36 ซ๊า แฌ้ อี้ง น ช๊องมอง พี่ ล แฌ้ เล้, เก โพล้ง แบ ท ตมละ ล แฌ้ นอ อ ฌุ้พาง”
เปโต ไจ้ะ เว๊, “ลุ้ เซ้อ” ท่อง เปโต นึ ฆ้าง เด้า พ้า, กแช่ เยซู ไคล้ทาง วี่ง โย๊ เฆาะ ไจ้ะ เว๊, “ซีโมง-เอ้อ, นี๊ น ช๊องมอง บี่ จะ เล้, ท อ ค๊อง นอ โพล้ง เล้ แบ ลุ้ เอะ กจุ้แฆว้, โพล้ง ค่าง พ้า-อ้า, โพล้ง ค่าง อ แฌ้แพ ล จอง นอ-อ้า”
“น ซื๊ง ซีง ช๊องมอง บี่ จะ เล้ ลู่ง คริ้ ม เก โพล้ง เล้ อ ชื้อ อ ชะ” อซื๊งเว๊ ไคล้ ช๊า เว๊ ไจ้ะ เว๊, “เก กจุ้แฆว้ ดาเว อ ชื้อ อ ชะ”
ลู่ง ไค๊ ล นี้ง อ เว๊ ทึ้ ทาง อ จี้ คี๊ง แทะ เกล๊าง เอะ ล่าง มี๊ง อ กแช่, โล้ เว๊, ‘แฌแซ-อ้ะ ไช้ะ, เมะ แบ เลา จี้ แอ นี่ อี้ง นอ จ เมะ เฌ๊ ไท้ โคะ จ ม ลุ้ ไท้ เอะ แน้’
คู ซอง เท่อ เซ๊งพ้า ท้างพ้า ล แฌ้ นอ ไคล้ ช๊า เว๊, “ล แฌ้ แย๊ พี่ อ ย๊างเซิง ย๊างซ้ะ แบ-อ้ะ นอ” กแช่ เยซู โล้-อ้ะ, “ไท้ แม้-อ้ะ บี่ นอ เซ้อ”
โพล้ง คี๊ง แฌ้ อี้ง ลุ้ ไท้ อ แม่ ดี๊ ท โอ น่าง เม้ง เอะ, ท บี่ นอ อ เว๊ แคว่ เว๊ อ เท่อ ล โอ แม่ ดี๊-อ้ะ ล้า แบ, โพล้ง คี๊ง แฌ้ อี้ง นอ พี่ ล แฌ้ เล้ ม เอ อ เว๊ ล แฌ้ นอ ดู ทึ”
