34 ลี้ ฆ้าง ฌู เว๊ แม้ นี่ ตซู ดี๊ ซไบ้ะ แซ ที๊ง ลู๊ง ล้าง เว๊ อ พ้าล่าง ฌ้อง บอง เว๊ ดี๊ ตไก้ยะ, ฌ้อง เกม๊า เว๊ ทาง โอ อ แลว้ คู, ลี้ ฌ้า เว๊ ลู่ง ล่าง มี๊ง ล จอง ดี๊ แฌแซ เว๊
ท่อง โพล้ง ล แฌ้ อุ้พ้ะทาง เต่กเซ้าะ, ม แม้นี่ บืง เกม๊า แลว้ อาง, ลู่ง ทล่าง พี่ อ โอไปว้ะ นอ, อ เว๊ แด อ จี้ โอ เต่กเซ้าะ คูทุ้ นอ ล้อ
กแช่แยว้ แม้ก้องแย่ โพล้ง, พี่ อ ซ้ะ เฌ๊ฌ้อง น้ะ ดี๊ ไบ้ เอะ เว๊ อ พ้าล่าง
พี่ โมเซ โอไปว้ะ ลู่ง เกล้ อ แค๊ นอ, กแช่ยาเว เฌ๊ฌูง-อ้ะ, ดี๊ แบ อ ซ้ะ ม แม้ซี๊งไฆวะ เว๊
กมืง ล แฌ้ โย้, ฆวี๊ อ แม้ เว๊ ซี นอ แม้ เว๊ เย้า, อ เว๊ เฌ๊ ลู๊ง ล้าง ตซู น๊าม๊า ลู่ง จ ล้อง โย้, บี่ ซุ้ แม้ เว้ เท่อ ลู่ง ท เคิง ล้างบ้า จ จู โคะ นอ ล้อ
แบ เด้าะ โพล้ง ซมาเรีย ล แฌ้ ลี้ เท่อ ลู่ง เกล้ ล บ้อง นอ, เฌ๊ ท้อง โพล้ง ล แฌ้ นอ อ ฌ๊างไท้ะ, ท่อง อ แด เว๊ ฌ้อง ย๊างเซิง ย๊างซ้ะ แบ เว๊
ลู่ง ไค๊ ล นี้ง อ เว๊ ทึ้ ทาง อ จี้ คี๊ง แทะ เกล๊าง เอะ ล่าง มี๊ง อ กแช่, โล้ เว๊, ‘แฌแซ-อ้ะ ไช้ะ, เมะ แบ เลา จี้ แอ นี่ อี้ง นอ จ เมะ เฌ๊ ไท้ โคะ จ ม ลุ้ ไท้ เอะ แน้’
ฌ้อง อ พู โอ เว๊ อ วี่แซย่ อ แคว๊, อ เว๊ พุ้ไบ้ะ เว๊ ดี๊ ตไก้ยะ, อางกี ล้าง เว๊ ลู่ง งู้ อาง แช อ ล่าง, อ ไฌ่ บี่ อี้ง, ท ล่าง พี่ ม ฆวี้ มี๊ง เว๊ ล โอ ล้า แบ
แบเด้าะ แม้ บี่ ซุ้ ไละ ฌี้ ไละ แอว้ โล้ เว๊ “โพล้ง แช๊เมะ ไฌ๊ซ้ะ ดี๊ แน้ เมะ ซู๊ อาง ซ้ะ เท่อ นอ ลื่ง อาง-อ้ะ, เมะ ซู๊ โอ้ ซ้ะ ที๊ง นอ ดึ้ โอ้-อ้ะ, น เมะ แม้ เอะ-อ้ะ บี่ อี้ง นอ อ เว๊ ม ฌางแช้ ล้าง อ ซ้ะ”
แคว่ เมะ ฌี้, โพล้ง เมะ แม้ อ้า แม้ ซ๊าง น ซื๊ง นอ แม้ ช๊า ไท้-อ้ะ ล ฌี้, แบเด้าะ อางกี ล้าง น ซื๊ง ซ้ะ ม แม้ ท อ ฌี้ โละ ซ้ะ, ดี๊ แม้ ท อ ฌี้ เอะ โพล้ง กุ้ อ แฌ้
