7 โพล้ง พี่ อ ย๊างเซิง ย๊างซ้ะ แบ โพล้ง อ แฌ้แพ นอ, โอ ดี๊ ท มึ ท พ้า เมะ เว๊ กแช่ แยว้ ม ย๊างเซิง ย๊างซ้ะ ช๊า ไท้-อ้ะ
โชะไฆวะ ล่างมี๊ง, อ้างที๊ง ดี๊ ทพ้าทล่าง พี่ เก ฌางคู, บืง ซาลี, บืง บาเล, ดี๊ ฌื๊งไน้ะ, เกิง, ทุ้แซ โฌ้, ดี๊ ทุ้แซ คลี๊ง
“กแช่แยว้ เนโพลทาง อ ซ้ะ ลู่ง อโต้อล้อง, ดี๊ โพล้ง พี่ อโต้อล้อง อ เว๊ เนโพลทาง อ ซ้ะ เก โพล้ง ลู่ง อฌี้อแบ, ดี๊ โพล้ง ลู่ง อฌี้อแบ
ทพ้าง เฌ๊ทาง ลู่ง ทไค้ะซ๊า พ้า, เกม๊า เอะ โพล้งโต้โพล้งล้อง อเว๊ เก โพล้ง พี่ โอ ดี๊ อบลึ้อบลาง, ท ย๊างเซิงย๊างซ้ะ, ดี๊ ทแบกแช่แยว้อซ้ะ
อเว๊ เจ่ เอะ โพล้ง อ เท่อ, อเว๊ เกล๊าง เอะ โพล้งซยางโพล้งน้ะ อ เท่อ อ ทแบกแช่แยว้อซ้ะ โอเฌิ่งโอค๊า ล้างชู้ล้างแกย อเว๊ ม โอ ดี๊ อดู้งอยาง ดี๊ อฆี๊งอแล้
กแช่แยว้ เนโพลทาง อ ซ้ะ โต้ล้อง, ดี๊ โพล้ง พี่ อโต้อล้อง กแช่แยว้ เนโพลทาง อ ซ้ะ, ล โอ ดี๊ ท ไจ้ะแบ, ดี๊ โพล้ง พี่ อ ท ไจ้ะแบ-อ้ะ ล โอ แบ นอ ล้อ
อเว๊ อ ซ้ะโพล๊, ดี๊ เกม๊า อางล่องนี่ เท่อ ครึๆ ดี๊ อชื้ออชะ นอ, เก ทชูฌี้ชูแอว้
โพล้ง พี่ โอ ดี๊ ท ย๊างเซิงย๊างซ้ะ นอ, เกม๊า ท ล้างเปิ่ง ลู่ง อ ฌ่าง แบเด้าะ โพล้ง พี่ อดู้งอลู่ นอ, แม้เจ้าแม้แช๊ ไท้ อ กแช่ ล้อ
โพล้ง พี่ เซิงโพล๊ซ้ะโพล๊ นอ, เกทางเกโท๊ โพล้ง พี่ เกล๊าง เอะ โพล้ง อ ที๊ง นอ, นี่แบ ไท้ ที๊ง ล้อ
โพล้ง พี่ ดึ้เดวทื่งแช้ อ ฌุ้พาง นอ, เก โพล้ง ทเด้บ้ะ แบเด้าะ โพล้ง พี่ อ ย๊างซ้ะ แบ โพล้งซยางโพล้งน้ะ นอ, โอมึโอพ้า ล้อ
โพล้ง พี่ อ ย๊างซ้ะ โพล้งซยางโพล้งน้ะ นอ, เกม๊า กแช่ยาเว อางล่อง นี่ อ เท่อ ดี๊ กแช่แยว้ ม ม๊าแกไท้ อ ทแม้
