25 โพล้ง ล เด้า เมะ ที่พ้ะ ที่ล้าง โละ อ ซ้ะ นอ, เก ทาง เด้า ล ซี ล้า แบ ล้อ
ท่อง อ โจ้ ลแพ นอ, แด เว๊ อ แพ่ เอ โยซิ้ ฌี้เละ อซื๊งเว๊ ได้ะ นอ, แช๊เมะไฌ๊ซ้ะ ดี๊ โยซิ้, ดี๊ ไคล้มึไคล้พ้า เว๊ ดี๊-อ้ะ ล ซี แบ
แคว่เซ้อ, เก เท่อ อ ฌี้ ดี๊ เซิงมึซ้ะมึ ชี่แอเล้ พี่ น๊างพู่งวี่ โอซยอง โละซ้ะ เก ทฆู๊งทพุ้, ซ้ะ ลโพลงฆ่าง
ท อ มื่ง อ บ้าง เมะ ที่พ้ะ ที่ล้าง โละ ซ้ะ ตบลึ้ มู๊ง นอ, เก ทาง อ มื่ง อ บ้าง ล ซี ล้า แบ ล้อ
ม้างโค้ไล่ เมะ แช๊เมะ ล้าง อ ซ้ะ, ดี๊ อ มื่ง อ บ้าง เมะ ที่พ้ะ ที่ล้าง นอ ล เก ทาง ท น่าง เม้ง ล้า แบ, อ ดู้ง อ ยาง ม ทึ เว๊ ล้อ
แบเด้าะ น ซื๊ง เมะ ไอ โละ ซ้ะ ดี๊ แม้ อ้า โละ ซ้ะ นอ, น แบ ปโล่ ล้าง น ซ้ะ เมะ ฌี้, เมะ ล เมะ แบ ม เก ทาง ท เฌ๊ฌี่ง เฌ๊ฌ้อง ลู่ง น ซื๊ง ฌ่าง คี๊ง โค๊ เลา
อ ไฌ่ บี่ อี้ง, พี่ จอง เล้ ลู่ง อ โอ ดี๊ ท ไคว๊ โละ โญ้ง โละ ดี๊ ท แม้ ที่ กแช่ อ ซ้ะ นอ, อ นอ, เก ทาง ท โอ ฆู๊ง โอ พุ้ ล ซี แบ, ม โอ ดี๊ ท อ้า ท ซ๊าง กุ้ อ เม้ง นอ ล้อ
