43 ซีโมง ไคล้ ช๊า-อ้ะ ไจ้ะ เว๊, “จ ช๊องมอง พี่ ล แฌ้ แย๊ อ โอ แม่ แอ ล แฌ้ นอ เซ้อ” กแช่ เยซู ไจ้ะ เว๊, “น ไคล้ แบ เย้า”
กจุ้แฆว้ ล แฌ้ นอ ย๊างซ้ะ แบ เว๊, แม้ ไท้ เว๊ น่าง เม้ง ล้า เอะ พี่ อ เท่อ โอ แม่ ดี๊-อ้ะ, ฌ้อง กูแพล่ เว๊ ไวะ นอ ล้อ
กแช่ เยซู ซีงแฌ๊ เว๊ อ เว๊ นอ ไคล้ เท่อ ดี๊ ท โกง ท มอง ฌี้ มะ, ฌ้อง โล้ แบ อ เว๊ แด, “น เบ้า ดี๊ กแช่ แยว้ อ มื่ง อ บ้าง เย้า” ลู่ง ไค๊ นอ โพล้ง อางจ้ะ กแช่ เยซู อ เท่อ เบิง น่าง แฌ้ ล้า เอะ ล้อ
พี่ กแช่ เยซู ดี๊ อ พู อ ลี้ง ลี้ เกล้ นอ, อ เว๊ นึ ฆ้าง ลู่ง เฌง พ้า ล เฌง, โพล้ง มืง โอ ล แฌ้ อ เม้ง มาทา ตองช้า ฮะช้า-อ้ะ, เกม๊า อ โอ ลู่ง อ เด้า พ้า
โพล้ง คี๊ง แฌ้ อี้ง ลุ้ ไท้ อ แม่ ดี๊ ท โอ น่าง เม้ง เอะ, ท บี่ นอ อ เว๊ แคว่ เว๊ อ เท่อ ล โอ แม่ ดี๊-อ้ะ ล้า แบ, โพล้ง คี๊ง แฌ้ อี้ง นอ พี่ ล แฌ้ เล้ ม เอ อ เว๊ ล แฌ้ นอ ดู ทึ”
ฌ้อง แกย ไท้ อ ซ้ะ แคว่ กมืง ล แฌ้ นอ, ดี๊ ไจ้ะ เอะ ซีโมง บี่ อี้ง, “น แด กมืง ล แฌ้ อี้ง ชี่-อ้า, จ เฌ๊ ฆ้าง น เด้า พ้า, น ล เกม๊า แย้ ที๊ง อางซฌ้ะ คาง แบ, แบ เด้าะ กมืง ล แฌ้ อี้ง อางซฌ้ะ จ คาง ดี๊ อ เมะที๊ง, ฌ้อง เท้า ซู๊ง ไฆวะ เว๊ ดี๊ อ คูซู๊ง
ท บี่ นอ จ โล้ เอะ แน้, พี่ กมืง ล แฌ้ โย้ เนโพล ทาง ท เอ ท กวี้ง แอ บี่ อี้ง นอ, เก ท แม้ไน ลู่ง อ ท เด้เทา เด้บ้ะ, พี่ อ โอ แอ ฌ้อง นอ แบ ท แม้ ไฆวะ เลา ปะ เย้า, แบ เด้าะ โพล้ง พี่ อ แบ ท แม้ ไฆวะ เอะ อ ท เด้บ้ะ แซย้ นอ, อ ท เอ ท กวี้ง แซย้ ล้อ”
