6 อ ซื๊งเว๊ อ เย้ นอ, เจ่ แม้ เก ไช๊ช้าง ล ซี แบ อ เว๊ แม้ นี่ อ ทไพ้ะทแม้ อซูงอแซ คลึไบ้ะ ล้าง อ ซ้ะ ล ซี แบ อ ซื๊งเว๊ อ จูงล่างคางคู นอ, เก ทอ้าทซ๊าง ดี๊ ท แม้ชองแม้จุ้ นอ, โอ อ จูง พ้า
กเย่ โพล้ง ฌางคูโคล๊งคู นอ, อ้าทางซ๊างทาง ลู่ง กแช่แยว้ อ เมะแซ พ้า, ดี๊ ฌางคูโคล๊งคู นอ, โอ ฆวี้ทะ ดี๊ ทดู้งทลู่ นอ ล้อ
ทึเมะ จ จูง พ้า ล โอ ดี๊ ทแม้ชองแม้จุ้ แบ เฆาะ ดี๊ จ ทชูแพ อางท่าง เท่อ นอ, อฌี้อแอว้ เมะ ฌี้
ทแม้เฌ๊ฌ้อง โอ ลู่ง เว่ง แกล้ พ้า นอ ทแม้น้ะแม้โน๊ง, ดี๊ ท กไบล้ะ ล ล้างแม่ไฆวะ ลู่ง เว่ง อ คว้าง พ้า พ้ะเล่ นอ แบ
ลเมะแบ, น ซ้ะ นอ ช๊องมองเว้ ทแม้อ้าแม้ซ๊าง เท่อ น จูง นอ, แม้ชองแม้จุ้ เท่อ ลู่ง ฌางคูโคล๊งคู
“ท เซงทื่งเฌ๊ฌ้อง แบ พู ลี้ง พี่ กไบล้ะกแบล”, กแช่ยาเว ไจ้ะเว๊ บี่อี้ง “โพล้ง พี่ ช๊องมองเว้ทแม้, แบเด้าะ ล เมะ ก เท่อ แบ โพล้ง แม้ ทเอิ้งล้าง, แบเด้าะ ล เมะ ก ท แบซ้ะ แบ บี่ซุ้ แม้ แอทาง ทเด้บ้ะ คี๊งโทะ
เมะเว๊ กแช่ยาเว ซึ้คู ดูทึชองทึ อ โซ๊ง ซไบ้ะแซ เมะเว๊ อีซลาเอง อชื้ออชะ ดี๊ โพล้ง ยูดา เก เซง มื่งเทิง พี่ กแช่แยว้ แบ อ ซ้ะ ดี๊ กแช่แยว้ มื้งแล่ ท อเกิ้งอแบ แบเด้าะ แคว่เซ้อ โอ ดี๊ ท ซวีงล้างบุ้ล้าง มื้งแล่ ทฌี้ทแอว้ แบเด้าะ แคว่เซ้อ โอ ดี๊ ท อ ลู่ง กุ้ซย้ะ เกม๊า แม้ช้า-อ้ะ
ก ม โล้ แบฆ้ะ ดี๊ น ทแบกแช่แยว้อซ้ะ ดี๊ น ทไพ้ะทแม้ แบเด้าะ นอ, อ ล ล้างเปิ่ง ดี๊ แน้ แบ
อี้งเซ้อ, น ดืงอาง ทอาง, ลู่ง ท ติ้โละไอโละ ดี๊ ทดึ้ทชาง ดี๊ บี่ซุ้ มิ้ เท่อ ดี๊ จูง ช่องดูง พี่ ออ้าอซ๊าง อ ฌ่าง เฆาะ ล้อ ท ดืงอาง ทอาง, ด้องซุ้ แน้ ล นี้ง แย๊ อี้ง นอ ล ดึ้ เกม๊า น ลู่ง แน่ฌ๊า ลี้ ท้อง ทล่าง พ้ะโท๊ แบ
เฆ้อ กุ้แฌ้ ก เกทางก้ะ บี่ซุ้ดี๊ ท พี่ อ แบอ้า ดี๊ ก ซื๊งเว๊ ก ทแบกแช่แยว้อซ้ะ เลาพะ นอ, เก บี่ซุ้ดี๊ ไช๊ช้าง แบอ้าแบซ๊าง ก ซื๊งเว๊ กุ้แฌ้ ล้างไย้ะ บี่ซุ้ดี๊ เซงแล ดี๊ ก ทไพ้ะทแม อูงพลุ้ไฆวะ เฆ้อ บี่ซุ้ดี๊ ลี้ง
ที๊งน๊างโบ้ ดึ้ เกม๊า ที๊ง เคลง ครึๆ, บี่จะเล้ นอ อ เว๊ ดึ้ เกม๊า ทอ้าทซ๊าง กึทาง ครึๆ, บี่นอ ล้อ ท แม้ชองแม้จุ้, ดี๊ ทแม้ เฌ๊ฌ้อง นอ, โอ เกม๊า แน่ฌ๊า แบ-อ้ะ ลู่ง อ พ้า ครึๆ ทแช๊ทคลี, ดี๊ ท แบเจ้าแบแช๊ นอ, โพลทาง ลู่ง ก เมะแซ พ้า ครึๆ
