7 กจุ้แฆว้ มืง แบ ท เบ้าะล้างไฆวะ อ ฆ้าโฆ่, ดี๊ แบ ท ลี้ฌ้า กเย่ เพล่ มืง นอ, ฌางอื้งฌางโทะ อ ซื๊งเว๊ อ ลู่ง ล้างเพาล้างแช่, ด้องซุ้ ทูลี่งแอว้ อ ลู่ง ดี๊ ล แฌ้ๆ, นอ, ท่างล้าง อ ซ้ะแน๊
เกม๊า ท่าง ล้าง ซ้ะแน๊ แบฆ้ะ ดี๊ ฆึ้ ไชะ พี่ อมึอพ้า อไฌ่อกย้อง แบฆ้ะ ดี๊ ซไบ้ะ มื่ง อ แซ แอ อไฌ่อกย้อง
จ กุ้ซย้ะ บี่ซุ้ดี๊ เบลงบลาง, บี่ซุ้ดี๊ ทูแท้ที๊ง จ ฌาง บี่ซุ้ดี๊ ทูลี่งแอว้ จ เมะคลี๊ง ล้างไปว้ะล้างท้าง ดี๊ ท แคว่ทาง ลู่ง ท้ะโค๊ ทอดูทึโท๊ทึ จ กแช่แยว้-เอ้อ, จ แบ ท แคแนแคแก้, อวีงซ้ะชู้ เก เอะ แย้ ทเฌิ่งทค๊า
ก ซื๊งเว๊ กุ้แฌ้ ฌางล้างย้าล้าง บี่ซุ้ดี๊ ทซู๊ง ก ฌางอื้งฌางโทะ บี่ซุ้ดี๊ ทูลี่ง แอว้ ก มื้งแล่ ท อเกิ้งอแบ, แบเด้าะ ล โอ แบ เฆาะ มื้งแล่ ทพ้องทพลิ้, แบเด้าะ นอ, อ โอ ช้างชื้ง ไย้ ดี๊ เฆ้อ ล้อ
ดี๊ โพล้ง แฌ้ฌี้ๆ, เมะ พ้องพลิ้ ซี๊ง, ไจคุ้ซูงไฆวะ ซี นอ อ ซื๊งเว๊ ม โอ ทลู่ง คู อ เว๊ ม เก บี่ซุ้ดี๊ ทูลี่งแอว้ ลู่ง ทลู่ง คางไท้ะ ล แฌ้ๆ, นอ, ม ฌางอื้งฌางโทะ ลู่ง อ ท เด้เทาเด้บ้ะ อ กย้อง
ป้ะตู๊ง ลู่ง ที๊งกล้อง ลแพ นอ, แบ ท อุ้พ้ะ ทาง ฌ้อง บลาง นอ, ล้างฆ่อง เว๊ ล้อ
แคว่ แดเทา, น ซึ้พูมู๊ง นอ บี่ซุ้ดี๊ กมืง โอ ลู่ง นซุ้นแกล้ น ที๊งล่างค่างพ้า อ เว่ง ป้ะตู๊ง นอ เว่พ้ะ พ้ะเล่ อ ซ้ะ เอะ นดีงนแด้ มี อาง น ป้ะตู๊ง อ เจ้ล่าง เย้า
เปโต โอ เว๊ ลู่ง เด้า คว้าง พ้า ได้ะ, โพล้งลื่งเท่ออคูดูทึ อ เพล่ มืง ล แฌ้ เฌ๊ ฆ้าง
โพล้ง ลี้ ดี๊ กแช่ เยซู โอ ฌ้อง, กมืง โอ ตบลึ้ แฌ้ ปะ พี่ อ ฌาง แบ ย้า แบ-อ้ะ
โพล้ง ด๊าง มู๊ง พี่ อ เฌ๊ โอ ซยอง แคว่ ดุ้ เท่อ นอ, ท่อง อ แด แบ ท เก ทาง อ ซ้ะ บี่ อี้ง, อซื๊งเว๊ อ ซ้ะ เฌ๊ฌ้อง, ท่าง ล้าง อ ซ้ะแน๊ ไท้ ลู่ง อ เด้า ไวะ
