10 ฌ้อง กแช่ เยซู โล้ เอะ อซื๊งเว๊ บี่ อี้ง, “โพล้ง ล ชื้อ ม ดึ้ โละ ซ้ะ ดี๊ โพล้ง ล ชื้อ แด เด้าะ, ค่าง ล ค่าง ม ดึ้ โละ ซ้ะ ดี๊ ล ค่าง แด เด้าะ
ดี๊ ก ม ดึ้ เกม๊า โพล้ง อีไย้ะ ดึ้ โละซ้ะ ดี๊ โพล้ง อีไย้ะ ล แฌ้ๆ, ดึ้ โละซ้ะ ดี๊ อ กแช่ อพื่งอวี่ ดี๊ ล แฌ้ๆ, ดึ้ โละซ้ะ ดี๊ อ กแช่ อ ฌุ้พาง เว่ง ดึ้ โละซ้ะ ดี๊ เว่ง, บ้างมื่ง ดึ้ โละซ้ะ ดี๊ บ้างมื่ง
ล นี้ง แย๊ นอ, ท เติ้งทางเติ้งล้าง ลู่ง อดูอโท๊ เฌ๊นี่ ดี๊ กแช่ยาเว ม ล้างแบ อ ซื๊งเว๊, ฌ้อง โพล้ง ล แฌ้ ม พอง อ ฌุ้พาง อ จูง, ดี๊ อ เว๊ ม เยาทาง จูง ดึ้ซึ้ โละ อ ซ้ะ
โพล้ง ล ชื้อ ม ดึ้ โละ ซ้ะ ดี๊ โพล้ง ล ชื้อ แด เด้าะ, ค่าง ล ค่าง ม ดึ้ โละ ซ้ะ ดี๊ ล ค่าง แด เด้าะ, ฌางคู ม ว้ะ ล จองๆ, ท ซ้ะวี่ง ล้างดุ้ ม โอ ทาง ล จองๆ, ท ล แพ นอ ม เก ท น้ะ ท โน๊ง อ คางไท้ะ, ไยะ ทาง น้ะ ทาง ครึๆ, บี่ นอ ล้อ
ฌางคู ม ว้ะ พ้ะดู, ท ซ้ะวี่ง ล้างดุ้ ดี๊ ท เจ้า ท แช๊ น้ะ ม กึ ทาง ล จองๆ, ท ล้าง ซ้ะเม ซ้ะไพล้ ม เก ทาง, ดี๊ ท แม้ไน พ้ะดู ม เนโพล ทาง อ ซ้ะ ลู่ง มุ้คู
พี่ น ซื๊ง แน่ฌ๊า แบ ท ดึ้ซีง ดึ้ซึ้ ดี๊ ท เติ้งทาง เติ้งล้าง นอ, ซ้ะเม เท่อ ล ฌี้, ท ล แพ นอ แบ เก ทาง วี่ง, แบ เด้าะ ล ท้อง ท อ มื่ง อ แค๊ ลู่ง ท ไค๊ ทึ ได้ะ แบ”
ลู่ง อซื๊งเว๊ อ แกล้ นอ โอ ล แฌ้ อ เม้ง อากาโบ, กแช่ แยว้ อ วีง ฌี้ แล้ แอว้ เกม๊า อ ซีงแฌ๊ เว้ เท่อ, ต้ะ, อ เว๊ ชี๊เทิง โล้ เว้ เว๊ ท ซ้ะวี่ง ล้างดุ้ ม โอ ทาง ลู่ง ฌางคู โคล๊ง คู กุ้ จอง กุ้ ไจ้, (อ นอ โอ ทาง ลู่ง ทอดู ทึ เคล้าดีโย อ ชู้ แค๊ นอ ล้อ)
พี่ อ ไจ้ะ เว๊, “ล พ๊า เด้าะ โคะ นอ”, อ นอ เนโพล ทาง เว๊ เท่อ พี่ กแช่ แยว้ ไต้ ล้าง เว๊ นอ, ม แบ ท แม้ ว้ะ-อ้ะ ดี๊ ม แบ ท แม้ ไฆวะ-อ้ะ, บี่ ซุ้ เท่อ พี่ อ ว้ะ ล นี่ แบ ล แพ นอ ม โอก้ะ ครึๆ, ล้อ