อ เว๊ แคแนแคแก้ โพล้งซยาง ดี๊ โพล้ง ลกู้งลล๊า แบ, เลา ดี๊ ตมละ คองแซย้, ล ญ่อง เกม๊า ไท้ ท อางกีล้างทะ แบ, อ เว๊ บุ้ทาง อ เมะ ดี๊ ทเค่งทฌ้าง, ดี๊ แม้ ท ล้าง ซ้ะลูซ้ะไล้ะ ล เม้ง แบ ล เม้ง
ทชองทจุ้ นี่ ดูทางโท๊ทาง เก ทอ้าทซ๊าง อ นางทุ้บ้อง โพล้ง ล โอ ล้างลื๊อ น่างแฌ้ ล้า แบ เฆาะ อ ซื๊งเว๊ อ ทโอทช๊อง ล โอ ล้างลื๊อ น่างเม้ง ล้า แบ, ท อ ลู่ง เซ๊ ตทูงเซ๊ล้างคล้าง ล โอ อ ซื๊งเว๊ อซุ้อแกล้ แบ โพล้ง ล้างเปิ่ง ล โอ อ ซื๊งเว๊ อซุ้อแกล้ แบ
เกม๊า แม้ พลี้งท้ะ เมะเว๊ ที๊งล่างค่างพ้า โอ ฆวี้ ดี๊ ทซวีง อบ้าอคว่าง ดี๊ เฌงฆ๊าง นอ, โอ ฆวี้ ดี๊ ทชองทจุ้
ฌ้อง นอ กแช่แยว้ ไคล้ ดี๊ แย้ ไจ้ะเว๊, “อีซลาเอง ดี๊ ยูดา อชื้ออชะ อ ทเด้บ้ะ โอ แอ น้ะมะ, ที๊งล่างค่างพ้า นอ โอ ฆวี้ ดี๊ ทซวีง, ดี๊ ท ลเกิ้งลแบ แบ โอ ฆวี้ เว่ง, เป๊งนี่ อ ซื๊งเว๊ ไจ้ะเว๊ ‘กแช่ยาเว ญ๊องไฆวะ ค่าง อี้ง เย้า, ดี๊ กแช่ยาเว ล แคว่ เว๊ ล้า แบ’
กแช่ยาเว ไจ้ะเว๊, “โพล้ง พี่ อางกีซยอง นี่ ท แม้ชองแม้จุ้ ดี๊ ท อางฌูงอางแบล ลู่ง อ ทล่างแคว่จู้เท่อ อ พ้า นอ ล ซีงแฌ๊ ท พี่ ม แม้โพะ เกล้ ลู่ง อโต้อล้อง อ ไค๊ แบ”
โอ้, แน้ โพล้ง พี่ แบซ้ะ ซึ้นี้งซึ้ซ๊าง ท เซงทื่งเฌ๊ฌ้อง, เกม๊า อ ไยะทางน่างทาง แบเด้าะ แม้นี่ ก้ะ ลู่ง ท โพะคอง พี่ อชองอจุ้ เฌ๊ เบ้าทาง
แบเด้าะ น เฌ้เทิงทาง ดึ้ซึ้ กพูกลี้ง ด้องซุ้ ดี๊ อ เกดีงเกแด้ น ลู่นี่ก้ะ โพล้ง พี่ อ เอ ทฆู๊งทพุ้ อ ไช๊แค่ พ้ะโท๊ เมะเว๊ ลู่นี่ก้ะ กเย่ โพล้ง พี่ อ ลี้ แพ๊ไฆวะ เท่อ ดี๊ ท อางกีล้าง ซ้ะ พี่ ล ช๊องมอง เว๊ แบ, ม โอ ดี๊ ทดึ้ทชาง นอ
กเย่ เว่ง อ โพล้ง ทโอทช๊อง นอ, โอ ฆวี้ ดี๊ ทดู้งทลู่ ดี๊ โพล้ง ลู่ง เว่ง พ้า นอ, ไคล้ คีงอูง เท่อ ดี๊ พลี้ ลู่ง ท อางโล๊ไละ นอ, โอ ลู่ง อ ซื๊งเว๊ อ นุ้ พ้า
ล นี้ง แย๊ นอ, ก ม แม้เตาแม้แต๊ โพล้ง กุ้แฌ้ พี่ พื๊งซยุ้ ค๊างพะ ป้ะตู๊ง เคิง ดี๊ โพล้ง ลแพ นอ, พี่ ดึ้ เกม๊า อคูอแน่ อ เด้า โอ ฆวี้ ดี๊ ท แม้ชองแม้จุ้, ดี๊ ท อางโล๊ไละ”
ท เซงทื่งเฌ๊ฌ้อง แบ เว่ง พี่ อ กไบล้ะกแบล, ดี๊ เก ทแบอ้า เว่ง พี่ แม้น้ะแม้โน๊ง โพล้ง อ แฌ้แพ
อีซลาเอง อ กแช่แยว้ กแช่ยาเว ไจ้ะเว๊, “อไฌ่บี่อี้ง, ก แช๊เมะไฌ๊ซ้ะ ดี๊ ท ไจแดไฆวะ โละซ้ะ, ดี๊ ท แม้ชองแม้จุ้ ล้อ”, กแช่ยาเว ซึ้คู ดูทึชองทึ โล้ เว๊ บี่อี้ง ล้อ, อกย้องบี่นอ, เกม๊า ปโล่ล้างซ้ะ เมะ ฌี้, เก โพล้ง กไบล้ะกแบล ล ฌี้