โพล้งแบกแช่แยว้อซ้ะ ซี๊งไฆวะ ดี๊ โพล้ง ล โอ ควี๊งคูแกยแน่ เว๊ น่างแฌ้ แบ โพล้งโต้โพล้งล้อง แบ ท แม้นี่ไฆวะ-อ้ะ พี่ โพล้ง ล โอ แน เว๊ ซี น่างแฌ้ แบ เมะเว๊ โพล้งแบกแช่แยว้อซ้ะ นอ, แบ ท แม้นี่ไฆวะ ดี๊ ทอ้าทน้ะ
จ กจุ้แฆว้-เอ้อ, อกย้องบี่นอ, เกม๊า น ฮะนี่ จ ทโล้ทละ อี้ง, เกม๊า น โอโท่ไฆวะ ดี๊ ทแม้ ทเด้บ้ะ, ลู่ง ทแม้ ทฌี้ทแอว้, ดี๊ แม้ ทเด้บ้ะ ออ้าอซ๊าง ล้า แบ, ลู่ง ท เนโพลทาง ทย๊างซ้ะ ดี๊ โพล้ง พี่ อ แบ ท แคแนแคแก้, แบซีงลู่ง น ท เกทางเกโท๊ ม เยาทางโท๊ทาง ซี ได้ะ ”
โอก้ะ ลู่ง ไค๊ น่าง โกเมอ ด้าทาง ได้ะ, ดี๊ อ พู กึทาง อ มืง ล แฌ้, ดี๊ กแช่แยว้ ไคล้ ดี๊ โฮเชยา ไจ้ะเว๊, “พูมืง นอ, เกม๊า น ยื่ง อ เม้ง บี่อี้ง, โลรุ้ฮะมา เมะเว๊ ก ล ย๊างซ้ะ แบ อีซลาเอง อชื้ออชะ ล้า แบ, ก ล แพล่ไฆวะ อ ทไพ้ะทแม ล้า แบ เฆาะ
เกม๊า น กุ้ น พื่งแคว๊ ลแพ นอ บี่อี้ง, “อางมี” เกม๊า น กุ้ น พื่งมืง ลแพ นอ บี่อี้ง, “รุ้ฮะมา>>
ก ม ฆวีงล้าง-อ้ะ ลู่ง ที๊งล่างค่างพ้า ลู่ง ก ฌ่าง ก ม ย๊างซ้ะ แบ โลรุ้ฮะมา ดี๊ ก ม ไคล้ ดี๊ โลอางมี บี่อี้ง, ‘น เก ก พู ก ลี้ง’ ดี๊ อ เว๊ ม ไจ้ะ บี่อี้ง, ‘กแช่ เก จ กแช่แยว้ ล้อ’,”
กโพล้ง-เอ้อ, กแช่แยว้ เนโพลทาง เอะ แน้ เย้า, ทเม้งเล้ ฌี้? ดี๊ กแช่ยาเว แบซ้ะ ทเม้งเล้ ดี๊ แน้? เมะเว๊ เกม๊า น แม้ ท อเกิ้งอแบ, ดี๊ เกม๊า เอ ท ย๊างซ้ะ ดี๊ เกม๊า โอม๊า ดี๊ น กแช่แยว้ ดี๊ ท ชางล้าง ซ้ะ
พี่ น ซื๊ง ชูแพ เท่อ อ โท้ นอ, ทื๊ง นี่ นะ นี่ โพล้ง พี่ อ แม้ ไพ้ะ แบ น ซื๊ง น่าง แฌ้ ล้า ล ฌี้, บี่ ซุ้ น แพ่ โอ ลู่ง มุ้คู นอ ล ทื๊ง นี่ นะ นี่ น ท ไพ้ะ ท แม ล้า แบ ปะ ล้อ”
