21 ท่อง กแช่แยว้ ลี้ฌ้า อ ซื๊งเว๊ ซีง ลแพ ลู่ง ปางเลมิ้ ล โค๊ นอ, อ เว๊ ล ซู๊อางซู๊โอ้ ซ้ะ เท่อ แบ กแช่แยว้ ดึ้ เกม๊า ที๊ง แยว้ล้าง นี่ ลู่ง โล่ง พ้า, ลู่ง อ เว๊ อ ฌ่าง กแช่แยว้ อางน้าง พ้ะ โล่ง, ดี๊ ที๊ง ซยุ้ทาง เว๊
กแช่แยว้ เกล๊าง เอะ-อ้ะ ทอาง, โอนี่ ลู่ง มุ้คู แม้ ล้างแม่ อ ทซู๊อางซ้ะ ดี๊ ดึ้เกม๊า ที๊ง ไจทางนี่ ลู่ง โล่ง พ้า, แม้ ล้างแม่ อ ท ซู๊โอ้ซ้ะ ดี๊ กแช่แยว้ อางแบเลา เกม๊า อ ซื๊ง ลี้ฆ้าง ยึนี่ ค่าง, พี่ กแช่แยว้ อืงล้าง เว๊ ม เกล๊าง-อ้ะ นอ
กแช่แยว้ เกล๊าง วีงฌี้แล้แอว้ ซอง-อ้ะ ซ๊าง-อ้ะ, ดี๊ ล แม้ โอโท๊ไฆวะ อ มานา ลู่ง อ ซื๊งเว๊ อ นุ้ แบ, ดี๊ เกล๊าง ที๊ง แม้ ล้างแม่ไฆวะ อ ทซู๊โอ้ซ้ะ
กแช่แยว้ เว่พ้ะ โล่ง, ฌ้อง นอ ที๊ง แยว้ล้าง อ แยว้ล้าง เก ที๊งกล้อง ลู่ง ทล่าง ซู๊งไฆ๊ พ้า
กแช่แยว้ ล้อ, เว่พ้ะทาง ที๊งทางชุ้, ดี๊ ที๊งพูกล้อง อ คูทุ้ กแช่แยว้ ล้อ, เกม๊า ที๊งกล้อง พี่ แยว้ล้าง ครึๆ, นอ ซู๊งไฆ๊ไฆวะ
กแช่แยว้ แม้ เท้พ้ะ ไล๊, เก ท อ เช้า พ้า, ลู่ง แพะคูทเคแกล้ ดี๊ เกม๊า อซื๊งเว๊ โอที๊ง แอฌี่งแอฌ้อง, บี่ซุ้ดี๊ เฌ๊นี่ ลู่ง ทโยะคิ้ พ้า
กแช่แยว้ ดึ้เกม๊า ที๊งพูกล้อง, ไจทางนี่ โล่ง พ้า ดี๊ ดึ้เกม๊า ที๊ง แยว้ล้าง บี่ซุ้ดี๊ ที๊งกล้อง พ้ะดู
เมะเย้า, กแช่แยว้ ท่าง ไล๊, เกม๊า ที๊ง ซยุ้ทาง ฌ้อง นอ ที๊งพูกล้อง แยว้ล้าง, ล้างอวีงล้างพะ แบเด้าะ กแช่แยว้ ม เกล๊าง ทอาง ปะ ซี ชี่-อ้า? ม แด้เว้ ทไพ้ะทแย เอะ อพูอลี้ง ซี ชี่-อ้า?”
แคว่เซ้อ, จ ม ชี๊เทิง ลู่ง น เมะแซ พ้า พี่ นอ, ลู่ง โล่ง คู ทลู่ง โฮเร, เกม๊า น ท่าง โล่ง นอ, ฌ้อง ที๊ง ม แยว้ล้าง, เกม๊า โพล้งเฌงพูฆ๊างพู โอ้ เว๊” โมเซ แม้ เว๊ บี่นอ, ลู่ง โพล้ง อีซลาเอง อเม้งอแซย่ ซีงลแพ อ เมะแซ พ้า
ดี๊ ทลู่ง คู พ้ะโท๊ กุ้ โพลง, ดี๊ ท จ้องคู พ้ะโท๊ กุ้ อ จ้อง นอ, ม โอ ดี๊ ที๊งกล้อง พู พี่ โอ ดี๊ ที๊ง แยว้ล้าง, ลู่ง มื่ง ล นี้ง แย๊ พี่ โอ ดี๊ ท แม้ซี๊ง พ้ะดู โละซ้ะ, พี่ ทล่างคุ้แคว่จู้เท่อ ล้างฆ่อง นอ ล้อ
อ ซื๊งเว๊ ลแพ นอ, ล ซู๊อางซ้ะ เท่อ-อ้า, ซู๊โอ้ซ้ะ เท่อ-อ้า แบ ทคู่ ต้องแช๊-อ้า, มื่ง-อ้า, ม ล แม้เฌ๊ฌ้อง-อ้ะ แบ เมะเว๊ กแช่แยว้ พี่ ย๊างซ้ะ แบ อ ซื๊งเว๊ นอ, ม ลี้ฌ้า อ ซื๊งเว๊ ดี๊ ม ลี้ฌ้า-อ้ะ ลู่ง ที๊ง ทางชุ้
อ เว๊ ม เฌ๊ ดี๊ ทฌางทย้า ดี๊ ก ม เฌ๊ไท้ฌ้า-อ้ะ, ดี๊ ท แม้ มึทาง อ ซ้ะ ก ม เกม๊า อ เว๊ ไจ ค๊างฌะ ที๊ง กล้อง ลู่ง เกล้ แด้ พี่ อ เว๊ ม ล แบท้า แบ เมะเว๊ ก เก เอะ อีซลาเอง อ แพ่ ดี๊ เอฟาอีง เก ก พู วี่แซย่ ล้อ
โมเซ ย้างทาง อ นางทุ้บ้อง ท่าง ไล๊ นอ คี๊ง ทีง, ดี๊ ที๊ง แยว้ล้าง เว๊ แอฌี่งแอฌ้อง, ฌ้อง โพล้ง น๊างมู๊ง ดี๊ อ ทพูแฆ่ ลแพ นอ โอ้ แบ ที๊ง นอ ล้อ
