26 ท มื้งแฆ่ นอ ทู ตรื้ง ทาง อ ซ้ะ ลู่ง โพล้ง ล แฌ้ นอ อ ล้อง, กุ้ ซย้ะ ทาง เท่อ พ้ะดู, ฌ้อง ไจ ทาง ไฆวะ เว๊ อ ล้อง ไวะ
กแช่ เยซู ไจ้ะ-อ้ะ, “เซ๊ ล้า ล ฌี้, ไจ ทาง ไฆวะ-อ้ะ เซ้อ”
โพล้ง ล มู๊ง นอ ล้ะ เซิง ล้ะ ซ้ะ น้ะ มะ, อางจ้ะ โละ อ ซ้ะ ไจ้ะ เว๊, “อ อี้ง เมะ ท เล้ ม เก ท ซอง ท ซ๊าง อ ซ๊าง ล้อ, ล แฌ้ อี้ง อางแม้เลา ท มื้งแฆ่ ดี๊ อ ดู้ง อ ยาง, ท มื้งแฆ่ ชู่ง อ ลู่ง, ฌ้อง อ เท่อ ไจ ทาง ไวะ”
โพล้ง ลี้ ม้อง-อ้ะ ท้อง อ ฌ๊างไท้ะ เฆาะ ท่อง ท มื้งแฆ่ แด แบ กแช่ เยซู นอ, อ เท่อ เกม๊า พืงแซ ล แฌ้ นอ ชุ้ ด๊าง แฌ้ เฆาะ, ล้างเทะเค้า เว๊ ลู่ง ฌางคู คู เพอะ, เฌ้พลื่ง เฌ้มวี๊ง, อ นุ้ ที๊ง ซโบง ซเบว้ ทาง
ต้ะ ท มื้งแฆ่ กุ้ ซย้ะ ทาง เท่อ เกม๊า พืงแซ ชุ้ น้ะ มะ, ฌ้อง ไจ ทาง ไฆวะ ไวะ, พืงแซ แคว๊ ล แฌ้ นอ มี๊งน้าง ตเทะเดะ แบ ด้อง ลู่ง ตจู, โพล้ง ล มู๊ง นอ แอ ลู่ง อ ไจ้ะ เว๊ แด, “ซี๊ง เย้า”
แบ เด้าะ พี่ โพล้ง อ ไฌ่ ชองนี่-อ้ะ, เฌ๊ แม้-อ้ะ ดี๊ น้า-อ้ะ นอ, อ เว๊ แม้ นี่ เว๊ อ เซ๊นะ, พี่ อ กแช่ อางกี ล้าง อ ซ้ะ ดี๊-อ้ะ, ฌ้อง อางน้าง อ ฆ้า อ โฆ่ พี่ อ ตมละ นี่ เว๊ นอ ล้อ
แบ พ๊าๆ, ท มื้งแฆ่ ทาง อ ล้อง, อ เว๊ กุ้ ซย้ะ ทาง เท่อ ล ทีง ฆ่าง, ฌ้อง ชุ้ ท้อง อ นุ้ที๊ง ซเบว้ ทาง, ท มื้งแฆ่ แม้ น้ะ แม้ โน๊ง เว๊, ล ญ่อง ไจ ทาง ไฆวะ แบ เฆาะ
พี่ พืงแซ ล แฌ้ เฌ๊ ฆ้าง นอ, ท มื้งแฆ่ แม้ ล้างเทะเค้า-อ้ะ ฌ้อง พืงแซ นอ ชุ้, แบ เด้าะ กแช่ เยซู โละซ้ะ ท มื้งแฆ่, ดี๊ แม้ แบล พืงแซ แคว๊ ล แฌ้ นอ, ฌ้อง อางกี ล้าง ไท้ เว๊ ดี๊ อ แพ่
