35 “ลู่ง ท ต้ะเซ๊ง พ้า ฌี้, ลู่ง ท ทูดุ้ ท อ พือ อ โท๊ พ้า ฌี้, ลู่ง ท เค๊ง ท อฆ๊าอฆวี๊ง พ้า ฌี้, ลู่ง ท ดว้ะ ท อแออแซย้ พ้า ฌี้ นอ, แม้ไพ้ะแม้แม แบ ท ล ฌี้
ดี๊ แม้ช้า เท่อ แบฆ้ะ ดี๊ กู ช๊างล้าง เทว๊-อ้ะ, กูมีง ลู่ง อ ฌี้ ลู่ง ทลื่งทาง เทว๊ ทซูงทแซ อ ฌ่าง, กู ล แบ ดี๊ อ ซีง แบ, ดี๊ เท่อ พี่ อางแก-อ้ะ ลู่ง ท้ะ คู, ทเทว๊ แกย้ ฆึ ดี๊ ทซู, ดี๊ ทเค๊งดุ้ ตองดุ้ ทูดุ้ กุ้ อ เม้ง
กแช่ยาเว แช๊เมะ ดี๊ นางเค๊ง พี่ ลโต้ลล้อง แบ แบเด้าะ เซิงมึซ้ะมึ ดี๊ โล่งเค๊ง, พี่ อเกิ้งอแบ นอ ล้อ
นางเค๊งบ้อง ดี๊ นางเค๊ง ลู่ง อโต้อล้อง นอ, เก กแช่ยาเว อ เท่อ โล่งเค๊ง กุ้เม้ง ลู่ง อ โทง พ้า นอ, เก กแช่แยว้ อ ทไพ้ะทแม้ ล้อ
นางเค๊งแซ ทฆ๊าทฆวี๊ง ลโต้ลล้อง แบ, ดี๊ นางโตง กไบล้ะกแบล เท่อ คี๊งเม้ง อี้ง นอ, เก ท แช๊เมะไฌ๊ซ้ะ แบ กแช่ยาเว
“เกม๊า น ซื๊ง โอ ดี๊ นางเค๊ง, นางโตง ท อ ไฆ๊ ดี๊ ท อ ที๊ง พี่ อโต้อล้อง
“ต้ะเซ๊ง เท่อ ดี๊ ท ลเกิ้งลแบ แบ ล ฌี้, เอน้าชางบ้า ไคล้ โอ โพล้ง ซยาง-อ้า, อางกีเมะอางกีแน๊ โพล้ง เก ท อดูอโท๊-อ้า ล ฌี้, แบเด้าะ เกม๊า น ต้ะเซ๊ง ฌุ้พาง ดี๊ ท แบกแช่แยว้อซ้ะ
เกม๊า คุ้ช๊องแน ท พี่ กแช่ยาเว โล้ เว๊ เกม๊า เฌ้เทิงทาง, เกม๊า โล้ล้าง นบ้านคว่าง ดี๊ ทลู่ง ลแพ นอ เกม๊า ทจ้องม๊อง คุ้ช๊องแน น ลู่ง
อ ไฌ่ บี่ อี้ง, น ต้ะเซ๊ง แบ โพล้ง บี่ จะ เล้ นอ, กแช่ แยว้ ม ต้ะเซ๊ง น ซื๊ง บี่ นอ ล้อ, น ซื๊ง แม้ เอะ โพล้ง บี่ เล้ นอ, กแช่ แยว้ ม แม้ เอะ น ซื๊ง บี่ นอ ล้อ
“เกม๊า เค๊งบ้อง แซ ล้างช๊าง โละซ้ะ, ล โพลง ฆ๊า, ล โพลง ฆวี๊ง, โอ น โทง พ้า ล ฌี้
เกม๊า น โอ ดี๊ เค๊งบ้อง แซ พี่ อ แบเมาะ, ดี๊ โต้ล้อง, ดี๊ โอ ดี๊ นางโตง พี่ อ แบเมาะ, ดี๊ โต้ล้อง, บี่ซุ้ น มื่งนี้งมื่งซ๊าง, ม โอ ไยะ ลู่ง ที๊งล่างค่างพ้า, พี่ กแช่ยาเว น กแช่แยว้, เกล๊าง เอะ แน้ นอ ล้อ