แบ เด้าะ เอ โพล้ง พี่ แช๊เมะ ไฌ๊ซ้ะ ดี๊ น ซื๊ง, แม้ ท อ ฌี้, เกม๊า โพล้ง อางล่อง น เท่อ, มื้งแล่ นี่ ไท้-อ้ะ ล ฌี้, ฌ้อง น ซื๊ง ม นี่ แบ ท อ บลึ้ ดู มะ ดี๊ น ม เก แบ กแช่ แยว้ โท๊ ทึ อ พู, เมะ เว๊ กแช่ แยว้ อ เซิง ฌี้ ซ้ะ ช้า ดี๊ โพล้ง อ้า โพล้ง ซ๊าง, ดี๊ โพล้ง ล นาง อ เว๊ อ บลึ้ อ บลาง แบ
น ซื๊ง พี่ น เก โพล้ง ล ค่าง แด นอ, ลู่ง เอะ อู้ง น ซื๊ง ล ชู่ง กแช่ แยว้ แบ, แบ เด้าะ ค๊องเนง อี้ง น ซื๊ง นี่ แบ อ ท ย๊างเซิง ย๊างซ้ะ, เป๊งนี่ โพล้ง ยู ล ชู่ง กแช่ แยว้ แบ
ค๊องเนง อี้ง จ ม ไคล้ ช๊า น ซื๊ง ทอางจ้ะ แบฆ้ะ ดี๊ โพล้ง ล ทาง แซย่ ได้ะ แบ, แย้ จ ไคล้ เท่อ อี้ง ล เมะ กแช่ แยว้ อางแบเลา แย้ แบ, แบเด้าะ จ ม ไคล้ เท่อ พี่ จ ช๊องมอง-อ้ะ, บี่ ซุ้ โพล้ง ล แฌ้ ลู่ง กแช่ แยว้ ย๊างเซิง ย๊างซ้ะ-อ้ะ, ท บี่ นอ, น ซื๊ง อางกี ล้าง น ซ้ะ ดี๊ แย้ ซี
ลู่ง กแช่ แยว้ ย๊างซ้ะ แบ เฆ้อ อ กย้อง นอ, อ เว๊ อางกี ล้าง เอะ ก ท ไพ้ะ ท แม้ อี้ง, ท บี่ นอ ก ซ้ะ ล ล้างท่อง แบ
แบเด้าะ แบ โอ ดี๊ ท ย๊างเซิง ย๊างซ้ะ ดี๊ ท เซิงช้า ซ้ะช้า โละ ซ้ะ, ทื๊ง นี่ นะ นี่ โละ ซ้ะ ล ฌี้, บี่ ซุ้ กแช่ แยว้ ล ทื๊ง นี่ นะ นี่ น ซื๊ง แบ ปะ ลู่ง กแช่ เยซู คริ้ อ กย้อง นอ ล้อ
น ซื๊ง เก กแช่ แยว้ อ พู อ ลี้ง, อ เว๊ เอ น ซื๊ง กวี้ง น ซื๊ง ดี๊ อางลึ นี่ น ซื๊ง ม เก อ เท่อ แด เว๊ ท บี่ นอ, น ซื๊ง แบ โอ ดี๊ ท ย๊างเซิง ย๊างซ้ะ, ท เซิง ช้า ซ้ะ ช้า, ท ชาง ล้าง เซิง ชาง ล้าง ซ้ะ, ท เซิง ฌี้ ซ้ะ ช้า, ท เอ้า เซิง เอ้า ซ้ะ
ทึ เมะ ลู่ง เอะ อู้งนอ, จ ไคล้ อ้า ไคล้ ซ๊าง แบ กแช่ เยซู คริ้, ดี๊ จ แม้ น้ะ แม้ โน๊ง แบ-อ้ะ น้ะ มะ, ดี๊ จ ดึ้เดว ทื่งแช้ แบ-อ้ะ ฌี้ๆ, แบเด้าะ กแช่ แยว้ ย๊างเซิง ย๊างซ้ะ แบ แย้ ได้ะ, เมะ เว๊ พี่ จ แม้ บี่ นอ จ ล ทื๊ง ล นะ กแช่ เยซู คริ้ ได้ะ แบ, จ ล ซีงแฌ๊ แบ เมะ จ แม้ ท เม้ง เล้
