21 อ พูแคว๊ ล แฌ้ นอ ไคล้ ดี๊ อ แพ่ บี่ อี้ง, ‘แพ่-เอ้อ, จ แม้ ไพ้ะ แบ กแช่ แยว้ ดี๊ แม้ ไพ้ะ แบ แน้ เย้า, ล เกิ้ง ล้า แบ พี่ โพล้ง ม กุ้ แย้ เก น พู’
ดี๊ อ เว๊ ซ้ะอวีงแท๊ ลู่ง โพล้งเฌงพูฆ๊างพู อ เมะแซ พ้า, ไจ้ะเว๊ บี่อี้ง ‘จ นี่ แม้ แบ ทเด้บ้ะ, ดี๊ จ แด ทไพ้ะ เก ทอฌี้ แบเด้าะ จ ล แบ กแช่แยว้ อ ทแม้เตาแม้แต๊ แบ
เกม๊าเต้ ต้ะเซ๊ง น เพล่ ล ฌี้ เมะเว๊ ทโอม๊า ล โอ น่างเม้ง แบ, แบกแช่แยว้อซ้ะ ลู่ง กแช่แยว้ อ เมะแซ พ้า
จ นี่ แม้ ทเด้บ้ะ แบ กแช่แยว้, แบ กแช่แยว้ ล แฌ้ ล้อ ดี๊ นี่ แม้ ทอ้าทซ๊าง, ลู่ง กแช่แยว้ อ เมะแซ พ้า ทบี่นอ, กแช่แยว้ อเกิ้งอแบ ลู่ง ทต้ะเซ๊ง พ้า ดี๊ ลู่ง ทต้ะเซ๊ง พ้า นอ, ล โอ ดี๊ ทอางโกไจ้ะแบ น่างเม้ง แบ
เมาะ แฆว่ เว๊ น ญ่องฮะ น ทไพ้ะทแม บี่อี้ง, น นี่ กไบล้ะกแบล แบ กแช่ยาเว น กแช่แยว้ ดี๊ ไจ แม้ กเย่ ท กโช้งกแช่ อ แฌ้แพ อ ซ้ะ, ลู่ง เซง เซ๊งไจ้ะ แล๊แค๊ มื่งเทิง คางไท้ะ กุ้เทิง ดี๊ น ซื๊ง ล นี่ คุ้ช๊องแน ก ลู่ง แบ กแช่ยาเว โล้ เว๊ บี่อี้ง ล้อ
บี่ซุ้ น ม นางแบ-อ้ะ, ดี๊ โอ ดี๊ ท ฌางแช้, น ม อ้างทาง นุ้ ไคล้ ล้า แบ, เป๊งนี่ ฌางแช้เมะฌางแช้แน๊, พี่ ก เท้าไฆวะ ทแบอ้า ลู่ง ท กุ้เม้ง พ้า, พี่ น นี่ แม้ แบ-อ้ะ เย้า นอ”, ทอดูทึโท๊ทึกแช่ยาเว โล้ เว๊ บี่อี้ง ล้อ
ฌ้อง อ เว๊ เฌ้เทิง ทาง ไท้ ฌู อ แพ่ ไวะ พี่ อ ไท้ ล คลึ้ ท้อง ได้ะ แบ นอ อ แพ่ แด ฌู จู้-อ้ะ, ย๊างเซิง ย๊างซ้ะ แบ เว๊, ปชื่ง ลี้ ซยู๊ โพะ โฌ๊ง น๊าม๊า เว๊
แบ เด้าะ อ แพ่ อางแม้เลา อ เพล่ บี่ อี้ง, ‘ลี้ เมะ เพล, แม้ นี่ ไช๊แค่ พ้ะโท๊ ลู่ง อ ฌี้ ทึ ล เบง ดึ้ ซุ้ ทาง เอะ-อ้ะ, แม้ นี่ จูงไซ้ะ ดึ้ ซุ้ ทาง-อ้ะ ลู่ง อ จูง ล้อง, ดี๊ แม้ นี่ คางไพ้ะ ดึ้ ไย่ ทาง-อ้ะ
แบ ซีง ลู่ง น ดึ้เดว กแช่ แยว้ อ ท ย๊างเซิง ย๊างซ้ะ, อ ท โก้ง เซิง โก้ง ซ้ะ, อ ท เอ้า เซิง เอ้า ซ้ะ ดู ทึ ซีง ล แพ อี้ง นอ, น ซีงแฌ๊ ฌี้ เย้า กแช่ แยว้ ย๊างซ้ะ แบ แน้, เมะ เว๊ แบ ซ้ะ เกม๊า น เปลง ไท้ ซ้ะ อ ซ๊าง
ท บี่ นอ, น ซื๊ง แม้ เด้บ้ะ แบ น ด๊างพื่งวี่ พี่ อ ชู่ง นะ กแช่ เยซู คริ้, ดี๊ เกม๊า อ ท ซีงแฌ๊ ล้าง อ ซ้ะ พี่ ล ล้างเท่ง ล้างชิ้ ได้ะ แบ นอ เฌ๊ฌ้อง ไฆวะ ล น้า, เมะ บี่ นอ, น ซื๊ง แม้ เด้บ้ะ แบ กแช่ เยซู คริ้ นอ ล้อ
