14 จ กุ้ซย้ะ บี่ซุ้ดี๊ เบลงบลาง, บี่ซุ้ดี๊ ทูแท้ที๊ง จ ฌาง บี่ซุ้ดี๊ ทูลี่งแอว้ จ เมะคลี๊ง ล้างไปว้ะล้างท้าง ดี๊ ท แคว่ทาง ลู่ง ท้ะโค๊ ทอดูทึโท๊ทึ จ กแช่แยว้-เอ้อ, จ แบ ท แคแนแคแก้, อวีงซ้ะชู้ เก เอะ แย้ ทเฌิ่งทค๊า
“เกม๊า อางกีล้าง ทอางกีล้างทะ ลู่ง แย้ ดี๊ กแช่แยว้ อ ฌ่าง โพล้ง โอ ล แฌ้ ชี่-อ้า? ม ระ เอะ แย้
จ เก น๊างพื่งวี่ โละซ้ะ ดี๊ ทวีง เม้ง ดี๊ จ เก ฌุ้พาง โละซ้ะ ดี๊ ทูโนะโจะพ้ะดู
จ เมะคลี๊ง กลี๊งกว่าง, เป๊งนี่ โอคุ้แท๊ กแช่แยว้ อ ท เอิ้งล้าง จ อางจ้ะ บี่อี้ง, “ทแค๊เล้ กแช่แยว้ ม อางเลว๊ แย้?”
จ กแช่ยาเว-เอ้อ, เกม๊าเต้ ไคล้ช๊า แย้ เมะ เพล จวีงจแล้ ล้างท่องไฆวะ เย้า เกม๊าเต้ อางกีซูงไฆวะ น เมะ ดี๊ แย้ ล ฌี้ ไค๊ไก้ะ จ ม บี่ซุ้ดี๊ โพล้ง ลแพ นอ, พี่ อ ลี้ล้าง ลู่ง ทซี๊ง พ้า
เกม๊า คุ้ช๊องแน, ดี๊ ไคล้ช๊า แย้ ยี๊แด จ คู่เซิงโฌ้ซ้ะ, พี่ กุ้ทาง โล้ แบ เท่อ, แบฆ้ะ ดี๊ ทน้ะทโน๊ง, ดี๊ จ เซิงอึ้ซ้ะอึ้ เท่อ
จ ไปว้ะน่างไปว้ะซ้ะ ดี๊ ทฌางทย้า จ โคะ ซู๊งไฆ๊ จ เมะคลี๊ง กลี๊กว่าง ลู่ง ทโอคุ้แท๊ จ กแช่แยว้
ก ซื๊งเว๊ กุ้แฌ้ ฌางล้างย้าล้าง บี่ซุ้ดี๊ ทซู๊ง ก ฌางอื้งฌางโทะ บี่ซุ้ดี๊ ทูลี่ง แอว้ ก มื้งแล่ ท อเกิ้งอแบ, แบเด้าะ ล โอ แบ เฆาะ มื้งแล่ ทพ้องทพลิ้, แบเด้าะ นอ, อ โอ ช้างชื้ง ไย้ ดี๊ เฆ้อ ล้อ
ก ซื๊งเว๊ ก เมะคลี๊ง ล้างเพาล้างแช่, อางฆื๊ง แคว่ นี่ ท แม้ช้า พี่ อลื่งอฆวี้ ล โอ แบ ก ซื๊งเว๊ ก โอคุ้แท๊ เท่อ ลู่ง ก ทล่าง โอคุ้ เท่อ โอคุ้แท๊ โพล้ง ลู่ง ค่าง พ้า, พี่ แม้ช้า เฆ้อ ล ซี แบ
ดี๊ โพล้ง แฌ้ฌี้ๆ, เมะ พ้องพลิ้ ซี๊ง, ไจคุ้ซูงไฆวะ ซี นอ อ ซื๊งเว๊ ม โอ ทลู่ง คู อ เว๊ ม เก บี่ซุ้ดี๊ ทูลี่งแอว้ ลู่ง ทลู่ง คางไท้ะ ล แฌ้ๆ, นอ, ม ฌางอื้งฌางโทะ ลู่ง อ ท เด้เทาเด้บ้ะ อ กย้อง
กจุ้แฆว้ มืง แบ ท เบ้าะล้างไฆวะ อ ฆ้าโฆ่, ดี๊ แบ ท ลี้ฌ้า กเย่ เพล่ มืง นอ, ฌางอื้งฌางโทะ อ ซื๊งเว๊ อ ลู่ง ล้างเพาล้างแช่, ด้องซุ้ ทูลี่งแอว้ อ ลู่ง ดี๊ ล แฌ้ๆ, นอ, ท่างล้าง อ ซ้ะแน๊
นีนาเว นอ บี่ซุ้ดี๊ ที๊งกวี้ง พี่ ที๊ง แยว้ล้าง อ ซื๊งเว๊ ซีง ลแพ กุ้ซย้ะ เท่อ ไจ้ะเว๊, “โอโท๊, โอโท๊” แบเด้าะ นอ, โพล้ง แกยไท้ อ ซ้ะ ล โอ น่างแฌ้ แบ
ท บี่ นอ กแช่ เยซู ล้อ เกม๊า ท อืงล้าง ฌี้ นี่ อ คางไท้ะ นอ เก ทาง ซี
