6 อไฌ่บี่อี้ง, โพล้ง ล ชื้อ เฌ๊ทาง ดึ้ซึ้ โละซ้ะ ดี๊ จ ที๊งล่างค่างพ้า อไฌ่อแบ้ โอ แอ, ดี๊ อแออแซย้ นอ, ดว้ะ ล น้า แบ อ แซว๊ บี่ซุ้ดี๊ คี๊ยื่ง อ แซว๊ อ เม บี่ซุ้ดี๊ คี๊ยื่ง มู่ อ เม
เปลงไฆวะ ที๊งล่างค่าง พ้า, พี่ โอ ดี๊ ทซูงทแซ แอ, เกม๊า อ เกทล่าง โอโปล้ก้ะ ดี๊ ฌ๊าง เป๊งนี่ โพล้ง ลู่ง ที๊งล่างค่างพ้า นอ, อ ทอ้าทซ๊าง อกย้อง
โพล้ง พี่ อ แซว๊ เก น้ะ นอ โอ อ แซว๊ค๊าง เก เฆะ บี่ซุ้ ม แม้เฌ๊ฌ้องไฆวะ โพล้งซยางโพล้งน้ะ, ลู่ง ที๊งล่างค่างพ้า ดี๊ แม้เฌ๊ฌ้องไฆวะ โพล้งไว้ะโพล้งว๊าง, ลู่ง กโพล้ง อซุ้อแกล้
แบฆ้ะ ดี๊ โพล้ง เฆ้อ ก ชื้อ อ ฌางคู ล่าง อไฌ่อกย้อง พี่ เมทาง ที่ ทชูง พ้ะดู ดี๊ ทชูง พูปรี้ง แบฆ้ะ ดี๊ กเย่ เด้า พี่ อมึอพ้า อไฌ่อกย้อง ลู่ง เว่ง พ้า พี่ แม้มึอางอวีง
ดี๊ ม กว้ะ เว๊ เด้าะ ลี้ นึฆ้าง ลู่ง ยูดา พ้า, อ ม กลึ้ไบ้ะ ดี๊ แยว้ล้าง พะไฆวะ ท๊อง อ ท้อง โคะบ้อง, ดี๊ อ ได้ะ พี่ ย้างแย่ ทาง อ ซ้ะ นอ, ม คลึไบ้ะ น ที๊งล่างค่างพ้า อเล่อโท๊ ล้อ, แน้ อีงมานูเอง-เอ้อ
อ เว๊ ล นี่ โอ ลู่ง กแช่ยาเว อ ที๊งล่างค่างพ้า แบ แบเด้าะ เอฟาอีง ม ไท้ไท้ ลู่ง อีไย้ะ อ เว๊ ม อาง ทอาง แบอ้า ลู่ง อะซีเรีย พ้า
“ก ม เกม๊า ไท้ เอะ น ซื๊ง เนง แล้ พี่ ทวี่ ยู้ง ซี เย้า นี่ อางไฆวะ เว๊ ดี๊ พี่ ทวี่ พื๊งซยุ้ ซี เย้า, ทวี่ บางไพละ, ดี๊ ทวี่ ไจ ซี เย้า อาง เว๊ นอ เมะเว๊ ก ซึ้พูมู๊ง พ้ะดู พี่ ก โซ๊งทาง-อ้ะ เฌ๊ ดึ้ซึ้ น ซื๊ง นอ ล้อ
