43 โพล้ง กุ้ อ แฌ้ ล้ะ เซิง ล้ะ ซ้ะ ดี๊ กแช่ แยว้ อ ซยื๊ง อ ซย้อง อ ดู้ง อ ยาง น้ะ มะ พี่ โพล้ง กุ้ อ แฌ้ ล้ะ เซิง ล้ะ ซ้ะ ดี๊ กแช่ เยซู อ ท ไพ้ะ ท แม้ กุ้ อ เม้ง ได้ะ นอ, อ เว๊ โล้ เอะ อ พู อ ลี้ง บี่ อี้ง
จ ไจ้ะบลึ้ กแช่แยว้, เมะเว๊ กแช่แยว้ ไต้ล้าง แย้ ลู่ง อล้ะอเล่, ล้าง ยางแบซ้ะเม ล้อ กเย่ กแช่แยว้ อ ทไพ้ะทแม้ นอ อล้ะอเล่ จ ซีงแฌ๊ ฌี้ มะ ล้อ
กแช่ยาเว ซึ้คู ดูทึชองทึ ไจ้ะเว๊ บี่อี้ง, ท ล ไฌ่ อี้ง เมะ เก ท ไฌ่ ล้างลู่ล้างล้ะ, ลู่ง โพล้งเฌงพูฆ๊างพู พี่ ล้างลื๊อ โอก้ะ ล ชู้ แย๊ อี้ง อ ฌ่าง นอ, กแช่ยาเว ซึ้คู ดูทึชองทึ ไจ้ะเว๊, เกิ้ง ม ล้างลู่ล้างล้ะ ลู่ง ก ฌ่าง ปะ โบ่?
พี่ กแช่ เยซู ดี๊ อ พู อ ลี้ง ซีง, เฌ๊ โอ ซยอง กาเลลี้ อ ค่าง พ้า นอ, กแช่ เยซู โล้ เอะ อซื๊งเว๊ ไจ้ะ เว๊ แด, “โม่โคะ เด้าะ โพล้ง ม พองนี่ โพล้ง ฌางคู พู, ฌ้อง ม อ้ะล้าง เอะ โพล้ง พี่ อ โอ ดี๊ อ ดู้ง อ ยาง
ท่อง อ ช๊าง นอ, กแช่ เยซู ทาง โอ ดี๊ อซื๊งเว๊ ลู่ง คลี๊ง คู เฆาะ, ต้ะ ลี้ง ล้างแม่ ประ, อซื๊งเว๊ซีง โท๊โย๊ เฆาะ
ล ทีง ฆ่าง นอ อ เว๊ แด ไท้ เท่อ ล้อ, ฌ้อง ลี้ โพะ ก้ะ กแช่ เยซู อ ไค๊ อางปฆ้า ทาง กแช่ แยว้, ท่อง โพล้งเฌงพูฆ๊างพู แด แบ เว๊ นอ, อางปฆ้า ทาง กแช่ แยว้ กุ้ อ แฌ้ ล้อ
โพล้ง ล มู๊ง นอ ล้ะ เซิง ล้ะ ซ้ะ น้ะ มะ, อางจ้ะ โละ อ ซ้ะ ไจ้ะ เว๊, “ล แฌ้ อี้ง อ ท ไคล้ เมะ ม เก ท เม้ง เล้, อางแม้เลา ท มื้งแฆ่ ดี๊ อ ดู้ง อ ยาง อ ซยื๊ง อ ซย้อง, ฌ้อง อ เท่อ ไจ ทาง ไวะ”
โพล้ง กุ้ อ แฌ้ ล้ะ เซิง ล้ะ ซ้ะ น้ะ มะ, ไจ้ะ บลึ้ อางปฆ้า ทาง กแช่ แยว้, ซ้ะเม ซ้ะไพล้ เท่อ, ไจ้ะ เว๊, “ล นี้ง โย้ ก แด ท ล้ะ เมะ ล้ะ แน๊ เต้ๆ”
ซีโมง ดี๊ โพล้ง อ แฌ้แพ, พี่ อ โอ ดี๊-อ้ะ ล แพ นอ, ล้ะ เซิง ล้ะ ซ้ะ น้ะ มะ พี่ อ นี่ แยพู แอ บี่ นอ
กแช่ เยซู ไจ้ะ เอะ อ พู อ ลี้ง, “น ซื๊ง ท ชู่ง ท นะ โอ พี่ เล้” อซื๊งเว๊ ซ้ะเม เท่อ ดี๊ ล้ะ เซิง ล้ะ ซ้ะ ไจ้ะ โละ อ ซ้ะ, “เอ๊ ก ล แฌ้ อี้ง เมะ อ เก โพล้ง เล้, อางแม้เลา ลี้ง ดี๊ ที๊ง บู้ง ซีง, อ เท่อ ชู่ง เว๊ อ ลู่ง ประ”
พี่ พืงแซ ล แฌ้ เฌ๊ ฆ้าง นอ, ท มื้งแฆ่ แม้ ล้างเทะเค้า-อ้ะ ฌ้อง พืงแซ นอ ชุ้, แบ เด้าะ กแช่ เยซู โละซ้ะ ท มื้งแฆ่, ดี๊ แม้ แบล พืงแซ แคว๊ ล แฌ้ นอ, ฌ้อง อางกี ล้าง ไท้ เว๊ ดี๊ อ แพ่
พี่ ก โล้ ล้าง เอะ น ซื๊ง, แบฆ้ะ ดี๊ ก กแช่ เยซู คริ้ ม เฌ๊ ไท้ ดี๊ อ ซยื๊ง อ ซย้อง โคะ นอ, ล เมะ ก อางโล๊ไท้ ท ไฌ่ พี่ โพล้ง ไต้ทาง นี่ เว๊ นอ แบ, แบเด้าะ ก แด แบ อ เว๊ อ ฆี๊ง อ แล้ อ โฌ่ง อ พ้าง ดี๊ ก เมะ
