14 พี่ อ กลู อ จี้ ล โอ ล้า แบ นอ, ท ซ้ะวี่ง ล้างดุ้ น้ะ โอ ทาง ลู่ง ค่าง ล เบง นอ อ พ้า, อ เว๊ อ ทอาง ท โอ้ ล โอ ล้า แบ
เป๊งนี่ อ นอ, กแช่ยาเว เกม๊า กจุ้แฆว้ อะซีเรีย อ ซึ้คู, คุ้ อางแบเลา ซึ้พู น๊างมู๊ง อ เท่อ นอ, เฌ๊ ดึ้ซึ้ อ ซื๊งเว๊ซีงลแพ, อ ซื๊งเว๊ซีง แม้นี่ ควี๊ บล้ะทะ มานาเซ, ดี๊ ซุ้ทะ เว๊ ดี๊ พลี้งท้ะ ท่องบ้าง, ดี๊ เฌ๊ฌ้า เว๊ ลู่ง บาบีโลง พ้า
โพล้งแบกแช่แยว้อซ้ะ อาง เท่อ บลิ้อาง แบเด้าะ โพล้งอ้าโพล้งซ๊าง อ ฌู่โพ๊ง นอ, ทอาง ลโอแบ
แคว่เซ้อ, ก เยาฆ้าง ก จูง ดึ้ซึ้ แน้, ดี๊ แม้ ล้างแซย้ น ค่างช๊า ดี๊ อางกีล้าง แน้ เอะ โพล้ง พี่ แช๊เมะไฌ๊ซ้ะ แน้, เกม๊า อ แม้ เท่อ ท๊อง แบ อ ซ้ะ, เมะเว๊ โพล้ง ฟีลีเตีย ลแพ นอ พี่ อ ฌางแช้ ลู่ง น ทไพ้ะทแม้ พ้า, พี่ น ซ้ะกวี้งล๊องก้อง เท่อ แอ ลู่ง ท มี๊งฆึ พ้า
ลู่ง ไค๊ ล แอ นี้ง แบ นอ, อ พู ไป้ะ อางกี ซยอง อ ท กุ้ อ เม้ง, ฌ้อง ลี้ ลู่ง ที๊ง ไย้ ค่าง ไย้, อ เว๊ แม้ อ ซ้ะ ล กลุ้ ล จ้ะ แบ, โละ กลู โละ จี้ ท้อง อ เลา
ฌ้อง อ เว๊ ลี้ แม้เล้ง เท่อ ดี๊ โพล้ง ล ค่าง นอ ล แฌ้, อ เท่อ เจ่-อ้ะ ลี้ บืงล้าง เอะ อ ทุ้ ลู่ง ฆึ้ แกล้ พ้า
