7 พี่ น ซื๊ง ชูแพ เท่อ นอ, ไคล้ เท่อ ล้างละ เป้าะแป้ะ, บี่ ซุ้ ดี๊ โพล้ง ล แบ้ แยว้ แบ ล แพ นอ แม้ เว๊ ล ฌี้, อ ไฌ่ บี่ อี้ง, อซื๊งเว๊ ช๊องมอง เว๊ ไคล้ เท่อ แอๆ, นอ เท่อ ม ช๊องแน-อ้ะ นอ
เมะเว๊ พี่ มี๊งม่าง เท่อ แอ นอ, ลเฌิ่งลค๊า แบ, ดี๊ ทไคล้ซยุ้ไคล้ซย้าง นอ แอ, เกม๊า น ดู้งแบยางแบ กแช่แยว้ ไช้ะ
กแช่ เยซู ไจ แด ไท้ อซื๊งเว๊ ลี้ ชูแพ เท่อ ล พ๊า เด้าะ บี่ ซุ้ๆ, ดี๊ อ ล่าง
อ ไฌ่ บี่ อี้ง, โพล้ง ล แบ้ แยว้ แบ ล แพ นอ, อางฆื๊ง นี่ ท ล เอ้า แย๊ อี้ง, แบ เด้าะ น แพ่ โอ ลู่ง มุ้คู ซีงแฌ๊ เว๊ เย้า, น ซื๊ง เกิ้ง นี่ แบ-อ้ะ กุ้ อ เม้ง
ท่อง โพล้ง ซีงแฌ๊ เว๊ อ เก โพล้ง ยู นอ กุ้ ซย้ะ ทาง เท่อ ล พ๊า ฆ่าง ไจ้ะ เว๊, “โพล้ง เอเฟโซ อ กแช่ มืง อาเทมี เก ทอดู ทึ ล้อ”, อซื๊งเว๊ กุ้ ซย้ะ เท่อ บี่ อี้ง นอ นี่ คี๊ง โมง
กแช่ เยซู ลี้ ชูแพ ไท้ เท่อ ล พ๊า เด้าะ ไจ้ะ เว๊, “จ แพ่-เอ้อ, โล๊ง ล เบง อี้ง พี่ อ โอ ดี๊ ท น้ะ ท โน๊ง, เมะ พ้อง ไฆวะ ดี๊ แย้ ล ซี แบ, จ เมะ แบ โอ้-อ้ะ ล โค๊ นอ, แคว่ ลู่ง น ซ้ะ นอ ล้อ”
กแช่ เยซู ลี้ ลู่ง แย๊ ล ปี๊ เด้าะ, คะด้ะ ล้าง อ ซ้ะ ท้อง ล้าง ลู่ง ฌางคู คู, ชูแพ เท่อ ไจ้ะ เว๊, “จ แพ่-เอ้อ, เมะ ลู่ง อ ซี นอ เกม๊า จ พ้อง ไฆวะ ดี๊ โล๊งล เบง อี้ง พี่ อ โอ ดี๊ ท น้ะ ท โน๊ง, แบ เด้าะ แคว่ จ ซ้ะ ล ฌี้, แคว่ ท๊อง น กแช่ อ ซ้ะ นอ ล้อ”
เมะ ล ญ่อง ช๊องแน อซื๊งเว๊ นอ แบ, น แบ ลี้ โล้ ล้าง ดี๊ โพล้ง ทื๊ง ซยอง เท่อ ล มู๊ง นอ, ทึ เมะ โพล้ง ทื๊ง ซยอง เท่อ ล มู๊ง นอ เมะ ล ช๊องแน เว๊ ได้ะ แบ, เกม๊า น ทื๊ง โย๊-อ้ะ อ เว๊ ล แฌ้ นอ, เก บี่ ซุ้ โพล้ง ล แบ้ แยว้ แบ, ดี๊ บี่ ซุ้ โพล้ง กิ้ นี่ ท อ ค๊อง นอ ล้อ
