25 จ เคิง ที๊งโบ้ ดี๊ โอ้ที๊ง ดี๊ จ คางย๊างซ้ะ พ้า ม ดึ้ เกม๊า อีไย้ะ อ ที๊งกล้อง เกม๊า ซู๊งทางไฆวะ”
เบงฮาดะ โช๊ง ไท้ ทโล้โค เด้าะ ไจ้ะเว๊, “ฌางคู มูง ลู่ง ซมาเรีย เมะ กู้งทาง, ลู่ง โพล้ง พี่ อ เฌ๊ โพะ จ ไค๊ เมาะ ล แฌ้ ล ช้อง นอ, เกม๊าเต้ ทกโช้งกแช่ ซีงลแพ นอ แม้ เอะ แย้, ดี๊ แอ ทาง น้ะเละ อ นอ ได้ะ”
เป๊งนี่ อ ไจ้ะเว๊ บี่อี้ง “จ แม้ เท่อ อี้ง ดี๊ จ จูง อไฌ่อแบ้ ดี๊ จ ทโกงซีมองแบ, เมะเว๊ จ โอ ดี๊ ท แนซีโน้งซี จ นี่ กูงไฆวะ โพล้ง กุ้ชื้อกุ้ชะ ลแพ นอ อ ค่างช๊า ดี๊ ตมละ นี่ อคองอแซย้ จ เก บี่ซุ้ดี๊ โพล้ง พี่ อ ไฌ่ชองแบ้ชอง พี่ นี่ ทึ้ล้าง กจุ้แฆว้ ลแพ นอ
จ จูง ซไบล้ะ นี่ โพล้ง กุ้ชื้อกุ้ชะ ลแพ นอ อคองอแซย้ บี่ซุ้ดี๊ ซไบล้ะ นี่ ทูซวี๊ง ดี๊ ด้องซุ้ โพล้ง ฆี๊ นี่ ทู อ ดีง พี่ แบ ท ญ๊องไฆวะ บี่จะเล้ นอ จ อางกีซยอง ฌางคูโคล๊งคู เลาพะ บี่นอ ล้อ โพล้ง ล โอ แม้ว้ะ ทาง อ ได้ะ เฌ๊ ด้างทะ เว๊-อ้า อ้างทาง นุ้-อ้า, กุ้ซย้ะ อ ลู่ง เจ้าะแจ้ะ-อ้า น่างแฌ้ แบ”
ดี๊ ที๊ง ม ซู๊งทางแดไฆวะ ปางเล ที๊งไน กล้อง ที๊ง ม ล โอ แบ ดี๊ ซู๊งไฆ๊
ดี๊ ที๊งกล้อง พู ลแพ นอ ม อืง น๊าอืง อีไย้ะ อ ที๊งพูกล้อง ม ล้างแซย้ ดี๊ ซู๊งทางไฆวะ พ่อง ดี๊ ฌี๊งที๊ง ม ไย้ะไฆ๊
แบเด้าะ ร้ะชาเค ไจ้ะเว๊, “ก เซงคู เจ่ แย้, เกม๊า จ เฌ๊ ไคล้ ทไคล้ ลแพ อี้ง ดี๊ น เซงคู ดี๊ แน้ ฆวี๊ นอ ล้อ, ดี๊ ล เกม๊า ไคล้ ดี๊ โพล้ง พี่ ชี๊น้าง โอ กางแป คู ลแพ นอ แบ, เมะเว๊ โพล้ง พี่ แบ อาง อ อี ดี๊ อาง อ ชีง ล พ๊าฆ่าง ดี๊ น ซื๊ง บี่นอ-อ้า?”
เมะเว๊ ที๊งล่างค่างพ้า พี่ น ลี้ฆ้าง แม้นี่ก้ะ นอ, ล บี่ซุ้ดี๊ ค่าง อีไย้ะ, พี่ น ซื๊ง ไจแดไฆวะ-อ้ะ นอ แบ, ลู่ง ทล่าง พี่ นอ, น ซื๊ง ฆวีงล้าง ทดุ้ทแล ทซูงทแซ, ดี๊ น ชู๊ง ที๊ง ดี๊ น คาง บี่ซุ้ดี๊ เก โซ๊ง ทดุ้ทแล นอ ล้อ
