง โอ ดี๊ ทแนซีโน้งซี อ นุ้ นอ, ม แด ทโกงซีมองแบ แบเด้าะ นางพลี นอ, เกิ้ง ดี๊ โพล้ง พี่ ล โอ ดี๊ ท ซีงแฌ๊ล้างซ้ะ แบ นอ อ โคล๊ง ล้อ
เก บี่ซุ้ดี๊ กซี-อ้า, แนว้-อ้า, พี่ อ แน เท่อ ลซีแบ นอ ล ฌี้ พี่ แบ จ้าทาง พลี้ง พ้ะตไระ อ นุ้ ดี๊ กื่ง เมะ ล แม้ บี่นอ แบ นอ, อ ล เฌ๊เบ้า แน้ แบ
โพล้ง ทแบกแช่แยว้อซ้ะ อ นุ้ นอ, ไคล้ทาง ทโกงซีมองแบ ดี๊ อ พลี้, ไคล้ ทอเกิ้งอแบ
กแช่ยาเว ไคล้ ดี๊ โมเซ ไจ้ะเว๊, “เกม๊า น เยาฆ้าง น จูง ลู่ง ค่าง อีไย้ะ คูด้าง นอ, ฌ้อง ทวี่ น๊างมู๊ง ม เฌ๊ทาง ลู่ง ค่าง อีไย้ะ พ้า, ดี๊ ม อาง ทดุ้ทแล กุ้เม้ง ลู่ง ฌางคู คู, พี่ มื่งแซ ล้าง แม้ เฌ๊ฌ้อง เว๊ โอก้ะ ลแพ นอ”
โพล้งแบกแช่แยว้อซ้ะ อ นุ้ นอ, ลื่ง โพล้ง แอฌี่งแอฌ้อง แบเด้าะ โพล้งเซ๊กูเฌ๊ฌ้อง นอ, ซี๊ง ลู่ง ล ซีงแฌ๊ล้างซ้ะ แบ อกย้อง
โพล้งแบกแช่แยว้อซ้ะ อ นุ้ นอ, เกม๊า ทโกงซีมองแบ แบเด้าะ โพล้ง คีงอูงคีงตู๊ง อ พลี้ นอ, ม แบ ทแม้ไฆวะ-อ้ะ
โพล้ง พี่ โอ ดี๊ ทไคล้ช๊า อเกิ้งอด้าง ลู่ง อ นุ้ พ้า นอ, เซิงมึซ้ะมึ ล้อ ทไคล้ ล ทีง, พี่ แบเมาะแบเค้อะ นอ, ฌี้ เต้ๆ
โพล้ง โอ ดี๊ ทโกงซีมองแบ นอ, แม้ แอทางเล่ทาง ทซีงแฌ๊ แบเด้าะ โพล้งเซ๊กูเฌ๊ฌ้อง อ ซ้ะ นอ, ล แม้ อ ซ้ะ บี่นอ แบ
โพล้ง โอ ดี๊ ทโกงซีมองแบ นอ, กุ้-อ้ะเก โพล้ง โอ ดี๊ ทแนซีโน้งซี ดี๊ ทไคล้ ลู่ง อเพาอเบ้ นอ, แม้ แอทาง ทซองทซ๊าง อ ดู้ง อ ยาง
ทโล้ทละ นึฆ้าง ลู่ง โพล้ง, พี่ โอ ดี๊ ทแนซีโน้งซี อ ซ้ะ พ้า โยะเละ ทพลีทท่าง โพล้งเซ๊กูเฌ๊ฌ้อง อ ทีง ล แย้ นอ ได้ะ
ท ต้ะเซ๊ง โอ เว้ เมาน่าง, ลู่ง โพล้ง พี่ เฌา แม้ไฌ๊ซ้ะ เท่อ อ ฌ่าง ดี๊ ทพลีทท่าง นอ, โอ เว๊ ลู่ง โพล้งเซ๊กูเฌ๊ฌ้อง อ โคล๊ง อ ฌ่าง ล้อ
โอ ดี๊ ท๊อง ดี๊ โอ ดี๊ ทแมล่ โฌ้ แอฌี่งแอฌ้อง แบเด้าะ นุ้ พี่ โอ ดี๊ ทซีงแฌ๊ นอ, เก เท่อ พี่ อ ลื่งดูฆวี้ดู เต้ๆ
นางเป้ ลู่ง กซี อ ฌ่าง, กื่อ ลู่ง แลว้ อ ฌ่าง ดี๊ นางพลี ลู่ง โพล้งเซ๊กูเฌ๊ฌ้อง อ โคล๊ง อ ฌ่าง
แม้นี่ โพล้ง เซ๊กูเฌ๊ฌ้อง, ชวี๊งล้าง เชิงพู พ้า, อางชื๊ง ดี๊ เชิงพู ที ล พ๊าฆ่าง ดี๊ บืงแซ นอ โพล้ง เซ๊กูเฌ๊ฌ้อง นอ, อ เซ๊กูเฌ๊ฌ้อง เว๊ ได้ะ นอ ล้อ
กแคว๊ พี่ เอโบ้งเอพะ เท่อ นอ, ล โอ ดี๊ ท ซีงแฌ๊ล้างซ้ะ แบ โพล้งเล้ แม้ เท่อ บี่นอ, แม้เฌ๊ฌ้อง ล้าง อ ซ้ะ ล้อ
อ เว๊ ลี้โพะ กมืง อ ไค๊ ลทีงฆ่าง ล้อ ด้องซุ้ งู้แพ๊ ลี้ ลู่ง ทแม้ซี๊งแม้แช๊ พ้า ด้องซุ้ ทโฆ้ ลี้ฆ้าง แบ ทดุ้ทเช พ้า
ทอดูทึโท๊ทึ กแช่ยาเว เกล๊าง เอะ แย้ เกม๊า จ โอ ดี๊ โพล้ง พี่ นี่แบ ทซองทซ๊าง อ พลี้ บี่ซุ้ จ ม ซีงแฌ๊ ทดุ้เฌิ่ง ทะ เมะเว๊ ดุ้เฌิ่ง ทะ โพล้ง พี่ ล้างเพาล้างแช่ ดี๊ ทไคล้ กุ้ มื่ง โฌ้ นอ, กแช่แยว้ กุ้ เฌ้เทิง-อ้ะ กแช่แยว้ กุ้ เฌ้เทิง จ แน่ บี่ซุ้ เกม๊า คุ้ช๊องแน เท่อ, บี่ซุ้ดี๊ โพล้ง นี่แบ ทซองทซ๊าง
โพล้ง กุ้ อ แฌ้ อางปฆ้า แบ-อ้ะ, ล้ะ เซิง ล้ะ ซ้ะ ดี๊ อ ท ไคล้ พี่ อ โล้ เว๊ เมะ เว๊ โอ ดี๊ อ บลึ้ อ บลาง อ มึ อ พ้า, โพล้ง ไจ้ะ เว๊, “ล แฌ้ อี้ง เก โยซิ้ อ พูแคว๊, ล เมะ แบ-อ้า”
