1 พ้องไฆวะ ฆู๊ง นี้ง นอ, กแช่ เยซู กุ้ นี่ เปโต, ยาเก้า, ดี๊ ยาเก้า อ พื่ง แคว๊ โยฮาง, ลี้ ทาง ฌ้า เว๊ ลู่ง ท ลู่ง พ้ะโท๊ คู ลี่ง แฌ้ ล้อ
กแช่ เยซู อ เค่ง อ ฌ้าง เปลง ไฆวะ อ ซ้ะ ลู่ง อซื๊งเว๊ซีง อ เมะแซ พ้า, อ เมะ พ้าง ทาง ด้อง ซุ้ มื่ง พ้าง, อ ไช๊ อ ช้าง แอว้ ทาง ด้อง ซุ้ ท โฌ่ง ท พ้าง
กแช่ เยซู เกม๊า เปโต ดี๊ เซเบดี อ พูแคว๊ คี๊ง แฌ้ ลี้ ดี๊-อ้ะ, อ ซ้ะ ล มึ แบ น้ะ มะ, ท อึ้เซิง ก้ะซ้ะ แบ กแช่ เยซู เต้ๆ, ล้อ
ท่อง อ ช๊าง นอ กแช่ เยซู ชี๊น้าง ลู่ง ท ลู่ง ไพ มื่งเทิง อ คู, โอ ฆ้าง โละ อ ซ้ะ ดี๊ กแช่ แยว้ อ เว่งฮ๊าง, เปโต, ยาเก้า, โยฮาง ดี๊ อางดรู ลี่ง แฌ้ เฌ๊ โอ-อ้ะ ลู่ง โพล้ง อ แฌ้แพ ล โอ น่าง แฌ้ แบ
ท่อง อ ช๊าง นอ, กแช่ เยซู เกม๊า โพล้ง อ แฌ้แพ ลี้ โพะ อ ไค๊ น่าง แฌ้ ล้า เอะ, เกม๊า ที่ เปโต, ยาเก้า ดี๊ โยฮาง พี่ อ เก ยาเก้า อ พื่ง, ลี้ โพะ อ ไค๊ ซ๊า แฌ้ นอ ล้อ
พี่ กแช่ เยซู เฌ๊ ท้อง ลู่ง อ เด้า นอ, อ เว๊ ล เกม๊า โพล้ง ลี้ นึ ฆ้าง น่าง แฌ้ แบ, เกม๊า ที่ เปโต, โยฮาง, ยาเก้า ดี๊ พืงแซ อ มู่ อ แพ่ นึ ฆ้าง ดี๊-อ้ะ
อ อี้ง เก ซ๊า พ๊า ล พ๊า พี่ จ ม เฌ๊ โอ น ซื๊ง, นาง แบ ไละ ฌี้ ไละ แอว้ อ ท ไคล้ พี่ อ ไจ้ะ เว๊ “น เมะ ด้อง โพล้ง ล เม้งๆ, นอ, อ พีงญาง แบ โอ คี๊ง แฌ้ ซ๊า แฌ้ บี่ ซุ้ ม นะ ซี”
พี่ ก โล้ ล้าง เอะ น ซื๊ง, แบฆ้ะ ดี๊ ก กแช่ เยซู คริ้ ม เฌ๊ ไท้ ดี๊ อ ซยื๊ง อ ซย้อง โคะ นอ, ล เมะ ก อางโล๊ไท้ ท ไฌ่ พี่ โพล้ง ไต้ทาง นี่ เว๊ นอ แบ, แบเด้าะ ก แด แบ อ เว๊ อ ฆี๊ง อ แล้ อ โฌ่ง อ พ้าง ดี๊ ก เมะ
เฆ้อ ก แน่ฌ๊า ท อ ลู่ง อี้ง โอ ลู่ง มุ้คู โซ๊ง ล้าง, พี่ ก โอ ดี๊ กแช่ เยซู ลู่ง ท ลู่ง ฌี้ ลู่ง แอว้ อ คู นอ ล้อ