แบเด้าะ กแช่ แยว้ ย๊างซ้ะ แบ แย้, บี่ ซุ้ กแช่ เยซู คริ้ ม เนโพล ทาง อ ท เอ้า เซิง เอ้า ซ้ะ ท้อง อ เลา กุ้ อ เม้ง ดี๊ แย้, พี่ จ เก โพล้ง ท เด้บ้ะ ลู่ง อ ดู ทึ ล แฌ้, บี่ ซุ้ ม เก ท อ ด้อง เอะ โพล้ง กุ้ อ แฌ้, พี่ ม ชู่ง ไท้ นะ ไท้ กแช่ เยซู คริ้, ดี๊ นี่ ท ม๊า ล้างชู้ ล้างแกย
ท บี่ นอ, เกม๊า ก โอ ดี๊ เซิง เบิง ซ้ะ เบิง พี่ ม ลี้ ลู่ง กแช่ แยว้ อ เมะแซ พ้า, ลู่ง อ โอ ดี๊ อ โก้ง อ โบ้ง อ บลึ้ อ บลาง, บี่ ซุ้ ก ม นี่ แบ อ ท ย๊างเซิง ย๊างซ้ะ ดี๊ อ บลึ้ อ บลาง ลู่ง ม แม้ช้า เฆ้อ, พี่ ล โท้ แย๊ ก แบ ซ้ะ-อ้ะ นอ ล้อ
กแช่ แยว้ ต้ะเซ๊ง เท่อ ลู่ง อ เกิ้ง อ แบ, อ เว๊ นาง แบ น ซื๊ง ท ไพ้ะ ท แม้, ดี๊ นาง แบ น ซื๊ง ท เอ ท กวี้ง พี่ น ปล้ะ ล้าง เอะ-อ้ะ ลู่ง น ซื๊ง แม้ช้า อ พู อ ลี้ง อู้, ดี๊ แม้-อ้ะ ค๊องเนง อี้ง ปะ
อ ไฌ่ บี่ อี้ง, ลู่ง กแช่ แยว้ ต้ะเซ๊ง เท่อ โคะ นอ, อ เว๊ ล ย๊างซ้ะ แบ โพล้ง ลู่ง อ ท ย๊างซ้ะ ล โอ แบ นอ ล้อ, แบเด้าะ ท ย๊างซ้ะ นอ แม้ น้า แบ ท ต้ะเซ๊ง นอ ล้อ
แบเด้าะ ท โกง ท มอง พี่ กแช่ แยว้ เกล๊าง เว๊ นอ, เมะ ท อ ฌี้ อ แอว้, ท โอ ฆู๊ง โอ พุ้, ท เซิง ฌี้ ซ้ะ ช้า, ท อ ยื่ง อ บยาง, ท โกง ท มอง อี้ง นอ, โอ ฆวี้ ทะ ดี๊ ท ย๊างเซิง ย๊างซ้ะ ดี๊ ท แม้ ลู่ง อ ฌี้, ล เอน้า ชางบ้า เท่อ แบ, ล เมะ โต้ ซ้ะ ไก เท่อ แบ
ลู่ง อ ซ๊าง คู นอ, น ซื๊ง ล เก กแช่ แยว้ อ พู อ ลี้ง แบ, แบ เด้าะ ค๊อง เนง อี้ง น ซื๊ง เก ก้ะ กแช่ แยว้ อ พู อ ลี้ง เย้า, ลู่ง อ ซ๊าง คู นอ, น ซื๊ง ล นี่ แบ กแช่ แยว้ อ ท ย๊างเซิง ย๊างซ้ะ แบ, แบ เด้าะ ค๊องเนง อี้ง น นี่ แบ กแช่ แยว้ อ ท ย๊างเซิง ย๊างซ้ะ เย้า
