17 ท บี่ นอ, โพล้ง พี่ ล แฌ้ เล้ ซีงแฌ๊ เว๊ ท เม้ง เล้ เก ท อ ฌี้, แบเด้าะ ล แม้ เว๊ แบ, โพล้ง ล แฌ้ นอ แม้ ท เด้บ้ะ นอ ล้อ
ท่อง น ซื๊ง ซีงแฌ๊ บี่ อี้ง เย้า, ฌ้อง น แม้ โพะ อ ไค๊ นอ น ซื๊ง ม โอ ดี๊ ท มึ ท พ้า ล้อ
จ เมะ ล เฌ๊ โล้ เอะ อซื๊งเว๊ อ เท่อ แบ นอ, อซื๊งเว๊ ล ซีงแฌ๊ อ ท เด้บ้ะ แบ, แบเด้าะ ค๊องเนง อี้ง อซื๊งเว๊ ไคล้ พ้อง ล้าง อ ซ้ะ ดี๊ อ ท เด้บ้ะ ล ซี น่าง เม้ง ล้า แบ
กแช่ เยซู ไคล้ ช๊า เว๊, “น ซื๊ง เมะ เมะโบล นอ น ท เด้เทา เด้บ้ะ ล โอ แบ, แบเด้าะ พี่ น ซื๊ง โล้ ล้าง ซ้ะ น แด เท่อ ซี นอ น ท เด้เทา เด้บ้ะ โอ ได้ะ ล้อ”
อซื๊งเว๊ซีงแฌ๊ กแช่ แยว้ อ ทอางแม้เลา โล้ เว๊, โพล้ง พี่ แม้ อ ซ้ะ บี่ นอ เกิ้ง ซี๊ง ล้อ, แบเด้าะ อซื๊งเว๊ แม้ ท ล แพ อี้ง ครึๆ, แอ นี่ อ นอ อซื๊งเว๊ ซ้ะอวีง ซ้ะโทะ, พี่ อ แด โพล้ง อ แฌ้แพ แม้ เว๊ นอ ปะ ล้อ
เมะ บี่ นอ ท อ ฌี้ แม้ ซี๊ง แย้ โบ่, ล เมะ แบ เฆาะ, ท เด้บ้ะ ล้อ แม้ ซี๊ง แย้, ท เด้บ้ะ เจ่ ท อ ฌี้ แม้ ซี๊ง แย้ บี่ ซุ้ ม โพล ทาง อ ซ้ะ ล้างที๊ง, ท บี่ นอ ท อางแม้เลา ปล้ะ ล้าง ท เด้บ้ะ อ มยู๊ อ จะ เต้ๆ
อ ไฌ่ บี่ อี้ง, อซื๊งเว๊ เมะ ล ซีงแฌ๊ เกล้ ลู่ง อ ฌี้ อ แบ แบ นอ, ฌี้ นี่ พี่ อ ซีงแฌ๊ เว๊, ฌ้อง วีงโด้งโคล๊ง ไฆวะ อ ซ้ะ ดี๊ ทอางแม้เลา ลู่ง อ ฌี้ อ แอว้, พี่ ทอางกี ล้าง เอะ-อ้ะ เย้า
